«بيىل ءبىزدىڭ ەلىمىز ءۇشىن ەرەكشە مانگە يە – قر تاۋەلسىزدىگىنىڭ 30 جىلدىعى وتەدى. تاۋەلسىزدىكتىڭ 30 جىلى – بۇل بەيبىتشىلىكتىڭ 30 جىلى, جاسامپازدىقتىڭ 30 جىلى جانە زاماناۋي مەملەكەتتىلىك پەن ازاماتتىق قوعام ينستيتۋتتارىن قۇرۋدىڭ 30 جىلى. 30 جىل بۇرىن كەڭەس وداعىنىڭ ىدىراۋى جاڭا تاۋەلسىز مەملەكەتتەردىڭ قۇرىلۋىنا اكەلدى. بۇل جىلدارى باۋىرلاس رەسپۋبليكالارداعى ءومىر ءار ءتۇرلى ءوتتى. ءبىر قاراعاندا, كەيبىر جالپى زاڭدىلىقتاردى ءبولىپ كورسەتۋ وڭاي ەمەس, باستاپقى پوزيتسيالاردا دا, ودان كەيىنگى ۆەكتورلار مەن دامۋ قارقىنىندا دا ۇلكەن ايىرماشىلىقتار بار. بىراق سوڭعى 30 جىلدىڭ تاريحى تۇراقتى, ساياسي, الەۋمەتتىك, ەكونوميكالىق جۇيەلەر, ساياسي جانە ازاماتتىق مادەنيەت پەن دامۋ تراەكتورياسى ءالى قالىپتاسپاعان دامۋشى الەمدە مەملەكەت باسشىسىنىڭ ەركىنە, ۇلت كوشباسشىسىنا جانە ۇلتتىڭ ءوز ەرىك-جىگەرىنە وتە تاۋەلدى ەكەنىن دالەلدەدى دەپ سانايمىن», دەدى داريعا نازارباەۆا XVII ەۋرازيا مەديافورۋمىنىڭ اشىلۋىندا.
ء«ار ءتۇرلى ساياسي جۇيەلەردىڭ ارتىقشىلىقتارى تۋرالى تەوريالىق پىكىرتالاسقا قاتىسۋعا بولادى, تاريحتىڭ دامۋى تۋرالى پايىمداۋعا بولادى. ءيا, باستاپقى جاعدايلار, تابيعي رەسۋرستار ۇلكەن ءرول اتقارادى, بىراق ەڭ باستى ءرولدى – كوشباسشىنىڭ تۇلعاسى, ەلدىڭ الەمدەگى ورنى مەن ونىڭ بولاشاعى تۋرالى كوزقاراسى الادى. قازاقستان بۇل تۇرعىدا تۇڭعىش پرەزيدەنت – ەلباسى نۇرسۇلتان نازارباەۆتىڭ ارقاسىندا ايرىقشا ورىن الادى. ەلباسىنىڭ باسشىلىعىمەن ءبىزدىڭ ەلىمىز قىسقا تاريحي كەزەڭدە شىنايى تاۋەلسىزدىككە, مەملەكەتتىك ەگەمەندىككە قول جەتكىزۋدىڭ, تولىققاندى قازىرگى زامانعى ەكونوميكا مەن سەرپىندى دامىپ كەلە جاتقان الەۋمەتتىك سالانى قۇرۋ جولىنان ءوتتى. بۇل وڭايعا سوقپايتىن كۇردەلى جول. ءبىزدىڭ ەلىمىز سول جولدا بارلىق قيىندىقتار مەن پروبلەمالاردى تۇسىنە وتىرىپ, العا دامىپ كەلەدى. ويتكەنى, وزدەرىڭىزگە بەلگىلى, جولدى جۇرگەن ادام عانا ەڭسەرەدى», دەدى ول.
ونىڭ ايتۋىنشا, بۇگىنگى قازاقستان – الەمدىك ساياساتتا دا, ورتالىق ازيا وڭىرىندە دە بەلسەندى ۇستانىمى بار مەملەكەت.
«سوڭعى 30 جىلدا قازاقستان وڭىردەگى بەيبىتشىلىك پەن قاۋىپسىزدىككە جاۋاپتى مەملەكەت رەتىندە تانىلىپ كەلەدى. قيىن ساتتە ءبىز ءاردايىم باۋىرلاس رەسپۋبليكالارعا كومەككە كەلدىك, ازىق-ت ۇلىك, استىق, وتىن, تەحنيكانى بولىستىك. اۋعانستاندا بولىپ جاتقان ۇدەرىستەر ءبارىمىزدى الاڭداتادى. اۋعاندىق رەتتەۋ, وسى ەلدىڭ بەيبىت دامۋى تاقىرىبى بىرنەشە رەت ءبىزدىڭ فورۋمنىڭ باستى نازارىندا بولدى», دەيدى د. نازارباەۆا.
داريعا نازارباەۆا قازىرگى ەۋرازيالىق مەديافورۋمنىڭ ديالوگ پەن ءوزارا تۇسىنىستىكتىڭ ماڭىزدى الاڭىنا اينالاتىنىنا سەنىم ءبىلدىردى.
«اۋعانستاننىڭ قايعىلى مىسالى كورسەتكەندەي, قانداي جاقسى نيەتپەن جاسىرسا دا, باقىت پەن وركەندەۋدى شەتەلدىك نايزامەن الىپ كەلۋ مۇمكىن ەمەس», دەدى د. نازارباەۆا.
