«سوڭعى 2009 جىلعى ساناقتا رەسپوندەنتتەر 45 سۇراققا جاۋاپ بەردى. 2021 جىلعى حالىق ساناعىندا 91 سۇراق بار, ونىڭ 69-ى مىندەتتى, 22-ءسى - ناقتىلاۋ سۇراقتارى. ساۋالنامالارعا دەموگرافيالىق, تۇرعىن ءۇي, جۇمىسپەن قامتۋ ماسەلەلەرىنەن باسقا, ازاماتتاردىڭ دەنساۋلىعى تۋرالى سۇراقتار كىرەدى, ونىڭ ىشىندە رەسپوندەنتتەر «كوروناۆيرۋسپەن اۋىردىڭىز با؟», «ۆاكتسينا سالدىردىڭىز با؟» دەگەن ساۋالدار بار», دەيدى ول.
ءبولىم باستىعى ساۋالناماعا پاندەميانىڭ اسەرى تۋرالى سۇراق نەگە قوسىلعانىن ءتۇسىندىردى.
«سول ارقىلى رەسپوندەنتتەردىڭ جالپى جاعدايى تۋرالى بىلۋگە بولادى. الىنعان مالىمەتتەر تەكسەرىلەدى جانە وڭدەلەدى. قورىتىندى 2022-2023 جىلدارى ون جيناق بولىپ شىعادى. وندا: ەتنيكالىق قۇرام, كوشى-قون, ءبىلىم, نەكە مەن وتباسى, ءۇي شارۋاشىلىعى, جۇمىسپەن قامتۋ, تابىس پەن كۇنكورىس كوزى, تۇرعىن ءۇي سيپاتتاماسى قامتىلادى», دەدى ا.ابىلدابەكوۆ.
ءوز كەزەگىندە, ساناق ناتيجەلەرى ەكونوميكالىق بولجاۋعا, جۇمىسپەن قامتۋ ساياساتىن ايقىنداۋعا, باسقا الەۋمەتتىك باعدارلامالاردى قۇرۋعا, سونداي-اق مەملەكەتتىك ورگانداردىڭ فۋنكتسيالارىن ورىنداۋعا, عىلىمدى جانە جالپى قوعامدى اقپاراتتىق قامتاماسىز ەتۋگە پايدالانىلاتىن بولادى.
«الىنعان مالىمەتتەر ايماقتىڭ ەكونوميكالىق دامۋى ءۇشىن پايدالانىلاتىن بولادى. مىسالى, بالاباقشا, مەكتەپ, اۋرۋحانا, ەمحانا سالۋ ءۇشىن پايدالانىلادى», دەپ قوستى ا.ابىلدابەكوۆ.
حالىق ساناعى كەزىندە الاياقتاردان قورعانۋ ءۇشىن سپيكەر ينتەرۆيۋەرلەردىڭ ەرەكشە كيىمدەرىنە نازار اۋدارۋعا كەڭەس بەردى.
«سۇحبات الۋشىلار 1 قازاننان 30 قازانعا دەيىن ءۇي-ءۇيدى ارالايدى.ء ار ساناق جۇرگىزۋشىدە الماتى قالاسىنىڭ ستاتيستيكا دەپارتامەنتىنىڭ ءمورى باسىلعان فوتوسۋرەت يدەنتيفيكاتورى, ۇلتتىق ساناق بەلگىلەرى بار شارف پەن سومكە جانە دەرەكتەردى ەنگىزۋگە ارنالعان ەلەكتروندى پلانشەت بولادى. قۇجاتتىڭ دۇرىستىعىن sanaq.gov.kz سايتىنان تەكسەرۋگە بولادى. مۇنى ىستەۋ ءۇشىن سىزگە ID ءنومىرىن ارنايى ىزدەۋ جولىنا - «سۇحبات بەرۋشىنى ىزدەۋ» (وڭ جاق جوعارعى بۇرىشتا ورنالاسقان) جازۋ قاجەت», دەدى ول.
