دەۆەنپورت، ازات، روككو...

ومىردە بىرەۋگە جاساعان قياناتتىڭ قارىمتاسى بار ەكەندىگىن تۇسىنەسىز. وسى تۋىندىداعى باستى ءرولدىڭ ءبىرى – ازاتتى ەلورداداعى قاليبەك قۋانىشباەۆ اتىنداعى قازاق مەملەكەتتىك اكادەميالىق مۋزىكالىق-دراما تەاترىنىڭ جاس اكتەرى ەرعۇلان جانپەيىسوۆ وينادى. ءيى جۇمساق، مومىنداۋ، ءوز پايىمى از ۇلدىڭ بەينەسى جۇرتشىلىققا جاقسى اسەر قالدىردى. شىن مانىندە، وسى ءرول ونىڭ اكتەرلىك تالانتىن ەلگە تانىتتى.

ەرعۇلان − قاراعاندى وبلىسى بالقاش قالاسىندا ومىرگە كەلىپ، كىشكەنتايىنان ونەرگە جاقىن بولىپ وسەدى. وبلىستىق، قالالىق اباي، مۇقاعالي، ورالحان بوكەي وقۋلارىنا قاتىسىپ، جۇلدەگەر اتانادى. بالا دەگەن ارمانشىل عوي، بىردە عارىشكەر، ەندى بىردە ينجەنەر بولسام دەپ ارماندايدى. مەكتەپ بىتىرگەننەن كەيىن اتا-اناسى «پروگرامميست بول» دەپ، سونىڭ وقۋىن وقىتادى. ونى قىزىل ديپلوممەن اياقتاپ، تۋعان شاھارىندا «نۇر وتان» پارتياسىنىڭ «جاس وتان» جاستار قاناتىنىڭ اتقارۋشى حاتشىسى، قالا اكىمدىگىندە مامان سەكىلدى قىزمەتتەردى اتقارىپ، ءتۇرلى مادەني ءىس-شارالاردىڭ باسى-قاسىندا جۇرەدى. ءتىپتى بىردە قالانىڭ ونەرلى جاستارى بىرىگىپ، سپەكتاكل قويادى. سونداي ءبىر قويىلىم ۇستىنە كەلىپ قالعان الماتىداعى تەمىربەك جۇرگەنوۆ اتىنداعى ونەر اكادەمياسىنىڭ وقىتۋشىلارى سولاردىڭ ورتاسىندا ەرەكشە كوزگە تۇسكەن ەرعۇلانعا: «سەن ءبىزدىڭ اكادەمياعا كەلىپ، اكتەرلىك وقۋعا ءتۇس، ول سەنىڭ قولىڭنان كەلەدى» دەپ ۇسىنىس ايتادى. بۇل وعان وي سالادى ءارى تانىستارى دا: «جاقسى مۇمكىندىك، بارىپ باعىڭدى سىناپ كور» دەپ جىگەرىن قايرايدى. ءسويتىپ، ول الاتاۋدىڭ ەتەگىندەگى اسەم قالانى ەمەس، ارقا توسىندە ارۋداي جايناپ، قۇلپىرىپ ءوسىپ كەلە جاتقان استاناعا بارۋدى ۇيعاردى. سول شەشىممەن ەلورداداعى قازاق ۇلتتىق ونەر ۋنيۆەرسيتەتىنىڭ تەاتر فاكۋلتەتىنە وقۋعا ءتۇسىپ، تاماشا اكتەر، قازاقستاننىڭ ەڭبەك سىڭىرگەن قايراتكەرى اقىش وماردىڭ كۋرسىنا قابىلداندى.

تالاپتى جاس ستۋدەنت كەزىنەن بىرقاتار قىسقامەتراجدى فيلمدەرگە ءتۇسىپ، كينونىڭ قىر-سىرىن مەڭگەرەدى. بىراق جوعارى وقۋ ورنىن بىتىرگەننەن كەيىن ەلوردالىق كاللەكي تەاترىنا جۇمىسقا قابىلدانىپ، العاشىندا قاتارداعى قۇرامدا، شاعىن ەپيزودتاردا ويناپ جۇرەدى.

تەاتر ساحناسى – كيەلى الەم. ويتكەنى وندا كورەرمەنگە اكتەردىڭ شەبەرلىگى، شىنايىلىعى انىق كورىنەدى. ساحنادا ارتىق قيمىل، لەپىرمە سوزگە ورىن جوق. ەرعۇلاننىڭ العاشقى ءرولى اعىلشىن دراماتۋرگى رەي كۋنيدىڭ «تۋعان كۇن» كومەدياسىنداعى دەۆەنپورت بەينەسى بولدى. بۇل ءوزى كومەديا بولعانمەن، استارى قالىڭ، قاتپارلى شىعارما. مۇندا اقشا اتتى قۇدىرەتتىڭ ادام بالاسىنىڭ مىنەز-قۇلقىن ءاپ-ساتتە وزگەرتىپ جىبەرەتىن كۇشىن اشىپ كورسەتكەن. دەۆەنپورت اقشا تابۋ ءۇشىن نەشە ءتۇرلى ايلاعا بارىپ، ەلدى الداپ جۇرەدى. بىلاي ايتقاندا، الاياق. وسى كەيىپكەردى ەرعۇلان ءوز قيالىمەن بايى­­تا ءتۇسىپ، كورەرمەنگە اسەرلى جەتكىزدى. ودان كەيىن يتاليا دراماتۋرگى فۋريو بوردوننىڭ «قارداعى كوگەرشىننىڭ ءىزى» مونوسپەكتاكلىندە كەيىپكەردىڭ بالاسىن وينايدى. بۇل قويىلىم كورنەكتى اكتەر تىلەكتەس مەيراموۆتىڭ جەتپىس جىلدىق مەرەيتويىنا وراي ساحنالاندى. باستى رولدەگى جالعىزدىقتان جاپا شەككەن قارتتى تىلەكتەس اعانىڭ ءوزى سومدادى. وسى قويىلىم ەرعۇلاندى جاڭا ءبىر قىرىنان تانىتتى. تاجىريبەسى مول اكتەرمەن ساحنادا قاتار ويناپ، ۇلكەن ءتالىم الدى.

بۇدان سوڭ جوعارىدا ايتىپ وتكەن يتاليالىق دراماتۋرگتىڭ بەلگىلى رەجيسسەر الىمبەك ورازبەكوۆ ساحنالاعان «بايلانىس اياسى… 16+» قويىلىمىنداعى سابىرلى، بايسالدى كەيىپكەر – روككونى وينادى. بۇل كەيىپكەردىڭ دە وبرازىن ءساتتى اشا ءبىلدى.

بيىل تاۋەلسىزدىگىمىزدىڭ وتىز جىلدىعىنا وراي قاليبەك قۋانىشباەۆ اتىنداعى قازاق مەملەكەتتىك اكادەميالىق مۋزىكالىق-دراما تەاترىندا ساحنالانعان جازۋشى، مەملەكەتتىك سىيلىقتىڭ لاۋرەاتى روزا مۇقانوۆانىڭ «بوپاي حانىم» تاريحي تراگەدياسىندا ول جاس ابىلقايىردى سومداپ، كورەرمەندەردىڭ ىقىلاسىنا بولەندى.

ەرعۇلان جانپەيىسوۆتى تەاتر مەن كينونى قاتار الىپ جۇرگەن، قوس قاناتتى اكتەر دەپ ايتۋعا بولادى. اسىرەسە ونى كينو سۇيەر قاۋىم «توپىراققا تامعان تەر»، «وتىڭدى وشىرمە» تەلەحيكايالارى ارقىلى جاقسى بىلەدى.

– «وتىڭدى وشىرمە» تەلەحيكاياسىندا اكتەرلىك قۇرام مىقتى بولدى. ءبارى دە ءوز رولدەرىن كەرەمەت ورىندادى. بۇل سەريال مەن ءۇشىن ۇلكەن مەكتەپ بولدى. مۇنداعى باس­تى كەيىپكەر – ازات دەگەن جىگىت اناسىنىڭ ايتقانىنان شىعا المايدى. ىنجىقتاۋ، ەركەلەۋ. بىراق ومىردە مەن ونداي ەمەسپىن، وزىمە سەنىمدىمىن. كينودا «كەلىنشەگىمدى» كوپ رەنجىتەمىن، سونى «راس» دەپ ويلاعان كەيبىر كورەرمەندەر اۋەجايدا، ۆوكزالدا كەزدەسىپ قالعاندا: «سەن قانداي وڭباعانسىڭ، ءاپ-ادەمى ايەلىڭدى قور قىلىپ، تاستاپ كەتتىڭ» دەپ رەنىشىن ايتىپ جاتادى. ەندى ول كينو عوي. ول كىسىلەردىڭ الدىندا نە دەپ اقتالارىمدى بىلمەيمىن. ءسويتىپ، ەكىنشى «بەكەجان» بولا جازدادىم، – دەپ كۇلەدى.

جالپى، ەرعۇلاننىڭ ونەر جولىندا جەتسەم دەيتىن ارمانى كوپ، ول تەاتر ساحناسىندا ءار جانرداعى كەيىپكەرلەردى سومداعاندى جاقسى كورەدى. اسىرەسە وعان ايبارلى، ايبىندى تۇلعالاردىڭ بەينەلەرى كوبىرەك ۇنايدى...