كريمينالدىق پوليتسيا باسقارماسىنىڭ قىزمەتكەرلەرى جەدەل-ىزدەستىرۋ ءىس-شارالارىن جۇرگىزۋ بارىسىندا جالعان ۆاكتسيناتسيا پاسپورتتارىن ناقتى ەگۋ پروتسەدۋراسىنان وتپەي ساتقانى ءۇشىن سەگىز ادامدى انىقتادى, ولاردىڭ اراسىندا دارىگەرلەر مەن دەلدالدار بار.
دەرەكتەر بازاسىندا رەسمي تىركەلگەن ۆاكتسيناتسيا تۋرالى جالعان قۇجات ءۇشىن دارىگەرلەر 30-50 مىڭ تەڭگە مولشەرىندە اقشا الىپ وتىرعان. «ساتۋشىلار» 150-دەن استام ازاماتقا ۆاكتسيناتسيادان ءوتۋ تۋرالى تولقۇجات بەرگەندەرىن ايتتى.
«اتالعان فاكت بويىنشا قر قك 385-بابىنىڭ 2-بولىگى بويىنشا سوتقا دەيىنگى تەرگەۋ باستالدى (بىرنەشە رەت نەمەسە ادامدار توبى الدىن الا ءسوز بايلاسۋ ارقىلى جاساعان جالعان قۇجاتتاردى قولدان جاساۋ, دايىنداۋ نەمەسە وتكىزۋ). بۇل ءىس بويىنشا تەرگەۋ جالعاسۋدا», دەلىنگەن پد ءباسپاسوز قىزمەتى تاراتقان حابارلامادا.
