قر مەملەكەتتىك ونەر مۇراجايى ديرەكتورىنىڭ عىلىم جونىندەگى ورىنباسارى سۆەتلانا كوبجانوۆانىڭ ايتۋىنشا, تاۋەلسىزدىك ءداۋىرى قازاقستاننىڭ مۇراجاي قوعامداستىعى مەن مادەنيەتى ءۇشىن جاڭا پەرسپەكتيۆالار اشتى.
«30 جىلدىق جەمىستى جۇمىستىڭ قورىتىندىسىن شىعارا وتىرىپ, ءبىز عىلىمي قىزمەتكەرلەر جۇمىسىنىڭ بارلىق اسپەكتىلەرىنىڭ ءسوزسىز جاندانعانىن ايتا الامىز. ءا.قاستەەۆ اتىنداعى مەملەكەتتىك ونەر مۇراجايى ءوزىنىڭ 85 جىلدىق قىزمەتى بارىسىندا قىزمەتكەرلەردىڭ كاسىپقويلىعىن, جۇمىس ساپاسى مەن دەڭگەيىن ارتتىرۋ, كادرلاردىڭ تۇراقتاماۋىنا جول بەرمەۋ جانە ولاردى جاستار تاجىريبەسىن تابىستاۋ ءۇشىن ساقتاۋ مىندەتىن ىسكە اسىرۋدا. عىلىمي قىزمەتكەرلەر ءوز بولىمدەرىندە قورلاردى كاتالوگتاۋ جانە ساندىق وڭدەۋ, تۋىندىلاردى اتريبۋتتاۋ بويىنشا ۇلكەن جۇمىس اتقارادى. عىلىمي-زەرتتەۋ جۇمىسى - مۇراجاي قىزمەتىنىڭ نەگىزگى باعىتتارىنىڭ ءبىرى, ونىڭ ماقساتى كوللەكتسياداعى تۋىندىلاردى زەرتتەۋ جانە تالداۋ بولىپ تابىلادى. ايتا كەتسەك, 1991 جىلدان باستاپ مۇراجاي كوللەكتسياسى 5003 ساقتاۋ بىرلىگىنە تولىقتى, بۇل ەسەپ سەكتورى, ساقتاۋ ءبولىمى مەن عىلىمي قىزمەتكەرلەردىڭ بىرلەسكەن تابىستى جۇمىسىنىڭ ايعاعى», دەدى س.كوبجانوۆا.
شىعارمالاردى عىلىمي جۇيەلەۋ سيپاتتاما, تانىسۋ, كاتالوگتىڭ ەگجەي-تەگجەيلى مالىمەتتەرى ارقىلى جۇزەگە اسىرىلادى.
«قىزمەتتىڭ ماڭىزدى ناتيجەسى كوللەكتسيا كاتالوگتارىن, ەكسپوزيتسيالار مەن كورمەلەر بويىنشا جولسىلتەمەلەردى شىعارۋ بولىپ تابىلادى. كاتالوگتار - بۇل مۇراجايدىڭ زياتكەرلىك قۇندىلىعى. ءبىزدىڭ مۇراجايدا كوللەكتسيانىڭ بارلىق بولىمدەرىن باسىپ شىعارۋعا دايىندىق جۇمىستارى جۇيەلى تۇردە جۇرگىزىلۋدە. 1991 جىلدان باستاپ «قازاقستاننىڭ ساندىك-قولدانبالى ونەرى» مۋزەي ءبولىمى «قازاق حالىقتىق قولدانبالى ونەرى» (2010), ء«حىح-حح عاسىرلارداعى قازاقستاننىڭ زەرگەرلىك ونەرى» (2008) كاتالوگتارىن شىعاردى. «قازاقستاننىڭ بەينەلەۋ ونەرى» ءبولىمى ء«ابىلحان قاستەەۆ» كاتالوگىن (2005), «قازاق حالىق ەپوسى» رەسپۋبليكالىق كورمە-كونكۋرسىنىڭ كاتالوگىن شىعاردى. «قازاق حالقىنىڭ تاريحى مەن داستۇرلەرى» (2013), «قازاقستان ءمۇسىنى» (2010), «بابالار اڭساعان تاۋەلسىزدىك» (2016), «قازاقستاننىڭ اكۆارەلى: كەشە جانە بۇگىن» (2019) جانە تاعى باسقالار», دەدى سپيكەر.
