اۋرۋحاناداعى تراۆماتولوگيا جانە قابىلداۋ بولىمدەرى جازاتايىم جاراقات العان, سونداي-اق سوزىلمالى ناۋقاسى بار تۇرعىنداردى قىركۇيەكتىڭ تورتىنەن باستاپ قابىلداي باستادى.
اتالعان ەمدەۋ مەكەمەسىنە پاندەميا باستالعالى وسىمەن ەكىنشى رەت ينفەكتسيالىق ورتالىق قىزمەتىن اتقارۋعا تۋرا كەلىپ وتىر. بىلتىر كوكتەمدە ىندەت ءورشىپ كەتكەن تۇستا مۇندا ءبىرىنشى رەت ينفەكتسيالىق ستاتسيونار جاساقتالىپ, 1200-دەن استام ادام كوروناۆيرۋس ىندەتىنە قارسى ەمدەۋ شارالارىنان وتسە, بيىل 700-دەن استام ناۋقاس ەمدەلىپ شىققان.
الايدا اۋرۋحانا دارىگەرلەرىنىڭ ايتۋىنشا, بيىل ىندەت جۇقتىرعانداردىڭ ىشىندە اۋىر ناۋقاستار كوپ. سوندىقتان جانساقتاۋ بولىمىندەگى توسەك سانىن 18-دەن 40-قا دەيىن, ال ەمدەۋ پالاتالارىنداعى توسەكتىك ورىن سانىن 280-نەن 330-عا دەيىن كوبەيتۋگە تۋرا كەلگەن.
«بيىل اۋرۋحانانى قايتا مامانداندىرۋ بىلتىرعا قاراعاندا جەڭىلىرەك بولدى. ەمدەۋ مەكەمەسى الدىن الا ەكى ايعا ەركىن جەتەتىن ءدارى-دارمەك قورىمەن, ارنايى وقۋدان وتكەن مەديتسينا قىزمەتكەرلەرىمەن قامتاماسىز ەتىلدى. ەمدەۋ الگوريتمىن دە الدەقاشان انىقتاپ قويدىق. سوندىقتان نەبارى ءبىر تاۋلىكتىڭ ىشىندە قالىپتى اۋرۋحانادان ينفەكتسيالىق ستاتسيونارعا كوشىپ, ناۋقاستاردى قابىلداپ, ەمدەۋ شارالارىن باستاپ كەتتىك. ەندى ءبىر تاۋلىكتىڭ ىشىندە بۇرىنعى قىزمەتىمىزگە قايتا كىرىسىپ, ناۋقاستاردى قابىلداپ جاتىرمىز, دەدى قالالىق اۋرۋحانانىڭ باس دارىگەرى دانيار جانداەۆ.
قالالىق اۋرۋحانادا Covid-19 ىندەتىنە شالدىققان 70 شاقتى ناۋقاس قالعان. ولار قازىر ينفەكتسيالىق بولىمدە ەم الىپ جاتىر. بۇل ناۋقاستاردىڭ ىشىندە جانساقتاۋ بولىمىندە جاتىپ شىققاندار دا بارشىلىق. ولاردى اجال تىرناعىنان امان ساقتاپ قالۋ ءۇشىن 400-گە جۋىق دارىگەر ءبىر اي بويى كۇرەسكەن.
ىندەتتىڭ تارالۋىنا جول بەرمەۋ جونىندەگى جەدەل شتابتىڭ مالىمەتىنشە, قازىر قوستاناي وبلىسىندا ينفەكتسيالىق كەرەۋەتتەردىڭ 62,0%-ى بوس, وڭىردە 652 ادام ەمدەلىپ جاتىر. ايماق تۇرعىندارىنىڭ 60,2 پايىزى, ياعني 303 899 ادام كوروناۆيرۋسقا قارسى ۆاكتسينانىڭ ءبىرىنشى كومپونەنتىن قابىلداعان. ال 257 227 ادام, ياعني ءوڭىر تۇرعىندارىنىڭ 50,9 پايىزى ەكىنشى كومپونەنتىن ەكتىرگەن.
قىركۇيەكتىڭ 8-ءى كۇنى وبلىس اكىمى ارحيمەد مۇحامبەتوۆ جەدەل شتابتىڭ كەزەكتى وتىرىسىن وتكىزىپ, وڭىردەگى ەپيدەميالىق احۋالدى باعامداپ, وبلىس تۇرعىندارىنان ەكپەنى ەكپىندى جالعاستىرۋدى سۇرادى.
«بۇگىنگە دەيىن وبلىسقا ۆاكتسينانىڭ ءبىرىنشى كومپونەنتىنىڭ 381 535 دوزاسى, ال ەكىنشى كومپونەنتىنىڭ 339 637 دوزاسى جەتكىزىلدى. ۆاكتسينالاۋدى جۇرگىزۋگە ءتيىستى وقىتۋدان وتكەن 426 مەديتسينا قىزمەتكەرى جۇمىلدىرىلدى. ايماقتا Ashyq جوباسىنا قاتىسۋ ءۇشىن 4 682 ءوتىنىم قابىلداندى», دەدى اكىم.
قوستاناي قالاسى
