ستۋدەنتتەر مەن وقۋشىلارعا وبلىستىق كاسىپكەرلەر پالاتاسىندا ارنايى وقۋ كۋرسىن تامامداعان ۇستازدار ساباق بەرەدى. كاسىپكەرلەر پالاتاسىنىڭ مالىمەتىنشە, شىلدە جانە تامىز ايلارىندا مەكتەپ مۇعالىمدەرى ءۇش لەك بولىپ ءبىلىم جەتىلدىرۋ كۋرستارىنان وتكەن. ال وقۋ جىلىنىڭ باسىندا 81 ۇستاز پالاتا سەرتيفيكاتتارىنا يە بولىپ, جاڭا پاننەن ساباق بەرە باستادى. مەكتەپ مۇعالىمدەرىنىڭ كەلەسى لەگىن قازان ايىندا وقىتۋ جوسپارلانعان.
– «كاسىپكەرلىك نەگىزدەرى جانە بيزنەس» ءپانى مەكتەپتەرگە جوعارى وقۋ ورىندارى مەن كوللەدجدەرگە 2019 جىلدان باستاپ بىرتىندەپ ەنگىزىلە باستادى. بيىل مەندە وبلىستىڭ ءار وڭىرىندەگى قازاق مەكتەپتەرىنەن كەلگەن 22 مۇعالىم وقىدى. قازىر ولار 10-11-سىنىپ وقۋشىلارىنا بيزنەس نەگىزدەرىن وقىتا باستادى. بىراق بۇل ءپان كەيىن 9-سىنىپتارعا دا جۇرە باستايدى. جالپى, كەلەشەكتە كاسىپكەرلىك نەگىزدەرىن 5-سىنىپتان باستاپ وقىتۋى مۇمكىن. ويتكەنى قازىرگى جاسوسپىرىمدەردى پسيحولوگيالىق جاعىنان بيزنەسكە ەرتە جاستان دايىنداۋ كەرەك. ءبىزدىڭ كۋرستاردا وقىعىسى كەلەتىن ۇستازدار وبلىستىق ءبىلىم باسقارماسىنا نەمەسە كاسىپكەرلەر پالاتاسىنا ءوتىنىش بەرە الادى. بىزدەن سەرتيفيكات العان مۇعالىمدەر «كاسىپكەرلىك نەگىزدەرى جانە بيزنەس» ءپانىن 5 جىل قاتارىنان وقىتۋ قۇقىعىنا يە بولادى, – دەدى وبلىستىق كاسىپكەرلەر پالاتاسىنىڭ بيزنەس-ترەنەرى ءابۋتالىپ ءامىر.
ءبىلىم مەكەمەلەرىنىڭ كوبى وقۋشىلارعا جاڭا ءپاندى, قازىرشە, قوسىمشا ساباق رەتىندە ۇسىنىپ وتىر. الايدا 2021 جىلدىڭ تامىزىندا جاڭارتىلعان مازمۇنداعى جالپى ورتا ءبىلىم بەرۋدىڭ تيپتىك باعدارلاماسىن قابىلداعان ءبىلىم وشاقتارىندا كاسىپكەرلىك نەگىزدەرى «جاھاندىق قۇزىرەتتىلىك» كۋرسىنىڭ اياسىندا مىندەتتى ءپان رەتىندە اپتاسىنا ءبىر رەت وقىتىلاتىن بولادى.
قوستاناي
