ماسەلەن, قىركۇيەكتىڭ العاشقى جۇماسىندا ارقايسىسى 200 مىڭ تەڭگەنى قۇرايتىن 10 سەرتيفيكاتتىڭ يەلەرى اتالدى. بۇدان سوڭ 6 قىركۇيەكتە تۇرعىنداردى ىنتالاندىرۋ ماقساتىنداعى اقشالاي ۇتىس ويىنىنىڭ 1 ملن تەڭگەلىك التى سەرتيفيكاتى ويناتىلدى. بۇل كەزەڭگە ۆاكتسينا سالدىرعان 87 252 ادام قاتىستى. كەزدەيسوق سانداردى تاڭداۋ ارقىلى جەرگىلىكتى تەلەارنانىڭ تىكەلەي ەفيرىندە وتكەن اقشالاي ۇتىس ويىنىن تاۋەلسىز باقىلاۋشىلار قاداعالاپ وتىردى.
– ءبىر كۇنگى ۇتىس ويىنىنىڭ ناتيجەسىندە جىلىوي اۋدانىنىڭ تۇرعىندارى مەرەكە دۇزەلگەنوۆ, ادىلبەك قاميدوللا, قۇرمانعازى اۋدانىنان التىن سارسەنوۆا, اتىراۋ قالاسىندا تۇراتىن جومارت جۇمابەكوۆ, گۇلناز دوستانوۆا, ايمان ابيەۆا جەڭىمپاز اتانىپ, ارقايسىسى 1 ملن تەڭگەنىڭ سەرتيفيكاتىن يەلەندى, – دەيدى «ازاماتتىق اليانس» زتب جەتەكشىسى الىبەك سەمعاليەۆ.
ۆاكتسينا سالدىرىپ, ءبىر كۇندە ميلليونەر اتانعاننىڭ ءبىرى – جومارت جۇمابەكوۆ. الايدا ول قارجىلاي سەرتيفيكاتتى تاپسىرۋ شاراسىنا قاتىسا المادى. سول سەبەپتەن, سەرتيفيكات ونىڭ جۇبايى اينۇر فازىلوۆاعا بەرىلدى.
– الەم ەلدەرىندە مۇنداي قاۋىپتى ۆيرۋستىڭ بۇرىندا دا تارالعانىن بىلەمىز عوي. بىراق بۇل جولعى ىندەتتىڭ ءورشۋى وڭايلىقپەن باسىلار ەمەس. مۇنىڭ الدىن الۋ ءۇشىن ۆاكتسينا سالدىرۋدىڭ ماڭىزى ارتىپ تۇر. سوندىقتان كوروناۆيرۋسقا قارسى ۆاكتسينا ەكتىرگەندە اقشا ۇتۋدى ماقسات تۇتپادىق. دەگەنمەن, اكتسيادان ۇتىپ العان ميلليون تەڭگە ارتىق ەتپەيدى عوي, – دەيدى ا.فازىلوۆا.
ءدال وسىنداي قوماقتى بولماعانمەن, ىنتالاندىرۋ شاراسىن ح.دوسمۇحامەدوۆ اتىنداعى اتىراۋ ۋنيۆەرسيتەتى دە وتكىزدى. ۋنيۆەرسيتەت رەكتورى سالامات يدريسوۆتىڭ ايتۋىنشا, وقىتۋشىلار مەن قىزمەتكەرلەردىڭ, ستۋدەنتتەردىڭ دەنساۋلىعىن ساقتاۋ ءۇشىن ۆاكتسينا سالدىرۋدىڭ ماڭىزىنا باسا كوڭىل ءبولىنىپ وتىر.
– ماقساتىمىز – ۇجىمدىق يممۋنيتەتتى قالىپتاستىرۋ. ويتكەنى جاھان جۇرتىنا قاۋىپ توندىرگەن كوروناۆيرۋس ينفەكتسياسىنان ۆاكتسينا عانا قورعاي الادى. وسى ورايدا ستۋدەنتتەر اراسىندا «ۆاكتسينا ال دا, ۇتىس ويىنىنا قاتىس» اكتسياسىن وتكىزدىك. اكتسياعا 1 شىلدە مەن 25 تامىز ارالىعىندا ۆاكتسينا سالدىرعان 1 333 ستۋدەنت قاتىستى, – دەيدى س.يدريسوۆ.
ۇتىس ويىنىنىڭ ناتيجەسىندە 50 ستۋدەنت جاتاقحاناعا ورنالاسۋ ءۇشىن 50 پايىزدىق جەڭىلدىكتى, 49 ستۋدەنت شەت ءتىلىن ۇيرەتەتىن تەگىن كۋرسقا قاتىسۋ جولداماسىن ۇتىپ الدى. ال 30 ستۋدەنت نۇر-سۇلتان قالاسىنا تەگىن ساياحاتتايتىن بولدى. سونداي-اق 3 ستۋدەنتكە ءبىر جىلدىق وقۋ اقىسىنا 30, 50 جانە 100 پايىزدىق جەڭىلدىك بەرىلدى. وقۋ ورداسىنىڭ 5 شاكىرتى نوۋتبۋك يەلەندى.
وسىنداي ىنتالاندىرۋ شارالارى كوروناۆيرۋس ينفەكتسياسىنا قارسى ۆاكتسينا سالدىرۋشىلار قاتارىن كوبەيتىپ وتىر. وبلىستىق دەنساۋلىق ساقتاۋ باسقارماسىنىڭ ءباسپاسوز قىزمەتى تاراتقان اقپاراتقا قاراعاندا, 7 قىركۇيەكتە 1 659 اتىراۋلىق تۇرعىن ەكپە العان. ونىڭ اراسىندا 43 پەداگوگ, 30 ستۋدەنت, 15 دارىگەر, 28 مەملەكەتتىك قىزمەتشى, سوزىلمالى اۋرۋى بار 141 پاتسيەنت, 1 397 جەرگىلىكتى تۇرعىن مەن قۇقىق قورعاۋ ورگاندارىنىڭ 4 قىزمەتكەرى بار. ال 1 اقپاننان بەرى ۆاكتسينالاردىڭ ءبىرىنشى كومپونەنتىن سالدىرعاندار سانى 205 163 ادامدى قۇرادى. ۆاكتسينالاردىڭ ەكىنشى كومپونەنتىن 152 762 ادام سالدىرعان.
اتىراۋ وبلىسى
