ءىس-شاراعا قازاقستاننىڭ ساياسي جانە قوعام قايراتكەرلەرى, قازاقستاندا اككرەديتتەلگەن ديپلوماتيالىق كورپۋس پەن حالىقارالىق ۇيىمداردىڭ وكىلدەرى, ساراپشىلار مەن جوعارى وقۋ ورىندارىنىڭ ستۋدەنتتەرى قاتىستى.
سىناق پوليگونى جابىلۋىنىڭ مەرەيتويىمەن قاتار, ءىس-شارا ورتالىق ازيادا يادرولىق قارۋدان ازات ايماق تۋرالى شارتقا (واياقااش) قول قويىلۋىنىڭ 15 جىلدىعىنا ارنالدى.
بۇۇ تۇراقتى ۇيلەستىرۋشىسى ميكاەلا فريبەرگ-ستوري ءوزىنىڭ سوزىندە قازاقستاننىڭ يادرولىق قارۋسىزدانۋ مەن تاراتپاۋ سالاسىنداعى ماڭىزدى ءرولىن اتاپ ءوتىپ, سەمەي پوليگونىنىڭ جابىلۋى جاھاندىق انتيادرولىق قوزعالىستىڭ دامۋىنىڭ ماڭىزدى كەزەڭى جانە قازاقستان يادرولىق قارۋدى تاراتپاۋدا كوپشىلىككە ۇلگى بولعانىن اتاپ ءوتتى.
قر سىرتقى ىستەر مينيسترلىگى حالىقارالىق قاۋىپسىزدىك دەپارتامەنتىنىڭ ديرەكتورى قايرات سارجانوۆ تاۋەلسىزدىكتىڭ تاڭىندا سەمەي پوليگونى جابىلۋىنىڭ ۇلكەن ساياسي ماڭىزدىلىعىن اتاپ ءوتتى جانە ەلىمىزدىڭ ايماقتىق جانە جاھاندىق اۋقىمدا بەيبىتشىلىك پەن قاۋىپسىزدىكتى قامتاماسىز ەتۋگە باعىتتالعان بىرقاتار باستامالارىنا توقتالدى.
«بۇۇ باس اسسامبلەياسىنىڭ سەسسياسىندا سويلەگەن سوزىندە قازاقستان پرەزيدەنتى قاسىم-جومارت توقاەۆ يادرولىق قارۋدان ازات الەمگە قول جەتكىزۋ قازاقستان ءۇشىن باستى باسىمدىق بولىپ قالا بەردى جانە يادرولىق قارۋدى جويۋ جولىنداعى جاھاندىق قوزعالىستىڭ الدىڭعى شەبىندە بولۋعا مورالدىق قۇقىق بەرە وتىرىپ, قازاق حالقىنىڭ جالپىۇلتتىق بىرتەكتىگىنىڭ اجىراماس بولىگىنە اينالدى», دەدى ديپلومات.
بۇرىنعى سىرتقى ىستەر ءمينيسترى اقمارال ارىستانبەكوۆا ءوز سوزىندە قازاقستان رەسپۋبليكاسىنىڭ تۇڭعىش پرەزيدەنتى ن.نازارباەۆتىڭ جارلىعىمەن سەمەي يادرولىق پوليگونىن جاپقان قازاقستاننىڭ تاريحي ۇلەسى, كەيىن ياقتش-عا يادرولىق ەمەس مەملەكەت رەتىندە قوسىلۋى جانە يادرولىق قارۋدان ءوز ەركىمەن باس تارتۋى تۋرالى ايتىپ, قازاقستاننىڭ بۇۇ-داعى تۇڭعىش تۇراقتى وكىلى رەتىندە ول جىلدار بويى الەم قاۋىمداستىعىنىڭ جاڭا تاۋەلسىز مەملەكەتىمىزگە كورسەتىلگەن لايىقتى قۇرمەت پەن سەنىمىنە كۋاگەر بولعانىن مالىمدەلى.
مەملەكەت جانە قوعام قايراتكەرى, ديپلومات ولجاس سۇلەيمەنوۆتىڭ الەمدەگى ءبىرىنشى يادرولىق قارۋعا قارسى «نەۆادا-سەمەي» قوزعالىسىنىڭ قۇرىلۋ تاريحى تۋرالى سوزدەرى جيىنعا قاتىسۋشىلاردىڭ ۇلكەن قىزىعۋشىلىعىن تۋدىردى.
دوڭگەلەك ۇستەل اياسىندا قاتىسۋشىلارعا سەمەي پوليگونىنداعى يادرولىق سىناقتاردىڭ زارداپتارىنا ارنالعان تاقىرىپتىق بەينەروليك كورسەتىلدى.
