بۇل تۋرالى باس پروكۋراتۋرانىڭ ءباسپاسوز قىزمەتى حابارلادى.
قاداعالاۋ ورگانى بانكتەردىڭ ازاماتتاردان ولاردىڭ نەسيەلەرى مەن قارىزدارى بويىنشا ارتىق اقشا قاراجاتىن ۇستاپ قالۋ فاكتىلەرىن انىقتادى.
ەڭبەك كودەكسىندە (115-باپ) جانە «قازاقستان رەسپۋبليكاسىندا زەينەتاقىمەن قامسىزداندىرۋ تۋرالى» زاڭىندا (23-باپ) تيەسىلى جالاقى مەن زەينەتاقى سوماسىنىڭ 50%-ىنان استامىن ءوندىرىپ الۋعا تىيىم سالىنعان.
الايدا بانكتەر (Kaspi Bank, ەۋرازيالىق بانك, قازاقستان حالىق بانكى, حوۋم كرەديت ەند فينانس بانك) ازاماتتاردىڭ شوتىنداعى اقشالاي قاراجاتتارىن بەكىتىلگەن تىيىمنان جوعارى كولەمدە ەسەپتەن شىعارعان.
مىسالى, Kaspi Bank وسكەمەن قالاسى تۇرعىنىنىڭ ەڭبەكاقى الۋعا ارنالعان بانكتىك شوتى بويىنشا «قازاقستان حالىق بانكى» اق-عا تولەم تالابىن قويعان.
وسى تالاپ تۇسكەنگە دەيىن جۇمىس بەرۋشى اليمەنت تولەمدەرى ءۇشىن ەڭبەكاقىنىڭ جارتىسىن ۇستاعان بولاتىن. ناتيجەسىندە, بارلىق ۇستالىنعان سومالاردان كەيىن ونىڭ ەسەپ ايىرىسۋ شوتىندا نەبارى 16 مىڭ تەڭگە (25%) قالعان.
سوت شەشىمىمەن تالاپكەردىڭ پايداسىنا ارتىق ۇستالعان سوما ءوندىرىلىپ الىندى, بىراق ول ءۇشىن سوت داۋلارىنا 9 اي ۋاقىت كەتتى.
وسىنداي فاكتىلەر اقتوبە, قاراعاندى, جامبىل, قوستاناي جانە سولتۇستىك قازاقستان وبلىستارىندا انىقتالدى.
«بۇل پروبلەما بانكتەردىڭ اقشالاي قاراجاتتىڭ بانكتىك شوتقا تۇسكەنگە دەيىن جۇرگىزىلگەن اتقارۋشىلىق ءىس جۇرگىزۋ بويىنشا ۇستاۋلاردان حاباردار بولماۋى سالدارىنان بولىپ وتىر. وسىنداي ارەكەتتەردىڭ ناتيجەسىندە قارىز الۋشىلار وزدەرىنىڭ جالعىز تابىس كوزىنەن زاڭسىز ايىرىلعان, بۇل حالىقتىڭ نارازىلىعىن تۋدىرۋدا», دەلىنگەن ۆەدومستۆو حابارلاماسىندا.
باس پروكۋراتۋرانىڭ ۇسىنۋى بويىنشا قارجى نارىعىن رەتتەۋ جانە دامىتۋ اگەنتتىگى اتالعان پروبلەمانى كەلەسى شارالاردى قابىلداۋ ارقىلى شەشتى:
- كليەنتتىڭ ءوتىنىشى نەگىزىندە بانكتەردىڭ جانە سوت ورىنداۋشىلارىنىڭ ارتىق تولەنگەن سومانى 5 جۇمىس كۇنى ىشىندە قايتارۋ الگوريتمى قولدانىسقا ەنگىزىلدى;
- قازاقستان بانكتەرىنىڭ بازاسى اتقارۋشىلىق ءىس جۇرگىزۋ ورگاندارىنىڭ اۆتوماتتاندىرىلعان اقپاراتتىق جۇيەسىمەن ينتەگراتسيالاندى.
اگەنتتىكتىڭ پىكىرىنشە, بۇل بانكتەرگە بارلىق كرەديتورلاردىڭ ەڭبەكاقى نەمەسە زەينەتاقىدان جالپى ۇستالىنعان سومالاردىڭ زاڭدا بەلگىلەنگەن 50%-دان اسپاۋى ءۇشىن ولاردىڭ كليەنتىنەن قانداي شەگەرىمدەر جاسالعانىن كورۋگە مۇمكىندىك بەرەدى.
