كەشە ورتالىق كوممۋنيكاتسيالار قىزمەتى مىنبەرىنەن جوعارعى سوتتىڭ قىلمىستىق ىستەر, ازاماتتىق جانە اكىمشىلىك ىستەر جونىندەگى قاداعالاۋشى سوت القالارىنىڭ توراعالارى اقىلتاي قاسىموۆ پەن ەلىس ابدىقادىروۆ ەلباسى ن.نازارباەۆتىڭ «قازاقستان جولى – 2050: ءبىر ماقسات, ءبىر مۇددە, ءبىر بولاشاق» اتتى جولداۋىنان تۋىندايتىن سوت-قۇقىقتىق ماسەلەلەرگە وراي جۋرناليستەرگە بريفينگ بەردى.
كەشە ورتالىق كوممۋنيكاتسيالار قىزمەتى مىنبەرىنەن جوعارعى سوتتىڭ قىلمىستىق ىستەر, ازاماتتىق جانە اكىمشىلىك ىستەر جونىندەگى قاداعالاۋشى سوت القالارىنىڭ توراعالارى اقىلتاي قاسىموۆ پەن ەلىس ابدىقادىروۆ ەلباسى ن.نازارباەۆتىڭ «قازاقستان جولى – 2050: ءبىر ماقسات, ءبىر مۇددە, ءبىر بولاشاق» اتتى جولداۋىنان تۋىندايتىن سوت-قۇقىقتىق ماسەلەلەرگە وراي جۋرناليستەرگە بريفينگ بەردى.
كەزدەسۋدى اشقان وكق رەسمي وكىلى التاي ابيبۋللاەۆ الدىمەن وسى اپتادا بولاتىن ماڭىزدى ساياسي شارالارعا توقتالىپ ءوتتى. وسى اپتادا قازاقستان رەسپۋبليكاسى پارلامەنتى پالاتالارىنىڭ دەپۋتاتتارى ستراسبۋرگتە وتەتىن ەۋروپا پارلامەنتتىك اسسامبلەياسى كەڭەسىنىڭ ءىس-شارالارىنا قاتىسادى, دەدى ول. ال 28 قاڭتاردا سەناتتىڭ كونستيتۋتسيالىق زاڭناما, سوت جۇيەسى جانە قۇقىق قورعاۋ ورگاندارى ءجونىندەگى كوميتەتىندە «قر تۇرمىستىق زورلىق-زومبىلىققا قارسى ءىس-قيمىل تۋرالى كەيبىر زاڭنامالىق اكتىلەرگە وزگەرىستەر مەن تولىقتىرۋلار ەنگىزۋ تۋرالى» زاڭ جوباسى قارالاتىنىن جەتكىزدى. سونىمەن قاتار, قارجى جانە بيۋدجەت جونىندەگى كوميتەتتە «وڭالتۋ جانە بانكروتتىق تۋرالى» زاڭ جوبالارى قاراستىرىلماقشى ەكەن.
ال ءماجىلىس كوميتەتتەرىندە قىلمىستىق-اتقارۋ كودەكسى مەن «مەملەكەتتىك اۋديت جانە قارجىلىق باقىلاۋ تۋرالى» زاڭ جوبالارى ءبىرىنشى وقىلىمدا قارالادى. 29 قاڭتاردا بولاتىن ءماجىلىستىڭ جالپى وتىرىسىندا ءبىرىنشى وقىلىمدا قىلمىستىق كودەكستىڭ جوباسى مەن تۇركىتىلدەس مەملەكەتتەر ىنتىماقتاستىق كەڭەسىنىڭ حاتشىلىعى تۋرالى كەلىسىمدى راتيفيكاتسيالاۋ تۋرالى زاڭ جوباسى قاراستىرىلادى.
وسىدان ءارى رەسمي وكىل ءسوزدى جوعارعى سوتتىڭ قىلمىستىق ىستەر قاداعالاۋشى سوت القاسىنىڭ توراعاسى اقىلتاي قاسىموۆقا بەردى. ەلباسى ءوزىنىڭ جولداۋىندا قوعامدا ادال باسەكەلەستىك, ادىلدىك پەن زاڭ ۇستەمدىگى جانە جوعارى قۇقىقتىق مادەنيەت ورناتۋ قاجەتتىگىن اتاپ ءوتتى. سونىڭ ىشىندە سوت جۇيەسىن ودان ءارى جەتىلدىرۋ قاجەتتىگى تۋىندايدى. الداعى ۋاقىتتاردا ەلىمىزدىڭ ەكونوميكالىق, الەۋمەتتىك سالالارىنىڭ قارقىندى دامۋىنا, الەمدە ورىن الىپ جاتقان قۇقىقتىق يننوۆاتسيالارعا ساي ۇلتتىق سوت جۇيەسى ءتيىستى دەڭگەيدە بولۋى كەرەك. وسىعان وراي بۇگىنگى كۇنى كەشەندى شارالار اتقارىلۋدا. بۇل جۇمىستاردىڭ نەگىزگى باعىتتارى 2010-2020 جىلدارعا ارنالعان قۇقىقتىق ساياسات تۇجىرىمداماسىنىڭ اياسىندا بەلگىلەنگەن, دەدى شەشەن.
ودان ءارى قىلمىستىق, قىلمىستىق ءىس جۇرگىزۋ, قىلمىستىق اتقارۋ, سونداي-اق, اكىمشىلىك قۇقىق بۇزۋشىلىق كودەكستەرىنىڭ جوبالارى ازىرلەنىپ, پارلامەنتكە ەنگىزىلگەنىن جەتكىزدى. سونىمەن بىرگە, پرەزيدەنت تاپسىرماسىنا سايكەس جوعارعى سوتتىڭ جاڭا ازاماتتىق ءىس جۇرگىزۋ كودەكسىنىڭ جوباسىن دايىنداۋعا كىرىسكەنى بەلگىلى بولدى. وسى كودەكستەر سوتتا ءىس جۇرگىزۋدىڭ ساپاسى مەن قۇقىق قورعاۋ قىزمەتىنىڭ تيىمدىلىگىن ارتتىرىپ, ادام قۇقىقتارى مەن بوستاندىقتارىنا كونستيتۋتسيالىق كەپىلدىكتەردى نىعايتادى دەگەن سەنىمدەمىز, دەدى ا.قاسىموۆ.
سوت جۇيەسىن دامىتۋ, ونىڭ جۇمىسىن ۇيىمداستىرۋدى جوعارى دەڭگەيگە جەتكىزۋ – تۇراقتى عىلىمي, كادرلىق, ماتەريالدىق-تەحنيكالىق, قارجىلىق جانە الەۋمەتتىك قامسىزداندىرۋدى تالاپ ەتەدى. سوت تورەلىگىن جۇزەگە اسىرۋدا كەڭ اۋقىمدى اقپاراتتاندىرۋدى ەنگىزۋ دە بۇگىنگى كۇننىڭ تالابى. بىزدە وسىعان قاجەتتى تەحنولوگيالار جان-جاقتى قولدانىلۋدا, دەدى شەشەن. سوت جۇيەسىن ۇزدىك كادرلارمەن جاساقتاۋ ماسەلەسىنە توقتالعاندا ول جاڭا كادر ساياساتىنىڭ تۇجىرىمداماسىن ازىرلەۋگە كىرىسكەندەرىن جانە بولاشاق سۋديالاردىڭ جەكە رەيتينگىن انىقتاۋدا قۇپيا ەلەكتروندىق ساۋالداما پراكتيكاسىن ەنگىزۋ مۇمكىندىگى قاراستىرىلىپ جاتقانىن ايتتى. سونىمەن قاتار, سۋديالار جۇكتەمەسىنىڭ وتە كوپ ەكەندىگىنە وراي جاڭادان 450 بىرلىك سۋديالىق ورىندار اشىلعاندىعى ايتىلدى.
القا توراعاسىنىڭ ايتۋىنا قاراعاندا, قازاقستاننىڭ سوتتارى 2013 جىلى 1 ملن.-نان استام ارىز-شاعىم مەن ىستەر قاراعان. بۇل 2012 جىلمەن سالىستىرعاندا 14 پايىزعا ارتىق ەكەن. ودان ءارى شەشەن اعىمداعى جىلدىڭ ءبىرىنشى توقسانىندا سوتتار مەن بۇقارالىق اقپارات قۇرالدارىنىڭ اراسىنداعى ءوزارا ءىس-قيمىلداردىڭ تۇجىرىمداماسى ازىرلەنەتىنىن جەتكىزدى. ازاماتتاردىڭ سوت جۇيەسىنە دەگەن پىكىرلەرى جانە ولاردىڭ زاڭعا دەگەن قۇرمەتتەرى كوبىنە ماسس-مەديانىڭ جۇمىسىمەن مازمۇندالادى, دەپ اتاپ كورسەتتى ا.قاسىموۆ ءوز سوزىندە. وسىعان وراي سۋديالار وداعى قازاقستاننىڭ جۋرناليستەر وداعىمەن جانە «ءادىل ءسوز» حالىقارالىق قورىمەن بىرلەسىپ, اعىمداعى جىلى رەسپۋبليكا بويىنشا سوت قىزمەتىن جاريالاپ, تانىستىرۋعا ارنالعان كونكۋرس ۇيىمداستىرىپ وتىر, دەدى ول. ءسوزىنىڭ قورىتىندىسىندا ا.قاسىموۆ بۇگىنگى مۇمكىندىكتى پايدالانا وتىرىپ, جۋرناليستەردى وسى ماسەلە بويىنشا سىندارلى ىنتىماقتاستىققا شاقىردى.
وسىدان كەيىن جوعارعى سوتتىڭ القا توراعالارى جۋرناليستەردىڭ كوپتەگەن سۇراقتارىنا جاۋاپ بەردى.
جاقسىباي سامرات,
«ەگەمەن قازاقستان».
