دۇنيەجۇزىلىك دودانىڭ اشىلۋ سالتاناتىندا قۇتقارۋشى سپورتشىلار جامبىل وبلىسىندا جارىلىس سالدارىنان قازا تاپقانداردى ءبىر مينۋت ۇنسىزدىكپەن ەسكە الدى. ءىس-شاراعا قاتىسقان مارتەبەلى مەيمانداردىڭ قاتارىندا حالىقارالىق ءورت سوندىرۋشىلەر مەن قۇتقارۋشىلار سپورت فەدەراتسياسىنىڭ پرەزيدەنتى, بەلارۋس رەسپۋبليكاسىنىڭ توتەنشە جاعدايلار ءمينيسترى ۆاديم سينياۆسكي, رەسەي فەدەراتسياسىنىڭ ازاماتتىق قورعانىس, توتەنشە جاعدايلار جانە تابيعي اپاتتاردىڭ سالدارىن جويۋ ءمينيسترىنىڭ ءبىرىنشى ورىنباسارى الەكساندر چۋپريان بولدى.
جالپى, ءورت سوندىرۋشىلەر مەن قۇتقارۋشىلاردىڭ حالىقارالىق سپورت فەدەراتسياسى جانە قازاقستان رەسپۋبليكاسىنىڭ توتەنشە جاعدايلار مينيسترلىگى ۇيىمداستىرعان جارىستىڭ پاندەمياعا بايلانىستى سانيتارلىق-كارانتيندىك تالاپتاردى ساقتاي وتىرىپ, كورەرمەنسىز وتكەنىن ايتا كەتكەن ءلازىم.
الەم چەمپيوناتىنا دۇنيە ءجۇزىنىڭ ون ەلىنەن, اتاپ ايتقاندا, رەسەي, بەلارۋس, سلوۆاكيا, پولشا, سەنەگال, چەحيا, وزبەكستان, موڭعوليا, اۋستريا جانە قازاقستاننان 10 ەرلەر جانە 5 ايەلدەر كومانداسى قاتىسىپ, جۇلدەلەردى ساراپقا سالدى.
ايتا كەتۋ كەرەك, قاراعاندى ءدال وسىنداي دەڭگەيدەگى جارىستى وتكىزگەن قازاقستاننىڭ ەكىنشى قالاسى. ەلىمىزدىڭ توتەنشە جاعدايلار ءمينيسترى يۋري يلين كەنشىلەر استاناسىنىڭ كەزدەيسوق تاڭدالماعانىن ايتادى. ونىڭ پىكىرىنشە, قولايلى لوگيستيكاعا جانە ستاندارتتارعا سايكەس ستاديوننىڭ بولۋى تاڭداۋدىڭ ءدال وسى قالاعا تۇسۋىنە تىكەلەي اسەر ەتىپتى. ويتكەنى چەمپيوناتتى اشىق اسپان استىندا وتكىزۋ قاجەت بولعان ەكەن.
جارىستى ۇيىمداستىرۋشىلار ستاديوندا قاجەتتى بازا دايىنداپ, دودانىڭ جوعارى دەڭگەيدە وتۋىنە بارىنشا جاعداي جاساعان. قاتىسۋشىلارعا ىڭعايلى بولۋ ءۇشىن كيىم شەشەتىن شاتىرلار, فۋدكورت ورناتىلدى. قازاق حالقىنىڭ ۇلتتىق سالت-داستۇرىمەن تانىسۋ ماقساتىندا ارنايى ەتنو-اۋىل قۇرىلعانىن ايتا كەتۋ كەرەك. بۇدان بولەك, چەمپيوناتتىڭ اشىلۋى اياسىندا اپاتتىق-قۇتقارۋ تەحنيكاسى مەن جابدىقتارىنىڭ كورمەسى ءوتىپ, وندا وتاندىق ونىمدەر دە كەلۋشىلەر نازارىنا كەڭىنەن ۇسىنىلدى.
الەم چەمپيوناتىنىڭ دوداسى وقۋ مۇناراسىنىڭ ءتورتىنشى قاباتىنىڭ تەرەزەسىنە شابۋىل ساتىسىمەن كوتەرىلۋ, 100 مەترلىك كەدەرگىلەر جولاعىنان ءوتۋ, جاۋىنگەرلىك قانات جايۋ جانە 100 مەتردەن ءتورت ءورت ەستافەتاسى سىنى بويىنشا ءوتتى.
جارىس قورىتىندىسىندا بەلارۋس قۇراماسى جالپىكوماندالىق ەسەپتە ايەلدەر جانە ەرلەر اراسىندا الەم چەمپيونى اتاندى. ەكىنشى جۇلدە رەسەي كومانداسىنا بۇيىرسا, قولا جۇلدەنى چەحيا قۇراماسى قاناعات تۇتتى. ال قازاقستاننىڭ ەرلەر كومانداسى جاۋىنگەرلىك قانات جايۋ جارىسىندا چەمپيون اتاندى.
ءتۋرنيردىڭ جەڭىمپازدارى مەن جۇلدەگەرلەرى ارنايى كۋبوكتاردان بولەك مەدالدارمەن, ديپلومدارمەن جانە باعالى سىيلىقتارمەن ماراپاتتالدى. كەلەسى الەم چەمپيوناتى وزبەكستاننىڭ سامارقاند قالاسىندا وتەتىن بولدى. وسىعان وراي, جارىستىڭ جابىلۋىندا قازاقستان قۇراماسى وزبەكستانداعى ارىپتەستەرىنە ءورت سوندىرۋشىلەر مەن قۇتقارۋشىلاردىڭ حالىقارالىق سپورت فەدەراتسياسىنىڭ تۋىن تابىس ەتتى.
قاراعاندى
