باسىلىمنىڭ جاۋاپتى رەداكتورى حالىقارالىق جانە ايماقتىق ىنتىماقتاستىق عىلىمي-زەرتتەۋ ينستيتۋتى ديرەكتورى بولات سۇلتانوۆ وقىرماندار نازارىنا ۇسىنىلىپ وتىرعان جيناقتى قازاقستان – نەمىس ۋنيۆەرسيتەتىنىڭ حالىقارالىق جانە ايماقتىق ىنتىماقتاستىق عىلىمي-زەرتتەۋ ينستيتۋتى تاراپىنان ازىرلەپ, جارىققا شىعارعانىن, بيزنەس جوبا ەمەس ەكەنىن, ساتۋعا دا ارنالماعانىن ەسكەرتتى.
بولات قىلىشباي ۇلىنىڭ اتاپ وتۋىنشە, كونستيتۋتسيادا ەلىمىزدى باسقارۋدىڭ پرەزيدەنتتىك فورماسى بەكىتىلگەن. تۇرىك كوشباسشىسى ەردوعان ەلىندە پارلامەنتتىك رەسپۋبليكادان پرەزيدەنتتىك رەسپۋبليكاعا كوشۋدى جۇزەگە اسىرعانىن ەسكە تۇسىرگەن بولات قىلىشباي ۇلى قىرعىزستاندا دا رەسپۋبليكا پرەزيدەنتتىكپەن پارلامەنتتىككە, ودان كەيىن قايتادان پرەزيدەنتتىككە ترانسفورماتسيا جاسالعانىن جينالعانداردىڭ قاپەرىنە سالىپ ءوتتى.
«بۇل مىسالدار كۇردەلى ساياسي جاعدايدا مىقتى پرەزيدەنتتىك بيلىك جانە سوعان وراي پرەزيدەنتتىڭ حالىق پەن مەملەكەت الدىنداعى جەكە جاۋاپكەرشىلىگى ىشكى ساياسي اۋالدى تۇراقتاندىرۋعا ءارى ەلدىڭ وڭىرەگىندەگى سىرتقى ساياسي جاعدايدى تۇبەگەيلى وزگەرتۋگە مۇمكىندىك بەرەتىندىگىن دالەلدەيدى», دەيدى بولات سۇلتانوۆ.
ايتا كەتسەك, اتالمىش كىتاپتىڭ تانىستىرىلىمى بولات قىلىشباي ۇلىنىڭ 70 جىلدىق مەرەيلى جاسىنا تۋرا كەلدى.
سىرتقى ىستەر مينيسترلىگىنىڭ الماتى قالاسى وكىلدىگىنىڭ جەتەكشىسى اسقار شوقىباەۆ ديپلومات, تاريحشى ءھام ساياساتتانۋشىنى مەرەيلى جاسىمەن قۇتتىقتادى.
