كوميسسيا شەشىمىمەن «بولاشاق» حالىقارالىق ستيپەندياسى ماگيستراتۋرا, دوكتورانتۋرا, رەزيدەنتۋرا بويىنشا وقيتىن, سونداي-اق الەمنىڭ جەتەكشى عىلىمي جانە وندىرىستىك ورتالىقتارىنا تاعىلىمدامادان وتۋگە جىبەرىلەتىن 196 قازاقستاندىققا بەرىلدى.
وتىرىستا ءبىلىم جانە عىلىم ءمينيسترى اسحات ايماعامبەتوۆتىڭ شەتەلدە كادرلار دايارلاۋ جونىندەگى رەسپۋبليكالىق كوميسسيانىڭ حاتتامالىق تاپسىرمالارىنىڭ ورىندالۋى تۋرالى ەسەبى تىڭدالىپ, «بولاشاق» حالىقارالىق ستيپەندياسىن ىسكە اسىرۋعا قاتىستى بىرقاتار ماسەلەلەر قارالدى.
2021 جىلى «بولاشاق» باعدارلاماسى بويىنشا وقۋعا بارلىعى 1055 ستيپەنديا ءبولىندى. ونىڭ ىشىندە 555 ستيپەنديا ماگيستراتۋرا, رەزيدەنتۋرا, دوكتورانتۋرا, تاعىلىمداما باعدارلامالارى بويىنشا بولىنگەن. تاعى 500 ستيپەنديا «عالىمدار» تاعىلىمداماسىنىڭ جاڭا ساناتى بويىنشا ءبولىندى. بۇل سانات پرەزيدەنت قاسىم-جومارت توقاەۆتىڭ تاپسىرماسىنا سايكەس الەمنىڭ جەتەكشى عىلىمي ورتالىقتارىندا جىل سايىن 500 عالىمنىڭ تاعىلىمدامادان ءوتۋىن قامتاماسىز ەتۋ ماقساتىندا بەكىتىلگەن.
«بولاشاق» حالىقارالىق ستيپەندياسىن تاعايىنداۋ كونكۋرسىنا قاتىسۋ ءۇشىن قۇجاتتاردى قابىلداۋ اعىمداعى جىلعى 4 مامىردان باستاپ 28 قازانعا دەيىن جالعاسادى.
وتىرىس قورىتىندىسى بويىنشا قىرىمبەك كوشەرباەۆ بىرقاتار ناقتى تاپسىرمالار بەردى.
