ەۋرازيالىق مەديا فورۋمى «Samruk-Kazyna Trust» قورىنىڭ قولداۋىمەن وتەدى. ءىس-شارادا «ۇەۇ جانە الەۋمەتتىك ستوريتەللينگ ءۇشىن بەينەماتەريالدار جاساۋ», «سىني ويلاۋ نەلىكتەن سونشالىقتى ماڭىزدى؟» «بولاشاقتى قالاي باسقارۋعا بولادى؟», «باق اۋديتورياسى – ءوزارا ءىس-قيمىل فورماتتارى», «Digital me: الەۋمەتتىك جەلىلەردە وتىرۋ ادەتىنەن ارىلىپ AI جانە سينگۋليارلىققا كىرۋگە دەيىن» جانە «الەۋمەتتىك ماركەتينگ» سياقتى تاقىرىپتار تالدانادى.
ء«بىز كوممەرتسيالىق ەمەس ۇيىمداردىڭ وكىلدەرى, جۋرناليستەر, جۋرناليستيكا فاكۋلتەتتەرىنىڭ ستۋدەنتتەرى مەن باسقا دا مۇددەلى ماماندار فورۋمنىڭ شەبەرلىك كلاستارىنا ونلاين قاتىسادى دەپ كۇتەمىز. اتالمىش شەبەرلىك كلاستارىنىڭ كۇن ءتارتىبىن قازاقستاندىق اۋديتورياعا ارناپ, ولار مەديا سالاسىنداعى سوڭعى ترەندتەر جايلى حاباردار بولۋى جانە زاماناۋي قۇرالداردى جۇمىستا پايدالانا الۋى ءۇشىن ىڭعايلاپ جاسادىق», دەدى «Samruk-Kazyna Trust» الەۋمەتتىك جوبالاردى دامىتۋ قورىنىڭ وكىلى ميراس ىرگەباەۆ.
فورۋم اياسىندا «تۇركى تىلدەس ەلدەردىڭ بۇقارالىق اقپاراتتىق قۇرالدارى. جاڭا شىنايىلىق جاعدايىندا ىنتىماقتاستىقتى دامىتۋ», «جاڭا بەتبۇرىس: اۋعانستانداعى وقيعالاردىڭ ورتالىق ازيا ايماعىنا اسەرى قانداي بولۋى مۇمكىن؟» جانە ت.ب. وزەكتى تاقىرىپتار تالقىلانادى.
«دوڭگەلەك ۇستەلگە بۇل تاقىرىپتاردى قوسۋعا «تاليبان» راديكالدى قوزعالىسى اۋعانستاننىڭ بۇكىل اۋماعىنا باقىلاۋ ورناتقانىن جاريالاعان 15 تامىزداعى وقيعالار تۇرتكى بولدى. ەل تاريحىنىڭ قايتىپ ورالماستاي وزگەرىسكە قالاي ۇشىراپ جاتقانىن دۇنيە ءجۇزى دەمىن ىشىنە تارتا باقىلاپ وتىر. ءبىز بۇل ماسەلەدەن قالىس قالماي, ورتالىق ازيا ايماعىندا ورىن الىپ جاتقان وسى وقيعالاردى تالقىعا سالۋ ءۇشىن ساراپشىلار شاقىردىق», دەدى ەامف باس ديرەكتورى الماگۇل احمەتجانوۆا.
دوڭگەلەك ۇستەلدىڭ سپيكەرلەرى ازيا زەرتتەۋلەرى ينستيتۋتىنىڭ ديرەكتورى سۇلتان اكىمبەكوۆ, وزبەكستاننان «Ma’no» زەرتتەۋ باستامالارى ورتالىعىنىڭ ديرەكتورى باحتيار ەرگاشەۆ, اقش-تاعى پاكىستاننىڭ بۇرىنعى ەلشىسى جانە گۋدزون ينستيتۋتىنىڭ وڭتۇستىك جانە ورتالىق ازيا بويىنشا اعا عىلىمي قىزمەتكەرى جانە ديرەكتورى حۋسەين حاككاني, تاجىكستاننان ساياسي عىلىمدار كانديداتى سايميدين ميرزوەۆ بولادى.
دوڭگەلەك ۇستەلدىڭ مودەراتورى - قازاقستاندىق ديپلومات, تاريح عىلىمدارىىنڭ كانديداتى, نۇرسۇلتان نازارباەۆ قورىنىڭ حالىقارالىق باعدارلامالار ورتالىعىنىڭ باسشىسى قايرات ابۋسەيىتوۆ.
ەامف-2021 كورەرمەندەرىن «قازاقستان تاۋەلسىزدىگىنىڭ 30 جىلدىعىنا ارنالعان سەسسيا», «پاندەميا الەمدى قالاي وزگەرتتى جانە جاھاندىق ءومىر ءسۇرۋدىڭ جاڭا باعىتتارىن قالاي انىقتادى؟!», «اقپارات كوپ – شىندىق از», «جاسىل ستراتەگيا. تاعى ءبىر سوڭعى مۇمكىندىك», «اشۋشاڭدىق ءداۋىرى. الەمدى بيلەپ تۇرعان كىم؟», «مەديا جانە تەحنولوگيالار. 2021 ترەندتەرى», «ەڭبەك نارىعىنىڭ بولاشاعى جانە ءبىلىم», «ورىندالعان كەلەشەك الەمى» تاقىرىبىندا 8 سەسسيا كۇتەدى.
