وسىعان وراي پرەزيدەنتىمىز قاسىم-جومارت توقاەۆتىڭ تاپسىرماسىنا سايكەس ەلىمىزدە پرەزيدەنتتىك جاستار كادر رەزەرۆىنە ىرىكتەۋ جۇرگىزىلىپ كەلەدى. بۇل جوبانىڭ باستى ماقساتى – قوعام مۇددەلەرىن باسشىلىققا الاتىن جانە ماڭىزى زور ءارى ءتيىمدى رەفورمالاردى ىسكە اسىرا الاتىن جاس تالانتتاردىڭ الەۋەتىن ءتيىمدى پايدالانۋ.
رەزەرۆكە ىرىكتەۋ بارىسىن بارىنشا اشىق جانە ءادىل وتكىزۋ ماقساتىندا قازاقستان رەسپۋبليكاسىنىڭ پرەزيدەنتى جانىنداعى جاستار كادر رەزەرۆى بويىنشا ۇلتتىق كوميسسيا رەزەرۆكە ىرىكتەۋدىڭ ارنايى ءتارتىبى مەن جوسپارىن بەكىتتى. وسىعان سايكەس كانديداتتاردى ىرىكتەۋ اعىمداعى جىلدىڭ 1 قىركۇيەگىنەن باستالىپ, ناتيجەسىندە 50 رەزەرۆشى ىرىكتەلەتىن بولادى.
ىرىكتەۋگە 35 جاستان اسپاعان, جوعارى ءبىلىمدى, كەم دەگەندە 5 جىل ەڭبەك ءوتىلى بار قازاقستان رەسپۋبليكاسىنىڭ ازاماتتارى قاتىسا الادى. 2019 جىلى ۇيىمداستىرىلعان ىرىكتەۋگە قاراعاندا, بۇل جولى كادرلاردى ىرىكتەۋ پروتسەسى تالاپ ەتىلگەن بىلىمدەردى, داعدىلار مەن قابىلەتتەردى عانا ەمەس, سونىمەن قاتار كانديداتتاردىڭ شىنايى ماقساتتارى مەن قۇندىلىقتارىن انىقتاۋعا باعىتتالعان. ىرىكتەۋ بارىسىندا كانديداتتاردىڭ كۇردەلى ساندىق جانە ماتىندىك اقپاراتپەن جۇمىس ىستەۋ, سيتۋاتسيالىق تاپسىرمالاردى شەشۋ قابىلەتتەرى باعالانىپ, قۇرىلىمدالعان مىنەز-ق ۇلىق سۇحباتى ۇيىمداستىرىلادى. سونىمەن قاتار اسسەسسمەنت-ورتالىعى ارقىلى كانديداتتاردىڭ جاڭا فورماتسيا كوشباسشىلارىنا ءتان ستراتەگيالىق ويلاۋ, قىزمەتتى باسقارۋ, بەلسەندىلىك سياقتى قاسيەتتەرىنە باعا بەرىلەدى.
ەلى مەن جەرىنىڭ كوركەيۋىنە پەرزەنتتىك ۇلەسىن قوسقىسى كەلەتىن تاڭداۋلى جاستاردىڭ قاتارىنا كىرەم دەۋشى ازاماتتاردىڭ قۇجاتتارىن قابىلداۋ 1-30 قىركۇيەك ارالىعىندا ارنايى pkrezerv.gov.kz ونلاين-پلاتفورماسىندا ىسكە اسىرىلاتىن بولادى. رەزەرۆكە ىرىكتەۋ تۋرالى سوڭعى شەشىم جاستار كادر رەزەرۆى بويىنشا ۇلتتىق كوميسسيامەن قابىلداناتىن بولادى. رەزەرۆتىڭ قۇرامىنا كىرگەن مامان 3 جىل ىشىندە مەملەكەتتىك لاۋازىمعا تاعايىندالۋعا قۇقىلى.
ءوزىنىڭ كەلەشەگىن كۇنى بۇرىن ويلايتىن مەملەكەت الدىمەن جاس ازاماتتاردىڭ قابىلەت-قارىمىن شىڭداپ, ءتيىستى دارەجەدە كوڭىل بولەتىنى تۇسىنىكتى. وسىنداي جاستاردى مەملەكەتتىك باسقارۋ اپپاراتىنا كوبىرەك جۇمىلدىرۋ قاجەت, سەبەبى ولاردىڭ ويلارى ۇشقىر, كوزقاراستارى قالىپتاسقان, الەمدىك تەندەنتسيالاردى جاقسى تۇسىنەدى.
پرەزيدەنتتىك جاستار كادر رەزەرۆى – جاس بۋىن وكىلدەرىنىڭ جاۋاپتى قىزمەتكە كەلۋى ءۇشىن جاسالىپ وتىرعان يگى باستاما. بۇل جوعارى لاۋازىمدى قىزمەتكە ورنالاسۋ عانا ەمەس, ۇلت ءۇشىن, ەل ءۇشىن, حالىق ءۇشىن ايانباي تەر توگۋ دەگەن ءسوز.
بۇل جوبانىڭ تيىمدىلىگىن العاشقى ىرىكتەۋدەن بايقاۋعا بولادى. رەزەرۆكە كىرگەن 300 ازاماتتىڭ ىشىندە 106 ادام جەكە سەكتوردان, 98 ادام كۆازيمەملەكەتتىك سەكتوردان, 96 ادام مەملەكەتتىك قىزمەت جۇيەسىنەن بولدى. بۇگىنگى تاڭدا ولاردىڭ 184-ءى نەمەسە 60%-ى جۇمىسقا ورنالاسىپ, ەلىمىزدىڭ ءتۇرلى سەكتورلارىندا ەڭبەك ەتۋدە.
مەملەكەت باسشىسى قاسىم-جومارت توقاەۆ ءوزىنىڭ «تاۋەلسىزدىك بارىنەن قىمبات» اتتى ماقالاسىندا: «دارىندى جاستاردى باسشىلاردىڭ جاڭا بۋىنىن دايارلاۋعا بارىنشا تارتىپ جاتىرمىز. مەنىڭ باستاماممەن قۇرىلعان پرەزيدەنتتىك كادر رەزەرۆى – وسىنىڭ ايقىن دالەلى. جوبانىڭ كەلەسى كەزەڭىندە قوعام مۇددەسىنە ادال كوشباسشىلاردى ىرىكتەۋگە ەرەكشە نازار اۋدارامىز. بيلىك ورگاندارىنداعى ازاماتتار, ەڭ الدىمەن, ۇلتتىق مۇددەگە بەرىك بولۋعا ءتيىس», دەپ اتاپ ءوتتى. بۇل سوزبەن كەلىسپەۋگە بولمايدى, سەبەبى ەلىمىزگە ۇلتتىق مۇددەنى تەرەڭ سەزىنەتىن جاستار كەرەك.
پرەزيدەنت ايتقانداي, جاستار – تىڭ يدەيالاردىڭ قاينار كوزى, وڭ وزگەرىستەردىڭ قوزعاۋشى كۇشى. سوندىقتان وسكەلەڭ ۇرپاقتىڭ وسىنداي الەۋەتىن دۇرىس ارناعا باعىتتاپ, ءتيىمدى پايدالانۋ قاجەت. ءبىلىمدى ءارى بىلىكتى جاس مامانداردىڭ ورتاق مۇددە ءۇشىن توپتاساتىن, ۇلتتى بيىككە جەتەلەپ, جاڭاشا دامۋعا باستايتىن ماڭىزدى ءارى جاۋاپتى ءسات كەلدى...
بەرگەن بەسپالينوۆ,
مەملەكەتتىك قىزمەت ىستەرى اگەنتتىگى اقمولا وبلىسى بويىنشا دەپارتامەنتىنىڭ باسشىسى,
ادەپ جونىندەگى كەڭەس توراعاسى
