تاراز قالاسىنداعى تەمىرجول وتكەلىندە «جەدەل جاردەم» مەن تەپلوۆوز سوقتىعىستى. ناتيجەسىندە ءۇش ادام زارداپ شەكتى. بۇل تۋرالى Ras. kz حابارلادى.
«تارازداعى تەمىرجول وتكەلى ۇستىندە «جەدەل جاردەم» ماشيناسى مەن تەپلوۆوز سوعىسىپ قالىپ, ءۇش ادام زارداپ شەكتى», – دەلىنگەن توتەنشە جاعدايلار مينيسترلىگى ءباسپاسوز قىزمەتىنىڭ دۇيسەنبى كۇنگى حابارلاماسىندا.
جول-كولىك وقيعاسى جەكسەنبى كۇنى تۇندە بولعان.
«جول-كولىك وقيعاسىنىڭ ناتيجەسىندە «جەدەل جاردەم» كولىگىنىڭ جۇرگىزۋشىسى مەن ونىڭ ەكى جولاۋشىسى: 23 جاسار فەلدشەر مەن 29 جاستاعى ايەل ءارتۇرلى دەنە جاراقاتىمەن اۋرۋحاناعا جاتقىزىلدى», – دەپ اتاپ وتىلگەن حابارلامادا.
اتالمىش وقيعا پويىزدار قوزعالىسىنا كەدەرگى كەلتىرگەن جوق.
حاميت مۇستافا.
دەرەككوز: Ras.kz.
فوتو: Ras.kz.
