كوروناۆيرۋس • 06 قىركۇيەك، 2021

جامبىلداعى ۆاكتسينا زاۋىتى جۇمىس ىستەپ تۇر ما؟

جامبىل وبلىسىنداعى ۆاكتسينا ءوندىرۋ زاۋىتىنىڭ بۇگىنگى جۇمىسى تۋرالى بيولوگيالىق قاۋىپسىزدىك پروبلەمالارىنىڭ عىلىمي-زەرتتەۋ ينستيتۋتىنىڭ باس ديرەكتورى، كوروناۆيرۋسقا قارسى QazVac قازاقستاندىق ۆاكتسينانىڭ اۆتورى كۇنسۇلۋ زاكاريا ايتىپ بەردى، دەپ حابارلايدى Egemen.kz.

دانا مىرزاقادىر

«زاۋىت جۇمىسىنا قاتىستى سۇراق ءجيى قويىلادى. بۇگىندە جامبىل وبلىسىنداعى ۆاكتسينا زاۋىتىنىڭ تەستىلەۋ رەجىمىندە جۇمىس ىستەپ تۇرعانىنا 2 اي بولدى. شىلدە دە ۆاليداتسيالىق پروتسەستەر باستالدى. ول دەگەنىمىز زاۋىتتىڭ تەحنيكالىق تۇرعىدان ءوندىرىس تالاپتارىنا ساي جۇمىس ىستەۋى. ياعني كاسىپورىنداعى بارلىق قىزمەت تەحنيكالىق تالاپتارعا ساي جۇمىس ىستەۋى ءتيىس. زاۋىتتىڭ حالىقارالىق سەرتيفيكات الۋى ءۇشىن ۋاقىت پەن كوپ ەڭبەك تالاپ ەتىلىپ وتىر. بۇگىندە GMP ۇلتتىق سەرتيفيكاتىن الدىق، ەندى حالىقارالىق سەرتيفيكاتتى الۋ كەرەك»، دەدى كۇنسۇلۋ زاكاريا وكق-دە وتكەن ءباسپاسوز ءماسليحاتىندا.

بۇعان دەيىن ينستيتۋت باسشىسى وتاندىق QazVac ۆاكتسينانى ءۇش كەزەڭ بويىنشا كلينيكالىق زەرتتەۋدىڭ اياقتالعانىن ءمالىم ەتتى.

«بۇگىندە ءۇشىنشى كەزەڭ بويىنشا بارلىق كلينيكالىق زەرتتەۋ اياقتالىپ، 9 شىلدە كۇنى سوڭعى تالداۋ ناتيجەسى الىندى. شىلدەنىڭ سوڭىنا دەيىن تالداۋ ناتيجەسى تاعى ءبىر وڭدەلىپ، مالىمەتتەردىڭ ستاتيستيكاسى جاسالدى. بۇل جۇمىسقا 3 مىڭ ادام قاتىسىپ وتىر. سونداي-اق، شىلدەنىڭ سوڭىندا كلينيكالىق زەرتتەۋدىڭ قورىتىندى ەسەبى ازىرلەندى. قازىرگى كۇنى قورىتىندى ەسەپ دارىلىك زاتتار مەن مەديتسينالىق بۇيىمداردى ساراپتاۋ ۇلتتىق ورتالىعىنىڭ ساراپتاۋىنان ءوتىپ جاتىر، ونىڭ ناتيجەسى ءالى كەلگەن جوق. دەگەنمەن ءبىزدىڭ ازىرلەگەن ەسەپكە قاراپ، العاش وتاندىق ۆاكتسينانى كلينيكالىق زەرتتەۋ ءساتتى جۇرگىزىلدى دەپ ايتۋعا بولادى»، دەدى ول.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز