Sarap ەكسپەرتتىك كلۋبىنىڭ وتىرىسىندا مەملەكەت باسشىسى قاسىم-جومارت توقاەۆتىڭ پاندەميادان كەيىنگى كەزەڭدە مەملەكەتتى ودان ءارى دامىتۋعا, دەنساۋلىق ساقتاۋ, ءبىلىم بەرۋ جۇيەسىنىڭ تيىمدىلىگىن ارتتىرۋعا, وڭىرلىك اتقارۋشى بيلىكتىڭ باسقارۋ تەتىكتەرىن جەتىلدىرۋگە, ساياسي جاڭعىرتۋعا, ادام قۇقىقتارىن قورعاۋعا قاتىستى جانە باسقا دا ماسەلەلەرگە قاتىستى جولداۋدا كوتەرىلگەن باستامالارى تالقىلاندى.
وتىرىس بارىسىندا «رۋحاني جاڭعىرۋ» قازاقستاندىق قوعامدىق دامۋ ينستيتۋتى باسقارما توراعاسى اسىلبەك ەسەنباەۆ بيىلعى جولداۋدا مەملەكەتتىك بيلىك اپپاراتىنىڭ ازاماتتارمەن ءوزارا ءىس-قيمىلىنىڭ قولجەتىمدىلىگى مەن تۇسىنىستىگىن قامتاماسىز ەتۋ بويىنشا ناقتى حابارلار بار ەكەنىن اتاپ ءوتتى.
«بۇل تەك قانا قارىم-قاتىناس پەن «حالىق ۇنىنە قۇلاق اساتىن مەملەكەت» تۇجىرىمداماسى تۋرالى عانا ەمەس, سونىمەن بىرگە «ەڭ الدىمەن ازامات» قاعيداسى تۋرالى. قاراپايىم ازاماتتار ءۇشىن قولجەتىمدىلىك پەن قاراپايىمدىلىق ءبىرىنشى ورىندا بولۋى كەرەك. ماسەلەن, تۇرعىن ءۇي سالاسىنداعى باعدارلامالاردىڭ كوپتىگى سونشا, ولاردى شاتاستىرۋ وڭاي. وسى جولداۋدا «وتباسى بانكىنىڭ» الدىنا ء«بىر تەرەزە» قاعيداتى بويىنشا ازاماتتارمەن ءوزارا ءىس-قيمىلدى قامتاماسىز ەتۋ مىندەتى قويىلىپ وتىر», دەدى ا.ەسەنباەۆ.
ال ساياسي شولۋشى عازيز ابىشەۆ مەملەكەتتىك بيۋدجەتتىڭ كىرىس بولىگى ەلدىڭ مۇناي قورلارىنا بايلانباۋى ءتيىس دەگەن پىكىر ءبىلدىردى.
«ەكونوميكا جايىندا جولداۋدا نەگە بۇلاي ايتىلعانىن تۇسىنەمىن. بۇكىل الەم سوڭعى جيىرما جىل ىشىندە تسيفرلى تەحنولوگيالاردى, باعدارلامالىق قامتاماسىز ەتۋدى, ۇشاقتاردى, اسپاپتاردى, فارماتسەۆتيكانى دامىتا وتىرىپ, مۇناي باعاسىنان دا قىمبات دۇنيەلەردى شىعارۋدا. سوندىقتان مەنىڭ ويىمشا, مۇناي باررەلىنە 100 دوللاردان اسىپ جاتسا دا, بۇل ءبىزدىڭ ەلىمىزگە ۇزاق مەرزىمدى باعالىق ساپادا قۇندى قور بەرمەيدى», دەدى ول.
ءوز كەزەگىندە پرەزيدەنت جانىنداعى قازاقستاننىڭ ستراتەگيالىق زەرتتەۋلەر ينستيتۋتىنىڭ ساراپشىسى ينديرا رىستينا مەملەكەت باسشىسىنىڭ بيىلعى جولداۋىنىڭ ءبىر ەرەكشەلىگى, ونى تەك قۇجات رەتىندە عانا ەمەس, سونىمەن قاتار بۇكىل ۇكىمەتتىڭ جۇمىسىن جوسپارلاۋدىڭ, جوبالاۋدىڭ ستراتەگيالىق قۇرالى رەتىندە دە قاراستىرۋعا بولادى دەگەن پىكىرىن ءبىلدىردى.
«جولداۋدا «حالىق ۇنىنە قۇلاق اساتىن مەملەكەت» تۇجىرىمداماسىنىڭ وزەكتىلىگىن اشاتىن ساياسي جاڭعىرتۋ بويىنشا بىرنەشە ۇسىنىس بولدى. سونىڭ ءبىرى – جەرگىلىكتى اتقارۋشى بيلىكتىڭ جۇمىس ساپاسىن زەرتتەۋ ماقساتىندا الەۋمەتتىك ساۋالدامالاردى ەنگىزۋ. اتالعان زەرتتەۋ جۇمىستارىن تاۋەلسىز ۇيىمدار جۇرگىزۋى ءتيىس. بۇل – مەنىڭ ويىمشا, حالىق ءۇنىن ەستۋدىڭ ەنگىزىلىپ جاتقان جاڭا ءبىر تەتىگى», دەپ اتاپ ءوتتى قسزي ساراپشىسى.
ساراپشى ءلاززات نۇرقاتوۆا جولداۋدا ايتىلعان «كاسىبي بىلىكتىلىك تۋرالى» جاڭا زاڭدى قابىلداۋدىڭ وزەكتىلىگىنە توقتالدى.
«جاڭا ۋاقىت بارلىق مامانعا جانە ولاردىڭ قۇزىرەتتەرىنە جاڭا تالاپتار قويىپ جاتىر. كاسىبي ماسەلەلەردى شەشۋ ءۇشىن بۇگىندە ادامنىڭ كوللەدجدە نەمەسە ۋنيۆەرسيتەتتە الاتىن ءبىلىم دەڭگەيى جەتكىلىكسىز ەكەنى انىق. مۇنداي زاڭنىڭ قابىلدانۋى كاسىبي ماماندار قاۋىمداستىعىن ءوزىن ءوزى دامىتۋعا ىنتالاندىرادى جانە بارلىق جاستاعى تۇرعىندار اراسىندا Lifelong learning قاعيداتىن قالىپتاستىرۋعا ىقپال ەتەدى», دەدى ل.نۇرقاتوۆا.
Sarap كلۋبىنىڭ وتىرىسىندا ءسوز سويلەگەن قازاق تەحنولوگيا جانە بيزنەس ۋنيۆەرسيتەتىنىڭ دەكانى الماگۇل نۇرعاليەۆا جولداۋدا ودان ءارى ەكونوميكالىق دامۋدىڭ ناقتى پەرسپەكتيۆالارى ايقىندالعانىن تىلگە تيەك ەتتى.
«ەكونوميكا ءبىر ورىندا تۇرمايدى, ول ارقاشان قوزعالىستا. نارىققا ءارتۇرلى بولجاۋعا قيىن فاكتورلار اسەر ەتۋى مۇمكىن, مىسالى, پاندەميا. بۇل جەردە ەكونوميستەر تاراپىنان دامۋدىڭ ناقتى ستسەناريلەرى قاجەت, وسى ماسەلەلەردى شەشۋدىڭ عىلىمي ءادىس-ءتاسىلىن دە قاراستىرۋ قاجەت», دەپ اتاپ ءوتتى ول.
ساياساتتانۋشى سامات نۇرتازا جولداۋدىڭ اۋىزسۋدى ۇنەمدەۋ, سۋ رەسۋرستارىن پايدالانۋ بولاشاقتا ماڭىزدى ماسەلە بولاتىنىن العا تارتتى.
«راسىندا سۋ ماسەلەسى – جەر شارىنداعى بولاشاقتا كۇن تارتىبىندە ءبىرىنشى بولاتىن تاقىرىپ. ءبىزدىڭ ەلىمىزدىڭ جاعدايىندا ەل ىشىندەگى بارلىق وزەندەر باسقا مەملەكەتتەردىڭ تەرريتورياسىنان اعىپ كەلەدى, بۇل جونىندە ترانسشەكارالىق سۋلار جونىندەگى كەلىسىم كەرەك. اۋىزسۋدى ۇنەمدەۋدى بۇگىننەن باستاۋ كەرەك», دەدى ول.
جالپى, «رۋحاني جاڭعىرۋ» قازاقستاندىق قوعامدىق دامۋ ينستيتۋتىنىڭ Sarap ەكسپەرتتىك كلۋبىنىڭ قاتىسۋشىلارى, مەملەكەت باسشىسىنىڭ بيىلعى جولداۋى ءومىردىڭ بارلىق سالالارىنا اسەر ەتەتىنىن جانە قازاقستاندىقتاردىڭ ءال-اۋقاتىن جاقسارتۋ بويىنشا بىرقاتار ناقتى كەشەندى ءىس-قيمىلدار جۇيەسى ۇسىنىلىپ وتىرعانىن اتاپ ءوتتى.
