وكم وپەراتورى ءباسپاسوز قىزمەتىنىڭ حابارلاۋىنشا, جىل باسىنان بەرى وتاندىق كاسىپكەرلەر 67 166 توننا قايتالاما شيكىزاتتى جيناپ, كادەگە جاراتۋعا جىبەردى. ونىڭ ىشىندە 51 287 توننا ماكۋلاتۋرا, 5 307 توننا پلاستيك جانە 10 572 توننا شىنى قاپتاما قالدىقتارى جينالدى. EcoQolday جۇيەسىندە بارلىعى 4 130 ءوتىنىم پىسىقتالدى. ناتيجەسىندە, جىل باسىنان بەرى قاپتاما قالدىعىن جيناۋشىلارعا بەرىلگەن وتەماقى مولشەرى 1, 507 ملرد تەڭگەنى قۇرادى. ال كادەگە جاراتۋ زاۋىتتارىنا – 152,6 ملن تەڭگە, تاسىمالداۋدى سۋبسيديالاۋعا 365 ملن تەڭگە بەرىلدى. قايتا وڭدەۋ سالاسىنداعى ءوسۋ ءۇردىسى نەگىزىنەن EcoQolday تسيفرلى جۇيەسىنىڭ ىسكە قوسىلعاندىعىمەن تىكەلەي بايلانىستى. سونىڭ ناتيجەسىندە قايتالاما شيكىزاتتى جيناۋ تاريفتەرى كوتەرىلىپ, تاسىمالداۋ شىعىندارىن ءىشىنارا وتەۋ مۇمكىندىگى پايدا بولدى. ەسoQoldaý جوباسى – قاپتاما قالدىقتارىن (ماكۋلاتۋرا, پلاستيك جانە شىنى) جيناۋ, وڭدەۋ, تاسىمالداۋ جانە كادەگە جاراتۋ باعىتىندا جۇمىس ىستەپ تۇرعان كاسىپكەرلەرگە جانە ءوز بيزنەسىن باستاعىسى كەلەتىندەرگە ارنالعان پلاتفورما.
قازىرگى ۋاقىتتا EcoQolday جۇيەسىندە 670 قاتىسۋشى تىركەلىپ وتىر. ونىڭ ىشىندە قاپتاما قالدىقتاردى جيناۋدى جۇزەگە اسىراتىن 158 كاسىپكەر, 481 تاسىمالداۋشى جانە 31 قايتالاما شيكىزاتتى كادەگە جاراتۋشى ۇيىم جۇمىس ىستەۋدە.
2021 جىلى 230 مىڭ توننا كولەمىندە قايتالاما شيكىزاتتى جيناۋ, قايتا وڭدەۋ, تاسىمالداۋ جانە كادەگە جاراتۋ جوسپارى بار. وسى جۇمىستاردى جۇزەگە اسىرۋعا وكم وپەراتورى بيىل 13 ملرد تەڭگە قارجى قاراستىرعان.
ەل ىشىندە ماكۋلاتۋرا, پلاستيك جانە شىنى قاپتاما قالدىقتارىن جيناۋ كولەمىن ارتتىرۋ ماقساتىندا وكم وپەراتورى EcoQolday HOME جوباسىن ىسكە قوستى. كوپ پاتەرلى تۇرعىن ۇيلەردىڭ نەمەسە جەكە سەكتوردىڭ تۇرعىندارى پيك/پيب ارقىلى جينالعان شيكىزاتتى ساتۋدى جۇزەگە اسىرا الادى. قالدىقتاردى ساۋدالاۋدان تۇسكەن قاراجاتتى تۇرعىن ءۇي كەشەنىن جوندەۋگە نەمەسە اۋلانى اباتتاندىرۋعا باعىتتاۋعا بولادى. وكم وپەراتورىنىڭ وڭىرلەردە قاتتى تۇرمىستىق قالدىقتاردى بولەك جيناۋ ينفراقۇرىلىمىن دامىتۋ جانە ەل ىشىندە قايتالاما شيكىزاتتى قابىلداۋ بەكەتتەرىن كوبەيتۋ جوسپارى بار. ايتا كەتۋ كەرەك, 31 تامىزدا سەمەي قالاسىندا العاشقى قالدىقتى اقشاعا قابىلدايتىن بەكەتتەر ىسكە قوسىلدى. ەندىگى كەزەكتە وسكەمەن, اقتوبە جانە قاراعاندى وبلىستارى تۇر.
