ادامداردىڭ سۋداعى قاۋىپسىزدىگىن قامتاماسىز ەتۋ ماقساتىندا تجم بارلىق دەڭگەيدەگى ورتالىق جانە جەرگىلىكتى اتقارۋشى ورگاندارمەن ءوزارا ءىس-قيمىل جاساي وتىرىپ, سۋدا توتەنشە جاعدايلاردىڭ تۋىنداۋ قاۋپىن ازايتۋ بويىنشا الدىن الا ۇيىمداستىرۋشىلىق جانە پراكتيكالىق ءىس-شارالار كەشەنىن دايىنداپ ۇزدىكسىز وتكىزدى.
«شومىلۋعا رۇقسات ەتىلگەن 538 ورىن انىقتالدى, بۇل وتكەن جىلمەن سالىستىرعاندا 93 ورىنعا كوپ. تجم جەرگىلىكتى اتقارۋشى ورگاندارمەن جانە جەكە مەنشىك وبەكتىلەرمەن بىرلەسىپ 454 قۇتقارۋ جانە 66 مەديتسينالىق بەكەتتەر قۇردى. اسا قاۋىپتى ۋچاسكەلەردە 59 ءموبيلدى قۇتقارۋ بەكەتتەرى قويىلدى. سۋ ايدىندارىندا 6655 قاۋىپسىزدىك بەلگىلەرى مەن 1656 اقپاراتتىق ستەندتەر ورناتىلدى, وندا ادامداردىڭ قازا بولۋ سەبەپتەرى مەن وقيعالارعا ىقپال ەتكەن جاعدايلار كورسەتىلگەن. حالىق اراسىندا 1 ملن 139 مىڭ 935 دانا ۇگىت ءونىمى (بۋكلەتتەر, پاراقشالار) تاراتىلدى, حالىقپەن 5314 جيىن وتكىزىلدى. جەرگىلىكتى اتقارۋشى ورگاندارمەن ءوزارا ءىس-قيمىلدا 32085 بالا جۇزۋگە ۇيرەتىلدى. الدىن الۋ جۇمىستارىنا 17943 ۆولونتەر تارتىلدى», دەپ جازادى تجم ءباسپاسوز قىزمەتى.
اقبتك-ءنىڭ 440-بابى «قوعامدىق ورىنداردا بولۋ ەرەجەلەرىن بۇزۋ» بويىنشا 4788 ادام اكىمشىلىك جاۋاپكەرشىلىككە تارتىلدى, سونداي-اق اقبتك-ءنىڭ 364-بابى «ورتاق سۋ پايدالانۋ قاعيدالارىن بۇزۋ» بويىنشا 5781 ادامعا ەسكەرتۋ جاسالىپ, 172 ادامعا ايىپپۇل سالىندى.
اعىمداعى جىلى سۋ ايدىندارىندا ادام ءولىمىنىڭ الدىن الۋدىڭ جاڭا ادىستەرى قولدانىلدى. اۆياتسيالىق جانە تەمىرجول كولىگىنىڭ مۋلتيمەديالىق جابدىقتارى سۋ ايدىندارىنداعى قاۋىپسىزدىك ەرەجەلەرىن ساقتاۋ بويىنشا ۇگىت-ناسيحات ونىمدەرىن تاراتۋ ءۇشىن پايدالانىلدى.
«2Gis» كارتوگرافيالىق پلاتفورماسىندا ەلىمىزدىڭ بارلىق وڭىرلەرىندە سۋ ايدىندارىندا شومىلۋعا تىيىم سالىنعان جانە رۇقسات ەتىلگەن ورىنداردىڭ دەرەكتەرى ورنالاستىرىلعان. الايدا, تجم مەن مەملەكەتتىك ورگاندار قابىلداعان شارالارعا قاراماستان, شومىلۋ ماۋسىمى كەزەڭىندە سۋ ايدىندارىندا قاراپايىم قاۋىپسىزدىك ەرەجەلەرىن ساقتاماعاندىقتان 319 ادام, ونىڭ ىشىندە 95 كامەلەتكە تولماعان ادام سۋعا كەتتى.
سۋ ايدىندارىندا بالالاردىڭ قازا بولۋ جاعدايلارىنىڭ 82%-ىندا بالالار اتا-انالارىنىڭ قاراۋىنسىز بولدى. قازا بولۋدىڭ نەگىزگى سەبەپتەرى ءوز كۇشتەرىن جەتە باعالاماۋ - 170 جاعداي, ماس كۇيىندە شومىلۋ – 73 جاعداي, سۋ ايدىنىنا قۇلاۋ – 68 جاعداي, جۇزە الماۋ - 34 جاعداي, بالىق اۋلاۋ كەزىندە قاۋىپسىزدىك قاعيدالارىن بۇزۋ – 24 جاعداي, سۋعا باتۋشىلاردى قۇتقارۋ كەزىندە – 13 جاعداي جانە ءجۇزۋ قۇرالدارىن پايدالانۋ كەزىندە قاۋىپسىزدىك قاعيدالارىن بۇزۋ – 8 جاعداي بولىپ تابىلادى.
سۋعا شومىلۋ ماۋسىمىنىڭ اياقتالۋىنا قاراماستان, قۇتقارۋشىلار سۋ ايدىندارىندا ادامداردىڭ ءولىمىن الدىن الۋ بويىنشا پروفيلاكتيكالىق جۇمىستى جالعاستىرۋدا.
