تەحنولوگيا • 03 قىركۇيەك، 2021

قازاقستان GovTech تسيفرلاندىرۋدىڭ پلاتفورمالىق مودەلىنە كوشەدى

54 رەت كورسەتىلدى

بۇگىن شىعىس ەكونوميكالىق فورۋمى اياسىندا قر پرەمەر-ءمينيسترى اسقار مامين مەن سبەر كومپانيالار توبىنىڭ باسشىسى گەرمان گرەف قازاقستان رەسپۋبليكاسىنىڭ تسيفرلىق ترانسفورماتسياسى، تسيفرلاندىرۋدىڭ پلاتفورمالىق مودەلىنە جانە «Data-Driven Government» تۇجىرىمداماسىنا كوشۋ جونىندەگى جوبالاردى ىسكە اسىرۋ سالاسىنداعى ىنتىماقتاستىق تۋرالى مەموراندۋمعا قول قويدى، دەپ حابارلايدى Egemen.kz.

قر ۇكىمەتى ءباسپاسوز قىزمەتىنىڭ حابارلاۋىنشا، قول قويۋ ءراسىمى قر پرەزيدەنتى قاسىم-جومارت توقاەۆ پەن رف پرەزيدەنتى ۆلاديمير ءپۋتيننىڭ قاتىسۋىمەن بەينەكونفەرەنتسيا بايلانىسى فورماتىندا ءوتتى.

قۇجات قازاقستاندا GovTech تسيفرلىق پلاتفورماسىن ەنگىزۋ، دەرەكتەردى تالداۋ جانە جاساندى زەردە بويىنشا پراكتيكالاردى قولدانا وتىرىپ، مەملەكەتتىك باسقارۋدىڭ رەينجينيرينگى جانە تسيفرلىق ترانسفورماتسيالاۋ بويىنشا ىنتىماقتاستىقتى دامىتۋدىڭ نەگىزگى تاسىلدەرىن كوزدەيدى. تسيفرلىق ارحيتەكتۋرانىڭ پلاتفورمالىق مودەلى حالىققا مەملەكەتتىك قىزمەت كورسەتۋدىڭ جىلدامدىعى مەن تيىمدىلىگىن ارتتىرۋعا جول اشادى.

«بۇل جوبا مەملەكەتتەرىمىزدىڭ ءوزارا سەنىمىنىڭ بەلگىسىن تاعى ءبىر ايقىنداي تۇسەدى. 15 جىلدان استام ۋاقىت ءبىزدىڭ نارىقتا تابىستى جۇمىس ىستەپ كەلە جاتقان سبەر-ءدىڭ قازاقستاندىق مەمتەحتىڭ ينستيتۋتسيونالدىق نەگىزىن قالىپتاستىرۋعا اتسالىسۋى قازاقستان مەن رەسەي اراسىنداعى ىنتىماقتاستىقتى زياتكەرلىك تەحنولوگيا سياقتى اسا ماڭىزدى سالا ارقىلى جان-جاقتى ەتە تۇسەدى. شىن مانىندە، بۇل وتە ماڭىزدى قادام»، دەدى قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ.

مەملەكەت باسشىسى وسى ستراتەگيالىق جوبانى ىسكە اسىرۋ قازاقستان ازاماتتارىنىڭ تۇرمىس ساپاسىن ارتتىرۋعا جانە بيزنەس احۋالدى جاقسارتۋعا ىقپال ەتەتىنىن ايتتى.

رەسەي فەدەراتسياسىنىڭ پرەزيدەنتى ۆلاديمير پۋتين ءوز سوزىندە قر ۇكىمەتى مەن سبەر كومپانيالار توبى اراسىنداعى قۇجاتقا قول قويۋ ەكى ەلدىڭ بارلىق سالاداعى، سونىڭ ىشىندە تسيفرلاندىرۋداعى ىنتىماقتاستىعىنىڭ جوعارى دەڭگەيىنىڭ تاعى ءبىر دالەلى ەكەنىن اتاپ ءوتتى.

 

 

سوڭعى جاڭالىقتار

ۇقساس جاڭالىقتار