وتكەن جىلدىڭ قوڭىر كۇزىندە بولعان بۇل وقيعا ءدۇيىم جۇرتشىلىقتى ءدۇر سىلكىندىرگەن ەدى. ءجاسوسپىرىم قىز جانسايانى زورلاپ, قورلاپ ولتىرگەن بەلگىسىز بىرەۋدىڭ قىلمىستىق ارەكەتى كوپشىلىكتىڭ اشۋ-ىزاسىن تۋدىردى. وسى وقيعاعا قاتىستى قوزعالعان قىلمىستىق ءىس كوپ ۇزاماي اشىلىپ, سوتتا قارالعان بولاتىن.
وتكەن جىلدىڭ قوڭىر كۇزىندە بولعان بۇل وقيعا ءدۇيىم جۇرتشىلىقتى ءدۇر سىلكىندىرگەن ەدى. ءجاسوسپىرىم قىز جانسايانى زورلاپ, قورلاپ ولتىرگەن بەلگىسىز بىرەۋدىڭ قىلمىستىق ارەكەتى كوپشىلىكتىڭ اشۋ-ىزاسىن تۋدىردى. وسى وقيعاعا قاتىستى قوزعالعان قىلمىستىق ءىس كوپ ۇزاماي اشىلىپ, سوتتا قارالعان بولاتىن.
جانسايا ەسەنباەۆا الماتى وبلىسى, قاراساي اۋدانىنداعى ۇشقوڭىر اۋىلىندا ورنالاسقان قاراساي باتىر اتىنداعى ورتا مەكتەپتىڭ 4-سىنىبىندا وقيتىن. ول 24 قىركۇيەك كۇنى تاڭەرتەڭ ساباققا كەتكەن. كەستە بويىنشا ساعات ون ەكى جارىمدا ساباق اياقتالۋى ءتيىس بولاتىن. بىراق جانسايا ول ۋاقىتتا ۇيگە ورالمادى. قىزىنىڭ كەشىككەنىنەن سەكەم العان اناسى ونى ىزدەپ مەكتەپكە كەلەدى. بىراق جانسايا وقۋ ورنىندا بولماي شىقتى. قۇربىسىنىڭ ۇيىنە كەتكەن شىعار دەگەن ويمەن اناسى جانسايانىڭ سىنىپتاسى اسەلدىڭ ۇيىنە كەلەدى. جانسايا بۇل ۇيدە دە بولماي شىعادى. ءجاسوسپىرىم قىزدى ىزدەۋ كەشكە دەيىن سوزىلادى. بىراق ناتيجە شىقپايدى. شاراسىز شەشە قىزىنىڭ ۇشتى-كۇيلى جوعالعانى تۋرالى پوليتسياعا ارىز تۇسىرەدى. قىركۇيەكتىڭ 24-ءشى جۇلدىزىندا جوعالعان جانسايانىڭ جانسىز دەنەسى قازاننىڭ 2-ءشى جۇلدىزىندا تابىلادى. بۇل قىلمىسقا سەزىكتى رەتىندە بەگالى سادىقوۆ دەگەن ازامات قاماۋعا الىنادى.
بەگالى سادىقوۆ قىركۇيەك ايىنىڭ 14-ءشى جۇلدىزىندا كەشكى ساعات التىلار شاماسىندا قاراساي اۋدانىنداعى كەمەرتوعان اۋىلىندا تۇراتىن تانىسى ج.شوراباەۆتىڭ ۇيىنە كەلىپ, ونىمەن بىرگە ىشىمدىك ءىشىپ, سول ۇيدە ۇيىقتاپ قالعان. تۇنگى ساعات ەكىلەر شاماسىندا اۋلاعا شىعىپ, كورشى ە.قاسىمباەۆتىڭ ەسىگىنىڭ الدىندا دارەت سىندىرادى. ونى كورگەن ە.قاسىمباەۆ بەگالىنىڭ قىلىعىن بەتىنە باسىپ, ۇيالتۋعا تىرىسادى. شالا ماس سادىقوۆ ءۇي يەسىمەن جاعالاسا كەتەدى. سول ەكى ارادا ج.شوراباەۆ بۇلاردى اجىراتىپ جىبەرەدى. ۇيگە كىرىپ كەتكەن بەگالى قولىنا پىشاق الىپ, قايتا شىعىپ, ونى قاسىمباەۆقا سىلتەيدى. وعان دەنە جاراقاتىن سالىپ, وقيعا بولعان جەردەن بوي تاسالاپ كەتەدى. ە.قاسىمباەۆ العان دەنە جاراقاتى سالدارىنان اۋرۋحاناعا تۇسەدى.
جاساعان قىلمىسىنا قاراماستان جازاسىز قالعان ب.سادىقوۆ سول كەتكەننەن مول كەتىپ, اراق ءىشۋىن جالعاستىرادى. جاسوسپىرىم قىز جانساياعا قاتىستى قىلمىستى جاساعان كۇنى, ياعني قىركۇيەك ايىنىڭ 24-ءشى جۇلدىزىندا ۇشقوڭىر اۋىلىنا كەلىپ, ءسپيرتتى ىشىمدىك ءىشىپ جۇرگەن. تۇسكى مەزگىلدە ول وتەگەن باتىر كوشەسىندەگى مەكتەپتىڭ جانىندا جانسايانى كورەدى. وسى كەزدە وعان ءجاسوسپىرىم قىزدى زورلاۋعا باعىتتالعان قىلمىستىق وي تۋىندايدى. جانسايانىڭ ارتىنان ءجۇرىپ وتىرعان بەگالى ءبىر مەزەتتە ونىمەن قاتارلاسادى. وعان قولىنداعى «سنيكەرس» شوكولادىن ۇسىنادى. اڭعال قىز شوكولادتى الادى. ءجاسوسپىرىمنىڭ اڭقاۋلىعىن پايدالانعان اككى قىلمىسكەر وتەگەن باتىر كوشەسىندەگى 49-ءۇيدىڭ جانىندا قاراۋسىز قالعان ۋچاسكەنىڭ قورشاۋىنا الىپ كەلەدى. سول جەردە ب.سادىقوۆ جانسايانىڭ دارمەنسىز كۇيىن پايدالانىپ, ونىڭ قارسىلىق كورسەتە المايتىنىن سەزىنىپ, ونى زورلاۋ ماقساتىندا كۇش قولدانىپ, باسىنا قاتتى سوققى جاسايدى. بۇل سوققىدان ەسەنباەۆا ەسىنەن تانىپ قۇلاعان. ب.سادىقوۆ جەردە جاتقان وعان اسا قاتىگەزدىكپەن جىنىستىق قاتىناس جاسايدى. ناپسىقۇمار حايۋان بۇل ارەكەتتەرىمەن دە توقتاماي, تالىپ جاتقان قىزدى ءوزىنىڭ كولگوتكيىمەن بۋىندىرىپ ولتىرگەن. كوزى قاراۋىتقان پەدوفيلدىڭ بۇعان دا ايىزى قانباي, ءوزىنىڭ قالتاسىنداعى قىرىنۋعا ارنالعان ۇستارانىڭ جۇزىمەن جانسايانىڭ ءمايىتىنىڭ قارىن قۋىسىن كەسىپ, ءولى دەنەنى قورلاعان.
سوتتالۋشى ب.سادىقوۆ وزىنە تاعىلعان ايىپتى تولىعىمەن مويىنداعان جوق. العاشقى قىلمىسى بويىنشا تاعىلعان ايىپتى دا مويىندامادى. ول قاسىمباەۆقا ەشقانداي جاراقات سالماعانىن, ەشكىمگە پىشاق سىلتەمەگەنىن ايتادى. سونداي-اق, جابىرلەنۋشى ج.ەسەنباەۆاعا قاتىستى قىلمىس بويىنشا تاعىلعان ايىپتاردى دا تولىعىمەن مويىندامادى. ب.سادىقوۆ وقيعا بولعان كۇنى, ياعني 24 قىركۇيەكتە قاسكەلەڭ قالاسىنداعى ناركولوگ دارىگەرگە بارىپ, ەم قابىلداعانىن, تۇستە ۇيىنە كەلىپ, دەمالعانىن ايتادى. ال الدىن الا تەرگەۋ كەزىندە پوليتسيا قىزمەتكەرلەرىنىڭ قىسىمىمەن جانە ولاردىڭ ۇيرەتۋىمەن بۇكىل قىلمىستى موينىما الىپ ەدىم دەيدى.
دەگەنمەن, سۋديا رەتىندە مەن بۇل قىلمىستىق ءىستى قاراۋ كەزىندە ب.سادىقوۆتىڭ جاۋاپتارىنا سىن كوزبەن قارادىم. ول قىلمىستىق جاۋاپكەرشىلىكتەن جالتارۋ ماقساتىندا جالعان جاۋاپ بەرىپ وتىرعانىن ءتۇسىندىم. ونىڭ اتالعان قىلمىستاردى جاساعانى باستى سوت تالقىلاۋىندا ايعاقتار جيىنتىعىمەن تولىق دالەلدەندى. الدىن الا تەرگەۋ بارىسىندا سەزىكتى رەتىندە سۇرالعان ب.سادىقوۆ جابىرلەنۋشىلەر ە.قاسىمباەۆ پەن ج.ەسەنباەۆاعا قاتىستى قىلمىستار بويىنشا كىناسىن تولىعىمەن مويىنداپ, جاساعان قىلمىستارى جونىندە تۇگەلدەي بايانداپ, ءوز جاۋاپتارىن وقيعا ورنىندا ناقتىلاپ بەرگەن.
قاراساي اۋداندىق ىشكى ىستەر باسقارماسىنىڭ تەرگەۋشىسى ا.قاشاقباەۆتىڭ قاۋلىسى نەگىزىندە جابىرلەنۋشى ج.ەسەنباەۆانىڭ كيىمدەرىنە زەرتتەۋ جۇرگىزۋ تاپسىرىلعان. وسى زاتتاردى زەرتتەۋ باستالعان كەزدە تەرگەۋشى قاشاقباەۆ قوسىمشا سالىستىرۋ ساراپتاماسىن تاعايىنداپ, سەزىكتى ب.سادىقوۆتىڭ كيىمدەرىن ۇسىنعان. جۇرگىزىلگەن كريميناليستيكالىق زەرتتەۋلەر ءناتيجەسىندە جابىرلەنۋشى ج.ەسەنباەۆانىڭ كيىمدەرىندە سەزىكتى ب.سادىقوۆتىڭ كيىمدەرىندە بار تالشىقتار انىقتالعان. سونداي-اق, سادىقوۆتىڭ كيىمدەرىندە ج.ەسەنباەۆانىڭ كيىمدەرىنە جاتاتىن تالشىقتار تابىلعان.
سوتتالۋشى ب.سادىقوۆ جانە ونىڭ قورعاۋشىسىنىڭ ۋاجدەرى سوت تالقىلاۋ كەزىندە تولىعىمەن تەكسەرىلىپ, ولار نەگىزسىز بولىپ, سوت وتىرىسىندا زەرتتەلگەن دالەلدەرمەن جوققا شىعارىلدى. سوتتالۋشىعا جازا مولشەرىمەن ونىڭ ءتۇرىن تاعايىنداعان كەزدە سوت سوتتالۋشى ب.سادىقوۆتىڭ قىلمىستىق جاۋاپتىلىعى مەن جازاسىن جەڭىلدەتەتىن ءمان-جايلار تاپپادى. جاسالعان قىلمىستىڭ قوعامدىق قاۋىپتىلىك دارەجەسىن ەسكەرە وتىرىپ, سوتتالۋشىعا ۇزاق مەرزىمگە باس بوستاندىعىنان ايىرۋ جازاسىن تاعايىنداۋ قاجەتتىگى تۋىندادى. سوت بەگالى سادىقوۆتى قازاقستان رەسپۋبليكاسى قىلمىستىق كودەكسىنىڭ 257-بابىنىڭ 3-بولىگى, 120-بابىنىڭ 4-بولىگى, 121-بابىنىڭ 4-بولىگى, 96-بابىنىڭ 2-بولىگى «ۆ, ك, و» تارماقتارىمەن جانە 275-بابىنىڭ 1-بولىگىمەن كىنالى دەپ تانىلدى. قر قىلمىستىق كودەكسىنىڭ 58-بابى 4-بولىگىنىڭ نەگىزىندە قىلمىستار جيىنتىعى بويىنشا جازالاردى ءىشىنارا قوسىپ, وعان تۇپكىلىكتى 24 جىل مەرزىمگە باس بوستاندىعىنان ايىرۋعا ۇكىم شىعاردىم.
وسى ءبىر اسا اۋىر قىلمىستىق ءىستى قاراۋ, وعان جازا تاعايىنداۋ سۋديا رەتىندە ماعان وڭاي بولا قويعان جوق. سوتتالۋشى ب.سادىقوۆتىڭ اككىلىگى سونشا, تەرگەۋ بارىسىندا مويىنداعان كىناسىن سوت تالقىلاۋى كەزىندە ءتۇرلى بۇلتالاققا سالعىسى كەلدى, ءوزىن تەرگەۋشىلەردەن قىسىم كورگەن بەيشارا ەتىپ كورسەتۋگە دە تىرىستى. بىراق, ونىڭ حايۋاندىق ارەكەتى بۇلتارتپاس ايعاقتارمەن دالەلدەندى. ناتيجەسىندە, جاساعان قىلمىسىنا قاراي جازاسىن الدى.
اسقاربەك بەيىمبەتوۆ,
الماتى وبلىسىنىڭ قىلمىستىق ىستەر جونىندەگى
مامانداندىرىلعان اۋدانارالىق سوتىنىڭ سۋدياسى.
