وبلىستا ورفاندى اۋرۋلارعا شالدىققان التى بالا تۇرادى. بالعىنداردىڭ ءبىرىن قىمبات ءدارى-دارمەكپەن قامتاماسىز ەتۋ مىندەتىن «ومىرگە سەن» قورى ءوز موينىنا الاتىن بولدى.
ءماسليحات وتىرىسىندا وبلىستىق بيۋدجەت دەنساۋلىق ساقتاۋ باسقارماسىنا 544,5 ملن تەڭگە اۋداراتىنى تۋرالى ايتىلدى. ورتاق شەشىم بويىنشا سيرەك كەزدەسەتىن ءارى تۇقىم قۋالايتىن اۋىر دەرتپەن اۋىراتىن بالالارعا قاجەت «ەتەپليرسەن» جانە «نۋسينەرسەن» دارىلەرىن ساتىپ الۋعا 451,3 ملن تەڭگە ءبولىندى. وبلىستىق دەنساۋلىق ساقتاۋ باسقارماسى باسشىسىنىڭ مىندەتىن اتقارۋشى رۇستەم ايتباەۆتىڭ سوزىنشە, قوماقتى قارجىعا ساتىلىپ الىناتىن بۇل ەكى ءدارى تەگىن مەديتسينالىق كومەكتىڭ كەپىلدەندىرىلگەن ساناتىنا ەنبەيدى.
ءبىز بۇعان دەيىن دەنساۋلىق ساقتاۋ مينيسترلىگىنە بىرنەشە رەت حات جىبەرىپ, قازاقستان رەسپۋبليكاسى ازاماتتارىنا تەگىن بەرىلەتىن ءدارى-دارمەك تىزبەسىن كەڭەيتۋدى سۇراعان ەدىك. الايدا وعان ءالى جاۋاپ العان جوقپىز. الداعى جىلى بۇل ماسەلە ءوز شەشىمىن تابار دەگەن ۇمىتتەمىز», دەدى ر.ايتباەۆ.
وبلىستىق ەكونوميكا جانە بيۋدجەتتىك جوسپارلاۋ باسقارماسى باسشىسىنىڭ مىندەتىن اتقارۋشى جاننا شايماردانوۆانىڭ ايتۋىنشا, قالعان 93,2 ملن تەڭگە كوروناۆيرۋس جۇقتىرعان ناۋقاستارعا ارنالعان 30 اپپارات ساتىپ الۋعا جۇمسالادى. قۇرىلعىلار ساتىپ الىنعان سوڭ, 12 ەمدەۋ مەكەمەسىنە ۇلەستىرىلىپ بەرىلەدى.
قوستاناي وبلىسى
