عالامتور – قۋانىشتا قۇتتىقتاۋ الاڭى, قايعىدا قازالى شاڭىراق, دوسى جوققا – سىرلاس, جالعىزعا – مۇڭداس, ۇشى-قيىرى جوق ايتىس جارمەڭكەسى سەكىلدى. ونداعى بازاردان وڭايلىقپەن شىعا المايسىز. سوندىقتان بولار كەيىنگى كەزدەرى ۆيرتۋالدى ءومىر مەن شىنايى الەمنىڭ اراسىندا مەڭىرەۋ كۇي كەشكەندەر كوبەيدى. ءتىپتى سودان قاتتى سوققى الىپ ەسەڭگىرەگەندەر دە, ۆيرتۋالدى ساعىمعا الدانىپ سۇرىنگەندەر دە بار. كۇيبەڭ تىرشىلىكتى الەۋمەتتىك جەلىمەن باعامداپ, ءومىرىن ينتەرنەتپەن ولشەپ, وزىنە قول سالعانداردى دا كوز كوردى. مۇنداي ازاپتى وقيعالاردىڭ كەيىنگى كەزدە جيىلەپ كەتكەنى كوڭىلگە قاياۋ تۇسىرەدى. الەۋمەتتىك جەلىدە, اسىرەسە فەيسبۋك كۇنتىزبەسىندە كۇن سايىن ءبىر وزەكتى تاقىرىپقا بايلانادى. قوعامداعى دۇربەلەڭ ەلدىڭ تالقىسىنا ءتۇسىپ, اڭگىمەگە وزەك بولادى. وسىدان بىرنەشە جىل بۇرىن سونداي ءبىر وقيعاعا كۋا بولعان ەدىك.
فەيسبۋك جەلىسىندە تاعى ءبىر «دوستىق» ۇسىنعان حات كەلىپ ءتۇستى. اتى ەسىمدە قالماسا دا, تەگىنىڭ سليانوۆا ەكەنى سانامدا قاتتالىپ قالىپتى. تىرلىگىنە ءتۇزۋ, جەكە كاسىپ اشىپ, جولى بولعانداردىڭ قاتارىندا ەكەن. ايتەۋىر بار جۇمىسىنا ۇلگەرىپ, ۇنەمى بەلسەندى بولىپ جۇرەتىن. ءتىپتى ءبىز ەندى ويانىپ جاتقاندا, ول قىز وتباسىنا ارناپ دايىنداعان تاڭعى استىڭ فوتوسىمەن ءبولىسىپ جاتادى. ول ول ما, ءبىز اپتىعا جۇمىسقا بارا جاتقاندا ول يوگا جاتتىعۋىنان كەلە جاتقانىن ايتىپ, جازبا قالدىرادى. ءتۇن اۋعاندا ءتۇرلى تاتتىلەر دايىنداپ جاتادى, سودان تابىس تاۋىپ وتىرعانىن دا اڭدايمىز. جاقسى كولىك, قىمبات مەيرامحانالار, ءتۇرلى ويىن-ساۋىققا بارىپ, ءوزى كورىنبەيتىن ۆيدەولاردى دا ءجيى جۇكتەيتىن. جەلىدەگى دوستىعىمىز ەكى جىلعا سوزىلدى, سول ۋاقىت ارالىعىندا ونىڭ ءبىر كۇن دە بوس وتىرعانىن بايقاماپپىن.
ەڭبەكتەنىپ ءجۇرىپ اناسىنا ۇلكەن ءۇي سالىپ جاتقانىن دا سۇيىنشىلەگەن. كەيىنىرەك سول ۇيگە كوشىپ جاتقانىن دا جازعان-دى... جىگىتىنىڭ ءسوز سالىپ, ۇيلەنۋ تويىنىڭ دا ەستەلىكتەرىمەن بولىسكەن. ايتسە دە سول فوتوسۋرەتتەردەن ءوزىنىڭ دە, ومىرلىك جارىنىڭ دا ءتۇرىن كورە المادىق. «باقىت تىنىشتىقتى سۇيەدىنىڭ» كەرى مە دەپ, جاقسىلىققا جورىعانبىز. سول ساتتە ول قىزعا قىزىعا قاراماعان ادام از ەدى. كەيىن جەكەدە سويلەسىپ تۇردىق. كەزدەسىپ, جۇزبە-ءجۇز جولىعايىق دەگەنىمىزگە ءتۇرلى سىلتاۋ ايتقان سوڭ, ول تاقىرىپقا قايتا ورالماعانبىز.
ءبىر كۇنى جەلى ىشىندە ۇلكەن داۋ تۋدى. ايتەۋىر, كىمگە جاقپاي قالعانىن قايدام, سليانوۆا سونداي ءبىر تارتىسقا تاپ بولدى دا, باسى داۋدان ارىلماي قويدى. كەز كەلگەن «جاۋىن» جانشىپ تاستاۋعا ءازىر جەلىدەگى جۇرت ونىڭ ارتىنا ءتۇستى دەرسىڭ. ايىبىن دا تاپتى. ونىڭ بىرنەشە جىل جەلىگە جاريالاپ, دوستارىن حاباردار ەتكەن كەرەمەت ءومىرى وتىرىك بولىپ شىققان. كولىگى, ءۇيى, ىستەيتىن جۇمىسى, بيزنەسى, پىسىرەتىن ءتاتتى توقاشىنا دەيىن فەيك ەكەنى جۇرتقا جاريا بولدى. ءسويتىپ سليانوۆا جەلىدەن جوعالدى. جەردەن جەتى قويان تاپقانداي جارىسا جازعان جۇرت جەڭىسكە جەتكەنىنە جەلپىنىپ, كوپ ۇزاماي تاعى ءبىر قويىرتپاقتىڭ سوڭىنان ىلەستى. جەلىنىڭ قۇدىرەتى سول, قانداي جاعداي بولسىن تەز تانىلىپ, تەز ۇمىتىلاسىڭ. سلياموۆانىڭ ەندىگى ءومىرى بىزگە بەيمالىم. تەك تاڭعالدىراتىنى يلليۋزيا ومىرگە باس سۇعىپ, ءوز قيالىنا شىرمالعانى. ال ەڭ وكىنىشتىسى ءدال قازىر مۇنداي جانداردىڭ قوعامدا قاپتاپ جۇرگەنى...
بۇل كوزبەن كورگەن جالقى جاعداي ەمەس. دەسە دە كوبىمىزگە ساباق بولماي كەلەدى. جالعان وبرازدا ءومىر ءسۇرۋ كۇندەلىكتى تىرشىلىگىمىزگە ەسكەرتپەي-اق ەنىپ كەتتى. قوعامدا «سليانوۆا سيندرومىنا» شالدىققانداردىڭ قاتارى سيرەر ەمەس. كوز كورىپ جۇرگەننەن كەيىن كوڭىلگە باتادى. ارينە, اركىم نە ىستەسە دە ءوز يەلىگىندە. دەسە دە مامانداردان مۇنىڭ زيانىن ءجيى ەستيمىز. ماسەلەن, بالالار اراسىندا جۇيكە السىزدىگى, ەستە ساقتاۋ قابىلەتىنىڭ ناشارلىعى, مىنەز-ق ۇلىق وزگەرىستەرىندەگى كەدەرگىلەردىڭ ورتاشادان جوعارى بولۋىن ماماندار وسى ۆيرتۋالدى ومىرمەن بايلانىستىرىپ وتىر. سونداي-اق كەيىنگى جىلدارى ەرەسەكتەر اراسىندا ۇيقىسىزدىق, جۇيكە اۋرۋلارى, ۇزاق ۋاقىتتىق كۇيزەلىس پەن ۆيرتۋالدى تاۋەلدىلىك ءجيى بايقالعان. وعان الەۋمەتتىك جەلىدە كوپتىڭ قوشەمەتىنە بولەنىپ, ۇلكەن ورتانىڭ «جارىق جۇلدىزىنا» اينالعان ادامداردىڭ شىن ومىردە جالعىزدىقتان قۇسا بولۋى, وزىنە قاستاندىق جاساۋعا دەيىن جەتۋىن قوسىپ قويىڭىز. عالامتوردىڭ ساناعا ۇلكەن سوققى ەكەنىن وسىدان-اق توپشىلاي بەرەرسىز...
