بۇل جوبا جايىندا ەلباسى: «جاستار ومىرگە شىنايى كوزبەن قاراپ, ءوز تاعدىرلارىنا وزدەرى يەلىك ەتە الاتىن ازاماتتار بولۋى ءۇشىن ولارعا ۇلگى ۇسىنۋىمىز كەرەك», دەگەن بولاتىن. ەلىمىزدىڭ ءار وڭىرىندەگى ءتۇرلى سالادا جەتىستىككە جەتكەن تالانتتى جاستاردى ناسيحاتتاۋدى ماقسات ەتكەن تىڭ جوبا ارقىلى ەگەمەندى ەلدىڭ ىرگەسى بەرىك قالانىپ جاتقان تۇستا جاستار ەلدىڭ جاڭا تاريحىن جاساۋى كەرەك. يگى باستامانىڭ نەگىزگى مۇراتى دا وسى.
«قازاقستاننىڭ 100 جاڭا ەسىمىنىڭ» بيىلعى جەڭىمپازدارىنىڭ اراسىندا جاس مۋزىكانت ارىستان ءابىلدين دە بار. 18 جاستاعى قاراعاندىلىق تالانت يەسى جازعان كاۆەر الەمدىك Shazam-عا ىلىككەن بولاتىن. سونىمەن قاتار ول – تانىمال رەپەر Jah Khalib ۇيىمداستىرعان مۋزىكالىق بايقاۋدىڭ جەڭىمپازى. ايتا كەتەيىك, «مادەنيەت جانە سپورت» اتالىمىندا جەڭىسكە جەتكەن جاس دارىن ءۇشىن 2 790 ۇمىتكەر قاتىسقان كونكۋرستا توپ جارۋ – ۇلكەن جەتىستىك.
ونەرپازدار وتباسىندا وسكەن ول مۋزىكاعا بالا كەزىنەن اۋەستەنگەن. اكەسى مۋزىكا مەكتەبىنىڭ ديرەكتورى بولسا, اناسى – حور جەتەكشىسى. بەس جاسىنان باستاپ فورتەپيانو مەن باراباندا ويناي باستاپتى. اتا-اناسى مۋزىكانت بولعان سوڭ پەرزەنتىنىڭ ونەردەن الىس كەتپەۋى زاڭدىلىق شىعار.
جاستايىنان ومىرلىك جولىن ايقىنداعان ارىستان ءوز شىعارماشىلىعى تۋرالى: «العاشقى اۆتورلىق ءانىمدى سۇيىكتى قىزىما ارناعان ەدىم. ونى الەۋمەتتىك جەلى قولدانۋشىلارى جوعارى باعالاپ, مۋزىكامەن ماقساتتى تۇردە اينالىسۋىما جىگەر بەردى. بۇل مەنى جاڭا شىعارمالارعا شابىتتاندىردى», دەيدى.
Colorit لاقاپ اتىمەن ونەر كورسەتەتىن ونەرپاز TikTok جانە Instagram الەۋمەتتىك جەلىلەرىندە تانىمالدىققا يە بولدى. ول قازاقستاندىق, رەسەيلىك جانە شەتەلدىك ارتىستەردىڭ اندەرىنە كاۆەر جازادى. ونىڭ روليكتەرى ميلليون قارالىمعا جەتىپ, جانكۇيەرلەر سانى كۇن ساناپ ارتىپ كەلەدى. ول جازعان شەتەلدىك اۋەندەر نۇسقاسىنا ەگور كريد, كلاۆا كوكا جانە باسقا دا تانىمال ارتىستەر بەينەكورىنىس ءتۇسىرىپ ءجۇر.
الەۋمەتتىك جەلىلەردەگى وسىنداي ناتيجەدەن سوڭ ارىستان ءابىلديننىڭ تاراپىنا تانىمال رەسەيلىك Black Star جانە Sony Music لەيبلدان ۇسىنىستار تۇسكەن. قازىر مۋزىكانت Zivert, Feduk, يۆان دورندى ناسيحاتتاۋمەن اينالىساتىن P.M.I. Music مۋزىكالىق ۇيىمىمەن كەلىسىمشارتقا وتىردى. كوكتەمدە شاعىن جەكە البومى جارىققا شىقتى.
«جاقىندا ارىپتەستىك كەلىسىمشارت جاساستىق. وسىنداي ەرەكشە مۇمكىندىك العانىما قۋانىشتىمىن. ءبىزدىڭ كومپانيا ارىپتەستىك ورناتقان رەسەيلىك بىرلەستىك يۆان دورن, زيۆەرت, فيليپ كيركوروۆ سياقتى تانىمال ورىنداۋشىلارمەن جۇمىس ىستەيدى. وسى مۇمكىندىكتى پايدالانىپ كوپتەگەن جاڭا حيتتەر شىعارامىز دەپ ۇمىتتەنەمىن», دەيدى مۋزىكانت.
ارىستاننىڭ الەۋمەتتىك جەلىلەردىڭ مۋزىكا الاڭىنداعى كورسەتكىشىنە تاعى ءبىر توقتالساق, Slava Marlow & Morgenshtern ايتاتىن «بىسترو» ترەگى رەسمي تۇردە پايدا بولعاننان كەيىن VK مەن Apple Music چارتتارىندا عانا ەمەس, سونىمەن قاتار Shazam الەمدىك توپ-چارتىندا جەتەكشى ورىنعا يە بولعان ەدى. ول Dua Lipa مەن Billie Eillish-تەن دە وزىپ ءتۇستى. وسىلايشا, ترەك رەسەيلىك جانە قازاقستاندىق TikTok-تاعى ترەندكە اينالىپ ۇلگەردى. ال كاۆەر ءتورت ميلليوننان اسا رەت قارالىپ, وعان 190 مىڭ بەينەكورىنىس ءتۇسىرىلدى. مۋزىكانتتىڭ وكىلدەرى بۇنىڭ TikTok-تاعى ەڭ تانىمال قازاقستاندىق ترەك ەكەنىن مالىمدەگەن ەدى. كاۆەرگە ولەڭ اۆتورى Slava Marlow دا ءوز باعاسىن بەردى.
ونىڭ ارمانى – الەمدىك ساحنالاردا ءان سالىپ, شىعارماشىلىق يەسىنە اينالۋ. ارىستاننىڭ ۇلكەن ارمانىنا جاقىنداۋىنا «100 جاڭا ەسىم» جوباسىنىڭ ىقپالى تيەرى انىق.
«جوبا جەڭىمپازدارىنىڭ اراسىندا بولعانىما ەرەكشە قۋانىشتىمىن. بۇل – مەن ءۇشىن جاڭا قادام. ارينە, بۇل مەنىڭ جەكە ازامات رەتىندە دامۋىما جانە جاڭا شىعارماشىلىق شىڭداردى باعىندىرۋىما اسەر ەتەتىنى انىق», دەيدى ول.
قازىرگى تاڭدا ونەرپاز جاڭا ءان جازۋ ۇستىندە. ال تۋىندىنىڭ اتاۋى ازىرشە بەلگىسىز. جۋىردا عانا ارىستان حالىقارالىق مۋزىكالىق كونكۋرستا ءبىرىنشى ورىنعا يە بولعان. قازاقستاندىق ونەرپاز اقش, فرانتسيا, گەرمانيا, انگليا سىندى مەملەكەتتەردەن قاتىسقان مۋزىكانتتاردى شاڭ قاپتىرىپتى. ونىڭ بۇل جولعى ورىنداۋى YouTube جەلىسىندەگى پاراقشاسىندا تۇر. ءتۇسىرىلىم جۇمىستارى الماتى قالاسىنداعى اباي اتىنداعى قازاق مەملەكەتتىك اكادەميالىق وپەرا جانە بالەت تەاترىندا وتكەن. تۇسىرىلىمگە باراباندا ويناعان ارىستاننىڭ اكەسى دە قاتىسقان. ايتا كەتەيىك, جاس تالانت قازىر قاراعاندىداعى تاتتىمبەت اتىنداعى ونەر كوللەدجىندە «بارابان» ماماندىعى بويىنشا ءتورتىنشى كۋرستا وقيدى. الداعى جوسپارى – قۇرمانعازى اتىنداعى قازاق ۇلتتىق كونسەرۆاتورياسىندا جوعارى ءبىلىم الۋ.
«100 جاڭا ەسىم» جوباسىنىڭ جەڭىمپازدارى بولاشاقتا تاۋەلسىزدىك تارلاندارى بولۋى ابدەن مۇمكىن. قازاقستاننىڭ جاڭا زامانعى كەلبەتىن قالىپتاستىرۋعا ۇمتىلعان تۇلعالاردان ونەگە العان جاستار دا ومىرلىك جەتىستىكتەرگە جەتۋگە ءھام ۇلتىنا قىزمەت ەتۋگە ۇمتىلاتىن بولادى.
