سوچي وليمپياداسىنىڭ باستالۋىنا دا ساناۋلى كۇندەر قالدى. قىسقى سپورتى دامىعان مەملەكەتتەردىڭ ورەندەرى اق قار, كوك مۇزدا جۇلدە جينايتىن دوداعا قازاقستاندىق سپورتشىلار دا قىزۋ دايىندىق جۇرگىزۋدە. ولاردىڭ اراسىندا وڭتۇستىكقازاقستاندىقتار دا بار. بۇرىن مۇنداي باسەكەلەردى تەك تەلەديداردان تاماشالايتىن جىلى ءوڭىردىڭ سايىپقىراندارى وليمپيادا جۇلدەسىنە تالاسۋعا نيەتتى.
سوچي وليمپياداسىنىڭ باستالۋىنا دا ساناۋلى كۇندەر قالدى. قىسقى سپورتى دامىعان مەملەكەتتەردىڭ ورەندەرى اق قار, كوك مۇزدا جۇلدە جينايتىن دوداعا قازاقستاندىق سپورتشىلار دا قىزۋ دايىندىق جۇرگىزۋدە. ولاردىڭ اراسىندا وڭتۇستىكقازاقستاندىقتار دا بار. بۇرىن مۇنداي باسەكەلەردى تەك تەلەديداردان تاماشالايتىن جىلى ءوڭىردىڭ سايىپقىراندارى وليمپيادا جۇلدەسىنە تالاسۋعا نيەتتى.
شىمكەنتتە ءدال قازىر قار ارالاس جاڭبىر توپەپ تۇر. كەشە تاڭعا دەيىن تولاسسىز جاڭبىر جاۋعان. ءدال وسى ساتتە شىمكەنت قالالىق №8 قىسقى سپورت تۇرلەرى مەكتەبىنىڭ ديرەكتورى باقىتجان زيابەكوۆ وڭتۇستىك جۇرتىنان ءسۇيىنشى سۇرادى.
فريستايل سپورتىنان جىبەك اراپباەۆا مەن جانبوتا الدابەرگەنوۆا سوچي دوداسىنا جولداما الدى. شىمكەنت قالاسىنىڭ №8 قىسقى سپورت تۇرلەرىنەن مامانداندىرىلعان بالالار مەن جاسوسپىرىمدەر سپورت مەكتەبى ۇجىمىنىڭ ورتاق جەڭىسى.
جالپى, فريستايل سپورتىنان وڭتۇستىكقازاقستاندىقتار ەلىمىزدە عانا ەمەس, حالىقارالىق دودالاردا دا توپ جارىپ ءجۇر. 2011 جىلى استانا جانە الماتى قالالارىندا وتكەن قىسقى ازيا ويىندارىندا جىبەك اراپباەۆا مەن رۋسلان ابلياتيفوۆ جۇلدەگەر اتاندى. قازاقستان بىرىنشىلىكتەرىندە ەشكىمگە دەس بەرمەيتىن جەرلەستەرىمىز ەۋروپا كۋبوكتارىندا ەلىمىزدىڭ ابىرويىن اسپانداتتى. ولاردىڭ قاتارىنا جانبوتا الدابەرگەنوۆا قوسىلدى. بۇل بويجەتكەن بيىل ناۋرىز ايىندا وتكەن ەۋروپا كۋبوگىنىڭ العاشقى ەكى كەزەڭدەرىندە ءبىرىنشى ورىندى جەڭىپ الدى.
– الەمدىك رەيتينگتە جانبوتا الدابەرگەنوۆا – 17, ال, جىبەك اراپباەۆا 18-ءشى ورىندا تۇر, – دەيدى باقىتجان زيابەكوۆ. – ال وليمپيادا ويىندارىنا العاشقى 25 سپورتشى قاتىسادى. دەمەك, جەرلەستەرىمىزدىڭ مۇمكىندىگى جوعارى. قازىر ىرىكتەۋ سايىستارى ءوتىپ جاتىر. سول سىندا كەرەكتى ۇپايلارىن جيناسا, جانبوتا مەن جىبەك سوچي وليمپياداسىنا جولداما الادى. وعان سەنىمدىمىز.
سونىمەن قاتار, باعلان ىڭكاربەك پەن اقمارجان قالمۇرزاەۆانىڭ دا اياق الىستارى جامان ەمەس. ۇلتتىق قۇراما ساپىندا قاراكوز قانداستارىمىزدىڭ وتە از ەكەنىن ەسكەرسەك, وڭتۇستىكتىڭ نامىستى قىز-جىگىتتەرىنىڭ تابىسىنا بۇكىل الاش جۇرتشىلىعى تىلەۋلەس بولاتىنى ءسوزسىز. قازىر شىمكەنتتە فريستايلمەن 104 سپورتشى اينالىسۋدا.
ءۇش جىل بۇرىن اشىلعان بۇل مەكتەپتە فريستايلدان بولەك, قىسقى سپورتتىڭ 4 تۇرىنەن ۇيىرمە جۇمىس ىستەيدى. جەتىستىكتەرى دە از ەمەس. شورت-ترەك بولىمىندە 5 جاتتىقتىرۋشى بار. بۇگىندە 222 بالا سپورتتىڭ وسى تۇرىمەن اينالىسىپ, جەتىستىكتەرگە جەتۋدە. ماسەلەن, بىلتىر ەل بىرىنشىلىگىندە ن.بەيسەەۆ چەمپيون اتانسا, ا.داۋلەتاليەۆا, م.سابانباي, ج.تۇراتبەكوۆ جانە ت.سۇلتانبەكوۆ كۇمىس مەدالعا يە بولدى. ال ا.ايتباي قولا جۇلدەگەر اتاندى. قازاقستاننىڭ بيىلعى چەمپيوناتىندا جەرلەستەرىمىز توپتىق باسەكەدە 9 جۇلدەگە يەلىك ەتسە, وقۋشىلار اراسىنداعى ءىىى قىسقى سپارتاكيادادا ۇلدار دا, قىزدار دا قولا جۇلدەنى جەڭىپ الدى.
ەڭ ادەمى ءارى تارتىمدى سپورت ءتۇرلەرىنىڭ ءبىرى – مانەرلەپ سىرعاناۋمەن شۇعىلداناتىندار سانى دا ارتۋ ۇستىندە. شىمكەنتتەگى «مۇز سارايىندا» 156 سپورتشى وسى سپورت ءتۇرىن سەرىك ەتىپ, جاۋاپتى سىندارعا دايىندالۋدا. ولارعا 7 باپكەر ءتالىم بەرەدى. مانەرلەپ سىرعاناۋدان دۋباي قالاسىندا وتكەن حالىقارالىق جارىستا شىمكەنتتىك ب.جامبىل مەن ا.جاپباروۆ جەڭىمپاز اتانسا, د.نۇراليەۆا ۇزدىك ۇشتىككە ەندى. بيىل ۇيىمداستىرىلعان ءىىى قىسقى سپارتاكيادادا د. تۇرسىمباەۆا ءبىرىنشى ورىندى جەڭىپ الدى. الماتىدا وتكەن «قيال» كلۋبىنىڭ اشىق بىرىنشىلىگىندە د.تۇرسىمباەۆا, و.مەلنيكوۆ, د.سيروتينا, ب.جامبىل, د.كسەندزيۋك, د. ءىلياس جانە ا.قۇرالوۆا توپ جاردى. سونداي-اق, «دينامو» قوعامدىق بىرلەستىگىنىڭ اشىق بىرىنشىلىكتەرىندە دە جەرلەستەرىمىز جۇلدەلى ورىنداردى يەمدەندى. الماتىدان بىلىكتى باپكەر الدىرعان شىمكەنتتىكتەر كەلەشەكتە وسى سپورت تۇرىنەن ازيا, الەم بىرىنشىلىكتەرىندە جۇلدە الۋدى كوزدەيدى.
سوڭعى جىلدارى الەمنىڭ بىرنەشە مەملەكەتىندە امبەباپ جەكپە-جەك (ۋنيبوي) جوعارى قارقىندا دامۋدا. بۇل سايىستا سپورتشىلار 300 مەترگە شاڭعىمەن جۇگىرىپ, پنەۆماتيكالىق مىلتىقپەن نىسانا كوزدەيدى. ال ءۇشىنشى سىندا قارسىلاسپەن قار ۇستىندە ەكى مينۋت كۇرەسەدى. وسى ءۇش سىننان كوپ ۇپاي جيناعاندار عانا جەڭىس تۇعىرىنا كوتەرىلەدى. وتە قيىن سپورتتى مەڭگەرگەندەر وڭتۇستىكتە بارشىلىق. بۇگىندە قالامىزدا 100-گە جۋىق جاس وسى سپورتپەن شۇعىلدانادى. ولارعا 3 جاتتىقتىرۋشى جەتەكشىلىك ەتەدى. ولجاسىز دا ەمەس. رەسەيدەگى الەم بىرىنشىلىگىندە ن.نارتباي 3-ورىندى جەڭىپ السا, 80 كيلو سالماق دارەجەسىندە ءى.ازيز چەمپيون اتاندى. ودان وزگە حالىقارالىق دودالاردا دا جەرلەستەرىمىز ەل نامىسىن ابىرويمەن قورعاپ ءجۇر. وليمپيادا ويىندارى باعدارلاماسىنا ەنبەدى دەمەسەڭىز, بۇل سپورت وتە قىزىقتى. كەلەشەگى بار.
شايبالى حوككەي دەسە ىشكەن اسىن جەرگە قوياتىن جانكۇيەرلەر كوپ. تارتىمدىلىعى جونىنەن فۋتبولدان كەيىنگى ورىنداردىڭ بىرىندە تۇرعان حوككەي سپورتىمەن شىمكەنتتە 244 وقۋشى جاتتىعادى. ون ءتورت توپقا بولىنگەن جاسوسپىرىمدەردى 4 جاتتىقتىرۋشى باپتايدى. ازىرشە, بۇل سپورت تۇرىنەن اۋىز تولتىرىپ ايتارلىق جەتىستىك جوق. دەگەنمەن, وڭتۇستىك حوككەيىنىڭ بولاشاعى الدا. جۋىردا شىمكەنتتە ەرەسەكتەر اراسىندا حالىقارالىق سايىس ءوتتى. ەندى جاستار, جاسوسپىرىمدەر اراسىنداعى ءباسەكەلەر دە ۇيىمداستىرىلماق. مىنە, وسى جارىستاردا جاس حوككەيشىلەرىمىز شەبەرلىكتەرىن شىڭداسا, كەلەشەكتە الەمگە تانىمال جۇلدىزعا اينالۋى عاجاپ ەمەس. بۇرىن تەك وسكەمەن مەن الماتىدا عانا كەڭ قانات جايعان بۇل سپورت بۇگىندە اتىراۋ, پاۆلودار, اقمولا, سولتۇستىك قازاقستان, قاراعاندى وبلىستارىندا دا جوعارى قۇرمەتكە يە. ول وڭىرلەردىڭ قاتارىنا وڭتۇستىك قازاقستان وبلىسى دا قوسىلدى.
قىسقى سپورتتى مىقتاپ قولعا العان شىمكەنتتە ماقتاۋعا تۇرارلىق جەڭىستەر جەتەرلىك. ونى №8 قىسقى سپورت تۇرلەرى مەكتەبىنىڭ ءۇش جىلدا قول جەتكىزگەن تابىستارىن ساراپتاي وتىرىپ اڭعاردىق. ازىرشە, وڭتۇستىكتە قىسقى سپورتى تۇرلەرىنەن وليمپيادا جۇلدەسى جوق. بالكىم, سوچي وليمپياداسىندا تاريحي جەڭىسكە كۋا بولاتىن شىعارمىز. سوندىقتان فريستايل شەبەرلەرىنە ساتتىلىك سەرىك بولسىن دەپ تىلەيىك.
ورالحان ءداۋىت,
«ەگەمەن قازاقستان»,
عابيت ساپاربەكوۆ,
جۋرناليست.
وڭتۇستىك قازاقستان وبلىسى.
