ولاردىڭ ىشىندە كوكتەمگى ناۋقاندا جانارماي مەن تۇقىمدى قارىزعا العان ديقاندار, ليزينگ بويىنشا تەحنيكاسىن جاڭارتقان شارۋا قوجالىقتارى, سونداي-اق مەملەكەتتىك باعدارلاما بويىنشا نەسيەگە مال العان فەرمەرلەر بار.
بۇل ماسەلە قوستاناي وبلىستىق كاسىپكەرلەر پالاتاسىندا شىلدە ايىندا وتكەن جيىندا دا ءسوز بولعان. پالاتا وكىلدەرى ول جولى شارۋاشىلىق باسشىلارىن «قولداۋسىز قالمايسىزدار, مەملەكەت كۇزگە قاراي بۇل تىعىرىقتان شىعۋدىڭ قانداي دا ءبىر جولىن ۇسىنۋى ءتيىس» دەگەن ۋادەمەن قايتارعان. ايتقانداي-اق, كاسىپكەرلەر پالاتاسى تاياۋدا عانا بەرەشەگى بار فەرمەرلەردىڭ نەسيە تولەمىنىڭ مەرزىمى شەگەرىلەتىنىن مالىمدەدى.
– ءبىز ءوز ۇسىنىستارىمىزدى «اتامەكەن» ۇكپ ورتالىق اپپاراتىنا جىبەرگەن ەدىك. قازىردىڭ وزىندە سولاردىڭ ىشىنەن ەكەۋى وڭ شەشىم تاپتى دەگەن جاۋاپ الىپ وتىرمىز. اتاپ ايتقاندا, بيىل «نۇح «بايتەرەكتىڭ» قارجىلىق ينستيتۋتتارىنان العان نەسيەلەر مەن «ازىق-ت ۇلىك كورپوراتسياسى» اق-عا فورۆاردتىق ساتىپ الۋ شارتتارى بويىنشا اۋىل شارۋاشىلىعى ونىمدەرىن جەتكىزۋ بويىنشا مىندەتتەمەلەردىڭ ورىندالۋ مەرزىمى ۇزارادى. قازىر جەرگىلىكتى اتقارۋشى ورگاندار اتالعان مەملەكەتتىك قولداۋ شارالارىن پايدالانعىسى كەلەتىن اۋىلشارۋاشىلىق تاۋارىن وندىرۋشىلەردىڭ ءتىزىمىن جاساپ جاتىر, – دەدى وبلىستىق كاسىپكەرلەر پالاتاسى اوك ءبولىمىنىڭ باستىعى قايىر ايسين.
قوستاناي وبلىسى
