– وڭىردەگى كادر تاپشىلىعىن شەشۋ ءۇشىن وبلىستىق بيۋدجەت ەسەبىنەن دەنساۋلىق, ءبىلىم, اۋىل شارۋاشىلىعى جانە باسقا دا ماڭىزدى سالالار بويىنشا ءبىلىم بەرۋ گرانتتارى ءبولىنىپ وتىر. بيىل كونكۋرسقا قاتىسۋعا 186 تالاپكەر ءوتىنىش بەردى. ەندى 52 تۇلەك م.وسپانوۆ اتىنداعى باتىس قازاقستان مەملەكەتتىك مەديتسينالىق ۋنيۆەرسيتەتىندە, ەكەۋى ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە ءبىلىم الادى. ال سەگىز ورەن «نۇر-مۇباراك» ۋنيۆەرسيتەتىنە, 86 جاس ح.دوسمۇحامەدوۆ اتىنداعى اتىراۋ ۋنيۆەرسيتەتىنە وقۋعا ءتۇستى. م.وتەمىسوۆ اتىنداعى باتىس قازاقستان مەملەكەتتىك ۋنيۆەرسيتەتىندە ەكى جاس جوعارى ءبىلىم الادى, – دەيدى وبلىستىق ءبىلىم باسقارماسىنىڭ باسشىسى ساتقان ەسەنعاليەۆ.
ونىڭ ايتۋىنشا, بيىل ۇلتتىق بىرىڭعاي تەستىلەۋدىڭ قورىتىندىسىمەن ءبىلىم ساپاسى 57,3%-دى قۇراپ وتىر. وكىنىشكە قاراي, فۋنكتسيونالدىق ساۋاتتىلىققا بايلانىستى حالىقارالىق زەرتتەۋلەر (PISA) بويىنشا وقۋشىلار رەسپۋبليكاداعى تومەن كورسەتكىشكە يە بولعان.
– اتىراۋ وبلىسىندا ءبىلىم بەرۋدى دامىتۋدىڭ 2021-2023 جىلدارعا ارنالعان جول كارتاسىنىڭ باعدارلاماسى قابىلداندى. بۇل باعدارلاما نازارباەۆ زياتكەرلىك مەكتەپتەرىمەن بىرلەسە جۇزەگە اسىرىلۋدا. جول كارتاسى اياسىندا 50 مەكتەپتىڭ جۇمىسى زەردەلەندى. كەشەندى زەرتتەۋ ناتيجەسىندە مەكتەپتەردەگى پروبلەمالار تولىقتاي انىقتالدى, – دەيدى س.ەسەنعاليەۆ.
قازىر 413 پەداگوگتىڭ جەتىسپەۋشىلىگى تۋىنداپ وتىر. ورىس سىنىپتارى جانە ورىس توپتارىنا 331 مامان قاجەت. ماتەماتيكا, ورىس سىنىپتارىنا ءدارىس بەرەتىن قازاق ءتىلى مەن ادەبيەتى ءپانىنىڭ مۇعالىمدەرىنە سۇرانىس ارتقان. باستاۋىش سىنىپتارىنىڭ وزىنە 100-گە جۋىق پەداگوگتىڭ ورنى بوس تۇر. اتىراۋ قالالىق ءبىلىم ءبولىمى باسشىسىنىڭ ورىنباسارى امانباي حۇسىنوۆتىڭ مالىمەتىنشە, قازاق سىنىبىنا 58, ورىس سىنىبىنا 28 مۇعالىمگە سۇرانىس بەرىلگەن. بيىل م.وتەمىسوۆ اتىنداعى باتىس قازاقستان مەملەكەتتىك ۋنيۆەرسيتەتىن بىتىرگەن 19 جاس مامان مەكتەپتەرگە جۇمىسقا ورنالاسقان.
تاعى دا دەرەككە جۇگىنەر بولساق, وڭىردە ءتورت مەكتەپ اپاتتىق جاعدايدا تۇر. ال 11 مەكتەپ ساباق ءۇش اۋىسىممەن وقىتادى. بۇل ماسەلەنى وڭ شەشۋ ءۇشىن بيىل 11 مەكتەپ پايدالانۋعا بەرىلگەن. ەندى 15 مەكتەپتىڭ قۇرىلىسى ءجۇرىپ جاتىر. ەندى التى مەكتەپتىڭ قۇرىلىسى باستالادى. ەرەكشە ءبىلىمدى قاجەت ەتەتىن 6 653 بالا بار. ولاردىڭ قاتارلاستارىنان قالماي ءبىلىم الۋى ءۇشىن 159 مەكتەپتە قولايلى جاعداي جاسالىپتى. جالپى, وڭىردە 14 مىڭ مۇعالىم ءدارىس بەرەتىن 197 مەكتەپتە 143 مىڭنان استام وقۋشى ساباققا بارادى. ونىڭ ىشىندە مەكتەپ تابالدىرىعىن العاش رەت اتتايتىن 14 241 بالا بار.
– مەكتەپ مۇعالىمدەرى تولىق ۆاكتسينا الدى. بارلىق مەكتەپكە دەزينفەكتسيالىق قۇرالدار ساتىپ الىندى. وقۋلىقتاردى ساتىپ الۋعا 1 ملرد 667 مىڭ تەڭگە قارجى ءبولىندى. كەلىسىمشارتقا سايكەس وقۋلىقتاردى 15 باسپا جەتكىزىپ بەرەدى, – دەيدى باسقارما باسشىسى.
اتىراۋ وبلىسى
