ەرلەر اراسىنداعى 100 مەترگە براسس ادىسىمەن ءجۇزۋ بويىنشا جارىسقان وتانداسىمىز اۋەلى ىرىكتەۋ باسەكەسىنە قاتىسىپ, ەكى توپ بويىنشا جۇزگەن سپورتشىلاردىڭ اراسىندا ۇزدىك ناتيجە كورسەتىپ, فينالعا جولداما العان بولاتىن. سونىمەن قاتار جالپى ەسەپتە سەگىزىنشى ورىنعا تابان تىرەگەن تاعى ءبىر جەرلەسىمىز نۇرالي سوۆەتقانوۆ تا فينالعا شىققانەدى. بىراق فينالدىق باسەكەدە ن.سوۆەتقانوۆ جۇلدەلى ورىنعا ىلىگە المادى.
فينالعا جولداما العان ەڭ ۇزدىك 8 سپورتشىنىڭ قاتارىندا ونەر كورسەتكەن نۇرداۋلەت جۇماعالي التىن جۇلدە ءۇشىن بولعان باسەكەدە 100 مەتر قاشىقتىقتى 1.05,20 ۋاقىت كورسەتكىشىمەن ءجۇزىپ ءوتىپ, قولا جۇلدەگە قول جەتكىزدى. بۇل سايىستا گەرمانيالىق تاليسو ەنگەل جەڭىمپاز اتانسا, امەريكالىق دەۆيد ابراحامس كۇمىسكە يەلىك ەتتى.
وسىلايشا, قازاقستاندىق پاراليمپياداشىلار توكيودا بەسىنشى جۇلدەسىن جەڭىپ الدى. بۇعان دەيىن پاۋەرليفتينگتەن داۆيد دەگتيارەۆ التىن السا, پارا دزيۋدودان ءانۋار ساريەۆ, داۋلەت تەمىرجان جانە زارينا بايباتينا كۇمىس مەدال يەلەنگەن ەدى. ايتا كەتەيىك, وسى قولا جۇلدەنىڭ ارقاسىندا قازاقستان قۇراماسى پاراليمپيادا تاريحىندا تۇڭعىش رەت تولىق مەدال جيىنتىعىن جەڭىپ الدى.
