وسى «ۇلكەن دۋلىعا» جارىسىنىڭ 31-راكەتكاسى بولىپ تىركەلگەن قازاقستاندىق تەننيسشى باستاپقى كەزدەسۋىن دۇنيەجۇزىلىك رەيتينگتە 134-ورىندا تۇرعان گەرمانيالىق ياننيك حانفمانمەن وتكىزدى. ءبىرىنشى پارتيادا ا.بۋبليك قارسىلاسىنا بىردە-ءبىر گەيم بەرگەن جوق – 6:0. ەكىنشى سەتتىڭ جەتىنشى گەيمىندە بۋبليكتىڭ دوپ بەرۋدەگى قاتەلىكتەرىنەن كەيىن گەرمانيالىق سپورتشى برەيكپەن العا شىقتى – 4:3. بۇل سەتتە سول باسىمدىلىعىن ساقتاپ قالدى – 6:4.
يا.حانفمانن ءۇشىنشى پارتيانى برەيكپەن باستادى – 2:0. بۇدان كەيىن ءوز گەيمىن اسا ءبىر قيىندىقپەن العان بۋبليك قايىرا برەيك جاساپ, تارازى باسىن تەڭەستىردى – 2:2. وسى قارقىننان تايماي, قاتارىنان التى گەيمگە قول جەتكىزدى – 6:2. ءتورتىنشى سەتتە قازاقستاندىق تەننيسشى برەيك جاساپ, العا كەتتى – 4:1. تاعى ءبىر برەيك – 5:1. اقىرى ماتچتى ەيسپەن ءبىتىردى – 6:1.
قازاقستاندىق سپورتشى 1 ساعات 51 مينۋتقا سوزىلعان ماتچتا 18 ەيس جاساپ, 13 برەيك-پوينتتىڭ سەگىزىن ءمۇلت جىبەرگەن جوق. يا.حانفمانن 6 ەيس, 2 برەيكپەن (13 برەيك-پوينت) عانا شەكتەلدى. ا.بۋبليك ءۇشىنشى اينالىمعا شىعۋ ءۇشىن الەمنىڭ 69-راكەتكاسى, جاپونيالىق ەسيحيتو نيسيوكا نەمەسە رەيتينگتە 184-ساتىداعى امەريكالىق دجەك سوكتىڭ بىرەۋىمەن تالاسادى.
وتكەن جىلى اقش-تىڭ اشىق چەمپيوناتىندا ا.بۋبليك العاشقى اينالىمنان اسا الماعان ەدى.
