ونىڭ ايتۋىنشا, وبلىس اۋماعىنداعى رەسپۋبليكالىق ماڭىزعا يە تراسسالارعا جىل باسىنان بەرى جۇرگىزىلگەن تەكسەرۋلەر ناتيجەسى بار-جوعى ءۇش اقاۋدى كورسەتتى. سول جول ۋچاسكەلەرىنە ورتاشا جوندەۋ جۇمىستارىن جۇرگىزۋگە جاۋاپتى مەردىگەر مەكەمەلەرگە, ولارعا تاپسىرىس بەرگەن جەرگىلىكتى اكىمدىكتەرگە قىزمەتتىك حات جازىلعان سوڭ كەمشىلىكتەر تەز ارادا تۇزەتىلگەن.
«ماڭعىستاۋ وڭىرىندە كولىك جولدارىن سالۋ جانە جوندەۋمەن شۇعىلداناتىن كومپانيالاردىڭ ءوز ىسىنە مۇقياتتىلىق تانىتا باستاعانى قۋانتادى. ويتكەنى بۇل تراسسالاردى قولداناتىن حالىقتىڭ قاۋىپسىزدىگى ءبىز ءۇشىن ارقاشان ءبىرىنشى ورىندا تۇر. مىسالعا ايتار بولسام, اعىمداعى جىلدىڭ قاڭتار-شىلدە ايلارى وبلىس بويىنشا كولىك جولدارىنا 234 رەت باقىلاۋ رەيدى جاسالدى. 42 نىسان بويىنشا تەكسەرۋ جۇرگىزىلدى. باس-اياعى 1 072 سىناما الدىق. سونىڭ جۇزگە جۋىعىنان ءارتۇرلى اقاۋ انىقتالدى. قىزمەتتىك حاتىمىزدا بارلىعىن دا كورسەتىپ بەردىك. سايكەسىنشە, تەز ارادا تۇزەتىلدى. جالپى, وتكەن جىلدارمەن سالىستىرعاندا قازىرگى كورسەتكىش الدەقايدا جاقسى», دەدى ول.
وسى تەكتەس رەيدتىك باقىلاۋ شارالارى جىل باسىنان بەرى وبلىستىق ماڭىزداعى جولداردا 42 رەت, قالالىق ماڭىزعا يە تراسسالاردا 33 رەت, اۋداندىق جولدارعا 3 مارتە جۇرگىزىلدى.
سوڭعىسىنان ەشقانداي اقاۋ تابىلماعانىن ايتادى ۇلتتىق ورتالىق ماماندارى.
جول ساپاسى – قاۋىپسىزدىك كەپىلى. جول جايى ءبىراز جىلدارعا دەيىن جىر بولعان ماڭعىستاۋدا جول ساپاسىنىڭ ارتۋى – جاعىمدى جاڭالىق.
