كۇنى كەشەگە دەيىن سونداي سكەپتيكتىڭ ءبىرى – قاراعاندى قالاسىندا تۇراتىن مارات وسپانوۆ دەگەن جاس جىگىت ەدى. شوۋ بيزنەستىڭ شاڭىن شىعارىپ جۇرگەن ول تاياۋدا عانا ينفەكتسيالىق گوسپيتالدان شىقتى. مارات ىستىعى كوتەرىلىپ, جوتەلە باستاعاندا, وعان ونشا ءمان بەرمەپتى. سۋىق تيگىزىپ الدىم دەپ ويلاعان ول ءوز بەتىنشە ۇيدە جاتىپ ەمدەلە بەرگەن. سودان, ءبىر اپتادان كەيىن دەمىگىپ, ەكى وكپەسى اۋا جەتپەي قىسىلا باستاعاندا عانا امال جوق جەدەل جاردەمنىڭ كومەگىنە جۇگىنگەن. سويتسە, ونىڭ وكپەسى 90%-عا قابىنعان بولىپ شىققان. ناۋقاس پروفەسسور ح.ج.ماقاجانوۆ اتىنداعى كوپسالالى اۋرۋحانانىڭ ينفەكتسيالىق گوسپيتالىندە 16 كۇن جانساقتاۋ بولىمىندە جاتتى. ودان كەيىن ءبىر اپتاداي پالاتادا بولىپ, ەم العان ەكەن.
– ەگەر دارىگەرلەر بولماسا, امان قالارىم ەكىتالاي ەدى. مۇنى مەنىڭ ەكىنشى تۋعان كۇنىم دەۋگە بولادى, – دەيدى تاۋبەسىنە كەلگەن م.وسپانوۆ.
شوۋمەن وسى ۋاقىتقا دەيىن كوروناۆيرۋس ينفەكتسياسىنىڭ بار ەكەنىنە كۇمانمەن قاراپ كەلگەنىنە قاتتى وكىنەدى. ەندى وعان ۇزاق ۋاقىت وڭالتۋ ەمىنەن وتۋگە تۋرا كەلەدى. قازىر مارات ۆاكتسينا سالدىرۋدىڭ ىندەتكە تويتارىس بەرەتىن بىردەن-ءبىر توسقاۋىل ەكەنىن ايتۋدان جالىقپايدى. مۇمكىندىك تۋعان بەتتە ءوزى دە ەكپە الامىن دەيدى. ازىرگە ول تىنىس الۋ گيمناستيكاسىن زەرتتەپ, سونىمەن وكپەسىن جاتتىقتىرىپ ءجۇر.
– اۋىرىپ تۇرعاننان كەيىن ومىرىمە باسقاشا قاراي باستادىم. مەنى تانىمايتىن ادامدار مەن ءۇشىن قان تاپسىردى, ارىپتەستەرىم قارجىلاي كومەكتەسىپ زىر جۇگىردى, اعايىن-تۋىس كۇنى-ءتۇنى تىلەۋىمدى تىلەدى. وسىنداي كول-كوسىر پەيىل جۇرەگىمدى ەلجىرەتتى. ءومىرىمدى ساقتاپ قالعان اق حالاتتى ابزال جاندارعا دەگەن العىسىم شەكسىز, – دەيدى ول.
مىنە, جاستار اراسىندا وتە تانىمال شوۋمەن جىگىت ءوزىنىڭ باسىنان وتكەن جايتتى باسقالارعا ساباق بولسىنشى دەگەن نيەتپەن وبلىستاعى جۋرناليستەر قاۋىمىنا ەگجەي-تەگجەيلى ايتىپ بەردى. ماراتتىڭ بۇل ءىسىن ءبىز دە ناعىز ازاماتتىق قادام دەپ باعالادىق. قازىر شوۋمەننىڭ كوپكە ايتار ءبىر عانا تىلەگى بار: «جۇرت مەنىڭ باسىمنان وتكەن قاتەلىكتى قايتالاماسا جانە دارىگەرلەردىڭ ايتقانىن ەكى ەتكىزبەسە ەكەن». سونىمەن بىرگە ول ەلدى ەكپە الۋعا شاقىرادى. ءوزىنىڭ گوسپيتالدا جاتقان كەزدە ۆاكتسينا سالدىرعان بىردە-ءبىر ادامنىڭ اۋىرىپ تۇسكەنىن كورمەگەنىن ايتادى.
سوڭعى كۇندەرى قاراعاندى وبلىسى بويىنشا كوروناۆيرۋسپەن اۋىرعاندار سانى ءسال دە بولسا تومەندەگەن. مۇنى پروفەسسور ح.ج. ماقاجانوۆ اتىنداعى كوپسالالى اۋرۋحانانىڭ جۇقپالى اۋرۋلار گوسپيتالىندە جۇمىس ىستەيتىن دارىگەرلەر دە راستاپ وتىر. دەگەنمەن ولار بوساڭسۋعا ءالى ەرتە ەكەنىن ايتىپ, وبلىس تۇرعىندارىن بارلىق شەكتەۋ نورمالارىن ساقتاۋعا جانە ۆاكتسينا الۋعا شاقىرادى.
قازىر قاراعاندىدا 200 مىڭعا جۋىق ادام ۆاكتسينا سالدىرعان ەكەن. ال دارىگەر مامانداردىڭ ەسەبىنشە, 300 مىڭنان استام ادام ۆاكتسينالانعاندا عانا كەنشىلەر استاناسىندا ۇجىمدىق يممۋنيتەت قالىپتاسادى ەكەن.
وسى ورايدا وبلىس ورتالىعىندا ەرىكتىلەر مەن مەملەكەتتىك ورگانداردىڭ قىزمەتكەرلەرىنەن قۇرالعان ناسيحات توپتارى كوروناۆيرۋس ينفەكتسياسىنا قارسى ەكپە الماعان ادامداردى جەكە ۇگىتتەۋدى باستادى. ولار ۇيلەر مەن پاتەرلەرگە بارىپ, ءتۇسىندىرۋ جۇمىستارىن جۇرگىزەدى. زەينەتكەرلەرگە تەلەفونمەن حابارلاسىپ, ۆاكتسينالاۋ پۋنكتىنە بارۋدى ۇسىنىپ ءجۇر. قالا باسشىلىعى بۇل ءىس-شارانىڭ مىندەتتى تۇردە ناتيجە بەرەرىنە سەنىمدى.
قاراعاندى
