بۇگىن, باس پروكۋراتۋرادا ايماقتىق پروكۋراتۋرا ورگاندارى جانە كاسىپكەرلەر پالاتاسى وكىلدەرىنىڭ قاتىسۋىمەن كاسىپكەرلەر قۇقىعىن قورعاۋ ماسەلەلەرى تاقىرىبىندا بەينە كونفەرەنتسيا وتكىزىلدى. بۇل تۋرالى ۇلتتىق كاسىپكەرلەر پالاتاسى حابارلادى.
كەزدەسۋ 2013 جىلدىڭ 23 جەلتوقسانىندا قول قويىلعان باس پروكۋراتۋرا جانە ۇلتتىق كاسىپكەرلەر پالاتاسىنىڭ كاسىپكەرلەر قۇقىعىن قورعاۋ ماسەلەلەرى بويىنشا ءوزارا ىنتىماقتاستىق تۋرالى مەموراندۋم اياسىندا وتكىزىلدى. ەلىمىزدىڭ بارلىق وڭىرلەرىندەگى پروكۋراتۋرانىڭ ايماقتىق ورگاندارى مەن وڭىرلىك كاسىپكەرلەر پالاتالارى اراسىندا دا وسىنداي كەلىسىمدەر جاسالعان.
جيىندا پروكۋراتۋرا ورگاندارى مەن بيزنەس-قاۋىمداستىقتار اراسىنداعى ءوزارا ارەكەتتەستىكتىڭ وزەكتى ماسەلەلەرى تالقىلاندى. وسى ورايدا, تاراپتار مەموراندۋمدى جۇزەگە اسىرۋ جونىندەگى بىرلەسكەن ءىس-شارالار جوسپارىنا قول قويدى.
باس پروكۋروردىڭ ورىنباسارى اندرەي كراۆچەنكو اتاپ وتكەندەي, مەملەكەت باسشىسىنىڭ «قازاقستان جولى – 2050: ءبىر ماقسات, ءبىر مۇددە, ءبىر بولاشاق» اتتى قازاقستان حالقىنا ارناعان جولداۋىندا بيزنەستى جاقسارتۋ, اكىمشىلىك كەدەرگىلەردى جويۋ جانە زاڭنامانى جەتىلدىرۋگە باعىتتالعان بىرقاتار ءىس-شارالار قاراستىرىلعان. وسىعان بايلانىستى ۇلتتىق كاسىپكەرلەر پالاتاسىنىڭ باسقارما توراعاسى ابىلاي مىرزاحمەتوۆ جوسپاردىڭ ماڭىزدى تارماقتارىنا, اتاپ ايتقاندا, پروكۋراتۋرانىڭ ايماقتىق ورگاندارى مەن وڭىرلىك كاسىپكەرلەر پالاتالارىندا «سەنىم تەلەفوندارىن» ىسكە قوسۋ, كاسىپكەرلەر پروبلەمالارىنىڭ كارتاسىن جاساۋ, «قۋاتتى بيزنەس–قۋاتتى قازاقستان» اتتى كاسىپكەرلىكتى دامىتۋ جانە قولداۋ جوباسىن, سونداي-اق باسقا دا بىرقاتار بىرلەسكەن جوبالاردى ازىرلەۋ جانە ىسكە اسىرۋ جۇمىستارىنا توقتالدى.
ءىس-شارالار جوسپارىندا كاسىپكەرلەردەن كەلىپ تۇسەتىن حاتتار نەگىزىندە ولاردىڭ جۇيەلى ماسەلەلەرىن شەشۋدە ورتاق ۇستانىمدى ازىرلەيتىن جۇمىس توبىن قۇرۋ قاراستىرىلعان. مۇنداي جۇمىس توپتارىن بارلىق وڭىرلەردە قۇرۋ جوسپارلانىپ وتىر.سونىمەن بىرگە, يمپورتتالاتىن تاۋارلاردى پوستكەدەندىك باقىلاۋ كەزىڭدە قايتا سارالاۋ, بيزنەستى جۇرگىزۋدەگى اكىمشىلىك كەدەرگىلەر, جەكە كاسىپكەرلىك سۋبەكتىلەرىنىڭ مۇلكىنە قول سۇعۋشىلىق فاكتىلەرىمەن بايلانىستى كاسىپكەرلەردىڭ جەكەلەگەن وزەكتى ماسەلەلەرى ءتيىستى شەشىمدەر مەن ۇسىنىمدار ايتىلا وتىرىپ تالقىلاندى.
ءامىرحان الماعانبەتوۆ.
دەرەككوز: ۇلتتىق كاسىپكەرلەر پالاتاسى.
فوتو: ۇلتتىق كاسىپكەرلەر پالاتاسى.
