قر پرەزيدەنتى قاسىم-جومارت توقاەتىڭ 29 تامىزدى جالپىۇلتتىق ازا تۇتۋ كۇنى دەپ جاريالاۋىنا بايلانىستى ەلىمىزدىڭ بارلىق مەشىتتەرىندە جامبىل وبلىسىنىڭ بايزاق اۋدانىنداعى جارىلىس سالدارىنان قازا بولعان مارقۇمداردىڭ رۋحىنا قۇران حاتىم دۇعاسى باعىشتالدى.
نۇر-سۇلتان قالاسىنىڭ ازىرەت سۇلتان مەشىتىندە وتكەن دۇعا باعىشتاۋ ءراسىمى قازاقستان مۇسىلماندارى ءدىني باسقارماسىنىڭ الەۋمەتتىك جەلىدەگى پاراقشالارى ارقىلى ونلاين رەجيمدە ءوتتى.
«بۇگىنگى جالپىۇلتتىق ازا تۇتۋ كۇنىندە جامبىل وبلىسى بايزاق اۋدانىنداعى وقىس وقيعاعا بايلانىستى قازاقستان مۇسىلماندارى ءدىني باسقارماسى ەلدەگى مەشىتتەردىڭ بارىندە حاتىم قۇران ءتۇسىرىپ, قازا بولعان مارقۇمداردىڭ رۋحىنا قۇران باعىتالىپ جاتىر. حاتىم قۇران دەگەن قۇراندى باسىنان اياعىنا دەيىن وقىپ شىعۋ. ياعني, قۇراندا 114 سۇرە بولسا, سونىڭ ءبارىن تولىق وقىپ شىعۋدى ايتادى. كەشەدەن بەرى ەلىمىزدىڭ تۇكپىر-تۇكپىرىندە يمامدارىمىز, ءدىن قىزمەتشىلەرى, ۇستازدار, ءتىپتى مەشىتتەردەگى جاماعاتتاردىڭ اتسالىسۋىمەن وسى قۇران حاتىم ءار وڭىردە وقىلىپ جاتىر. ازىرەت سۇلتان مەشىتىندەگى قۇران باعىشتاۋ راسىمىنەن الەۋمەتتىك جەلى ارقىلى تىكەلەي كورسەتىلىم جاسادىق. بۇل مارقۇمدار ەلىمىز ءۇشىن, اسكەري, قۇتقارۋ قىزمەتىندە ءجۇرىپ, ءورتتىڭ ۇستىندە قازا تاپتى. مۇنداي قازانى شاريعاتتا ء«شايىت» دارەجەسىندە دەپ سانايدى. ويتكەنى, ول ەل قورعاۋ ءۇشىن, قوعامنىڭ تىنىشتىعىن ساقتاۋ ءۇشىن جاندارىن پيدا ەتتى. اللا وسى قازا بولعان مارقۇمداردىڭ رۋحىن شاتتىققا بولەپ, مەيىرىمىنە بولەپ, اقىرەتتە قيامەت كۇنى جاندارىن ءجانناتتا شالقىتسىن دەپ تىلەيمىز», دەدى قازاقستان مۇسىلماندارى ءدىني باسقارماسىنىڭ نايب ءمۇفتيى ەرشات قاجى وڭعار.
ءدىن وكىلدەرى دۇعا كەزىندە قازا بولعان ازاماتتاردىڭ ارتىندا قالعان تۋىستارىنا سابىر, جاراقات الىپ اۋرۋحانادا جاتقان جانداردىڭ جانىنا شيپا تىلەدى.
