– قالا, اۋىلداردى ارالاپ, بىرنەشە مەكتەپتىڭ جاڭا وقۋ جىلىنا دايىندىق بارىسىن كورىپ شىقتىم. وبلىس بويىنشا ءبىلىم بەرۋ ۇيىمدارى 1 قىركۇيەكتە وقۋشىلاردى قابىلداۋعا دايىن. دەگەنمەن ىندەتتىڭ جاڭا شتامدارى پايدا بولعان قازىرگىدەي قيىن كەزەڭدە ءبىز ءۇشىن ءاربىر بالانىڭ دەنساۋلىعى ماڭىزدى ەكەنىن ەستەن شىعارماۋىمىز كەرەك. وسىدان دا وبلىستىق ءبىلىم باسقارماسىنا بارلىق ءبىلىم ۇيىمدارىندا سانيتارلىق تالاپتاردى قاتاڭ ساقتاۋدى, بالالار ءومىرىنىڭ قاۋىپسىزدىگىن قامتاماسىز ەتۋ ماسەلەسىن ەرەكشە باقىلاۋدا ۇستاۋدى تاپسىرامىن, – دەدى وبلىس اكىمى.
ايماق باسشىسى مەملەكەت باسشىسى قاسىم-جومارت كەمەل ۇلى توقاەۆتىڭ باستاماسىمەن سالادا سوڭعى جىلدارى رەفورمالاردىڭ ءساتتى جۇزەگە اسىرىلعانىن اتاپ ءوتتى. اۋىل مەكتەپتەرىنىڭ جاعدايىن جاقسارتۋ باعىتىندا ناقتى قادامدار جاسالدى. پەداگوگ جانە ولارعا تەڭەستىرىلگەن قىزمەتكەرلەردىڭ ەڭبەكاقىسى بيىلدىڭ وزىندە 50%-عا كوتەرىلسە, الداعى ەكى جىلدا ەكى ەسە ۇلعايادى. وسى جىلى رەسپۋبليكالىق بيۋدجەتتەن بۇل ماقساتقا 32,2 ملرد تەڭگە قارجى ءبولىنىپ وتىر. وبلىستاعى ءبىلىم سالاسىنىڭ بيىلعى بيۋدجەتى 185 ملرد تەڭگە.
جيىندا سەنات دەپۋتاتى مۇرات باقتيار ۇلى مەن ءماجىلىس دەپۋتاتى بالايىم كەسەباەۆا ينكليۋزيۆتى ءبىلىم بەرۋ ءۇشىن ارنايى مەكتەپ اشۋ, مۇعالىمدەردىڭ مەديتسينالىق انىقتاماسىن ازىرلەۋدە جەڭىلدىكتەر قاراستىرۋ سەكىلدى ۇسىنىستارىن جەتكىزدى.
پەداگوگتەر باسقوسۋىندا ى.التىنسارين اتىنداعى ۇلتتىق ءبىلىم اكادەمياسىنىڭ پرەزيدەنتى عاني بەيسەمباەۆ ء«بىلىم الۋشىلاردىڭ ءبىلىمىن تولىقتىرۋ جاڭا وقۋ جىلىنىڭ باستى مىندەتى», «Talap» كەاق ۆيتسە-پرەزيدەنتى سانجار تاتىبەكوۆ «تەحنيكالىق جانە كاسىپتىك ءبىلىم بەرۋدى ترانسفورماتسيالاۋدىڭ وزەكتى باعىتتارى» تاقىرىپتارىندا بايانداما جاسادى.
وبلىستىق ءبىلىم باسقارماسىنىڭ باسشىسى اقزيرا قاسىموۆا اتقارىلعان جۇمىستار مەن الداعى مىندەتتەر تۋرالى باياندادى. بىلتىرعى ونلاين وقىتۋ مەكتەپتەردىڭ كومپيۋتەرلىك پاركىن جاڭارتۋعا دا سەپتىگىن تيگىزدى.
– ءبىلىم سالاسىنىڭ باستاپقى ساتىسى – مەكتەپكە دەيىنگى تاربيە باعىتىندا دا ناتيجەلى قادامدار بار. وبلىستا 670 مەكتەپكە دەيىنگى ۇيىمداردا 58 مىڭنان استام بالا تاربيەلەنۋدە. بالالاردى ەرتە دامىتۋ ينستيتۋتىن قۇرۋدىڭ العاشقى تاجىريبەسى باستالىپ تا كەتتى. «التىن ۇيا» بوبەكجاي بالاباقشاسى تسيفرلى ءبىلىم بەرۋ ىسىنە كوشتى. وسى وقۋ جىلىندا تىرەك ءبىلىم بەرۋ ۇيىمدارى ارقىلى ءار اۋداننان ءىت-بالاباقشا جەلىسى اشىلادى, – دەدى باسقارما باسشىسى.
جاڭا وقۋ جىلىندا 294 مەم-
لەكەتتىك جانە 10 جەكە مەكتەپتە 177 مىڭ وقۋشى ءبىلىم الادى. ونىڭ ىشىندە 1-سىنىپقا 18 مىڭنان اسا بالا قابىلدانادى. وقۋدى ءداستۇرلى فورماتتا باستايتىن وقۋشىلار مەن مۇعالىمدەردىڭ قاۋىپسىزدىگى ءۇشىن بارلىق ءبىلىم بەرۋ ۇيىمدارى «Ashyq» قوسىمشاسىنا قوسىلدى. پەداگوگتەردىڭ 97%-ى ۆاكتسينالاندى. وقۋ جىلىنىڭ باستالۋىنا دەيىن بۇل كورسەتكىش 100%-عا جەتەدى دەپ جوسپارلانۋدا.
ايماق مەكتەپتەرى بەينەباقىلاۋ جۇيەسىمەن 100% قامتىلدى. بىلتىر 70 مەكتەپ جەدەل باسقارۋ ورتالىعىنا قوسىلسا, بيىل 35 مەكتەپ ۇلتتىق بەينەمونيتورينگ جۇيەسىنىڭ تىكەلەي باقىلاۋىنا ەنگەن.
اۋىل مەكتەپتەرىندە ءبىلىم الاتىن وقۋشىلارعا ارنالعان «مىڭ بالا» وليمپياداسىنا 2019 جىلدان باستاپ 27 502 وقۋشى قاتىسىپ, 174 جەڭىمپاز اتانعان. ەكى جىل ىشىندە 50 وقۋشى مامانداندىرىلعان مەكتەپتەرگە جولداما الدى. باسقارما باسشىسى بيىل زياتكەرلىك وليمپيادا قورىتىندىسىمەن وبلىستىڭ ۇزدىك ۇشتىكتەن كورىنگەنىن دە اتاپ ءوتتى.
بيىل 6 جاڭا ءبىلىم وشاعى پايدالانۋعا بەرىلمەك. «جاڭا وقۋ جىلىندا ارال اۋدانى سەكسەۋىل كەنتىندەگى پرەزيدەنت تاپسىرماسىمەن ىسكە اسقان 300 ورىندىق مەكتەپ پەن قۇرىلىسى ينۆەستورلار ەسەبىنەن جۇرگىزىلگەن 2 جەكە مەكتەپ پايدالانۋعا بەرىلەدى دەپ جوسپارلاپ وتىرمىز. قالعان 3 مەكتەپتى جىل سوڭىنا دەيىن تابىستايمىز», دەدى اقزيرا قاسىموۆا. جالپى, الداعى 5 جىلدا Nur Otan پارتياسىنىڭ جول كارتاسى اياسىندا 28 مەكتەپ سالىنادى.
وبلىستا ينكليۋزيۆتى ءبىلىم بەرۋدى دامىتۋ ماقساتىندا 2020-2022 جىلدارعا ارنالعان ارنايى جول كارتاسى جاسالىپ, وعان 4 ملرد تەڭگە قارجى قارالدى. بيىل مەكتەپكە دەيىنگى 47 مەكەمەدە لوگوپۋنكت اشىلىپ, مامانمەن قامتىلادى.
سالتاناتتى ءىس-شارادا ءبىلىم بەرۋ ىسىنە ەلەۋلى ۇلەس قوسقان ۇزدىكتەر ماراپاتتالدى. وبلىس اكىمى ءبىلىم جانە عىلىم مينيسترلىگىنىڭ «ى.التىنسارين» توسبەلگىسىن تەكەي باتىر قارپىق ۇلى اتىنداعى جوعارى كوللەدجىنىڭ قۇرىلتايشىسى ميرامبەك يساەۆقا, قازالى اۋدانىنداعى №276 ورتا مەكتەبى ديرەكتورىنىڭ وقۋ ءىسى جونىندەگى ورىنباسارى باعدات ورىمباسقا, قىزىلوردا قالاسىنداعى №23 مەكتەپ-ليتسەيىنىڭ العاشقى اسكەري دايىندىق ءپانىنىڭ مۇعالىمى رومان وگاي مەن وبلىستىق ءبىلىم باسقارماسىنىڭ تاربيە جانە ءوزىن ءوزى تانۋ جۇمىستارى ءبولىمىنىڭ باس مامانى شولپان بايعازيەۆاعا تابىستادى. سونىمەن قاتار سىرداريا اۋدانى شىركەيلى اۋىلى ءابىراش ءجامىشوۆ اتىنداعى №129 مەكتەپ-ليتسەيىنىڭ اعىلشىن ءتىلى ءپانىنىڭ مۇعالىمى راۋشان ابدرامانوۆا, يساتاي ابدىكارىموۆ اتىنداعى قىزىلوردا اگرارلىق تەحنيكالىق جوعارى كوللەدجىنىڭ وقىتۋشىسى راحيا ءابۋوۆا, جالاعاش اۋدانى, «اراي» بوبەكجاي-باقشاسىنىڭ تاربيەشىسى گۇلبانۋ جالعاسوۆا مەن قارماقشى اۋدانى, شوقان ءۋاليحانوۆ اتىنداعى №26 ورتا مەكتەبىنىڭ ديرەكتورى ماۋەگۇل ەرعاليەۆا «قازاقستان رەسپۋبليكاسى ءبىلىم بەرۋ ءىسىنىڭ قۇرمەتتى قىزمەتكەرى» توسبەلگىسىمەن ماراپاتتالادى. ال وبلىس اكىمىنىڭ العىس حاتى ارال اۋدانى №19 ورتا مەكتەبىنىڭ ماتەماتيكا ءپانىنىڭ مۇعالىمى گۇلجان سەمبايقىزىنا, وبلىستىق №7 ارنايى تۇزەتۋ مەكتەپ-ينتەرناتىنىڭ ەڭبەك ءپانىنىڭ مۇعالىمى جارقىنبەك كارىمبەردى ۇلىنا, جاڭاقورعان اۋدانىنداعى №162 ورتا مەكتەپتىڭ باستاۋىش سىنىپ مۇعالىمى مەرەكە ابدىماجيتقىزىنا تابىستالدى.
وبلىس اكىمىنىڭ «ۇزدىك ورتا ءبىلىم ۇيىمى» گرانتىن جەڭىپ العان وبلىس ورتالىعىنداعى تاكەي ەسەتوۆ اتىنداعى №264 مەكتەپ-ليتسەيى ۇجىمى 34 ملن تەڭگە يەلەندى.
قىزىلوردا وبلىسى
