الماتى قالاسى اكىمدىگىنىڭ ۇيىمداستىرۋىمەن قازاقستاننىڭ حالىق جازۋشىسى, اتاقتى اقىن قادىر مىرزا-ءالىنىڭ قۇرمەتىنە بۇرىن ءوزى تۇرعان ۇيدە ەسكەرتكىش تاقتا اشىلدى.
الماتى قالاسى اكىمدىگىنىڭ ۇيىمداستىرۋىمەن قازاقستاننىڭ حالىق جازۋشىسى, اتاقتى اقىن قادىر مىرزا-ءالىنىڭ قۇرمەتىنە بۇرىن ءوزى تۇرعان ۇيدە ەسكەرتكىش تاقتا اشىلدى.
جەتپىستەن اسا پوەزيالىق, پروزالىق, سونداي-اق, ادەبي سىن جانرلارىندا جازىلعان بىرنەشە كىتاپتىڭ اۆتورى, ەكى جۇزگە تارتا ولەڭىنە ءان جازىلعان ارقالى اقىندى ۇلىقتاۋ شاراسىنا الماتى قالاسىنىڭ اكىمى احمەتجان ەسىموۆ, اقىننىڭ تۋعان جەرى ورال وڭىرىنەن ارنايى كەلگەن ازاماتتار جانە قازاق ادەبيەتى مەن ونەرىنىڭ وكىلدەرى قاتىستى.
– بۇگىنگى قازاق پوەزياسىن قادىر اقىنسىز ەلەستەتۋ مۇمكىن ەمەس. قازاقتىڭ بىرنەشە بۋىنى ونىڭ وتكىر دە, اسقاق جىرىمەن سۋسىنداپ ءوستى. وتكەن مەن بۇگىننىڭ, ءتىپتى, كەلەشەك قوعامنىڭ بۇلكىلدەگەن تامىرىن ءدوپ باساتىن ورەلى اقىن قازاقتاي حالىق بار كەزدە ەشقاشان ۇمىتىلماق ەمەس, – دەدى قالا اكىمى ا.ەسىموۆ سالتاناتتى شارادا سويلەگەن سوزىندە.
ءيا, «وزگە ءتىلدىڭ ءبارىن ءبىل, ءوز ءتىلىڭدى قۇرمەتتە», دەپ جىرلاپ وتكەن قادىر اقىن ەگەمەندىككە قول ارتقان تۇستا الماتى قالاسىندا العاشقى قازاق مەكتەپتەرىن اشۋعا ۇيىتقى بولعان ەدى. جانە ونىڭ بۇل ازاماتتىق ەڭبەگى ءار قازاقتىڭ جۇرەگىندە ءاردايىم ساقتالاتىنى دا راس.
بۇگىندە قادىر مىرزا-ءالىنىڭ پەسالارى رەسپۋبليكامىزدىڭ بارلىق دەرلىك تەاترلارىندا ساحنالانىپ ءجۇر. ونىڭ ەشكىمگە ۇقسامايتىن وزىق ويلى تۋىندىلارى الەمنىڭ بىرنەشە تىلدەرىنە ءتارجىمالانىپ, ول اۋدارعان الەمدىك كلاسسيكتەردىڭ ەڭبەكتەرى ءوز وقىرماندارىن بەكزاتتىققا باۋلىپ كەلەدى.
1980 جىلى اقىنعا «جەرۇيىق» اتتى جىر كىتابى ءۇشىن قازاق كسر مەملەكەتتىك سىيلىعى, 1993 جىلى رۋحى بيىك ادەبي تۋىندىلارى ءۇشىن موڭعوليانىڭ حالىقارالىق «اۆياس» سىيلىعى بەرىلدى. 2001 جىلى تاۋەلسىز «تارلان» سىيلىعىمەن جانە ءار جىلداردا «پاراسات», ءى دارەجەلى «دوستىق» وردەندەرىمەن ناگرادتالدى.
سالتاناتتى شارا بارىسىندا اقىننىڭ زامانداستارى, جارى مەن قوعام قايراتكەرلەرى ەستەلىكتەر ايتىپ, كەلەشەكتە الماتى قالاسىنان قادىر مىرزا-ءالىنىڭ اتىنا كوشە بەرۋ تۋرالى ۇسىنىستارىن ورتاعا سالدى.
قانات ەسكەندىر,
«ەگەمەن قازاقستان».
الماتى.
–––––––––––––––––––––––––––––––
سۋرەتتى تۇسىرگەن بەرسىنبەك سارسەنوۆ.
