قىزىلوردا وبلىسى جاڭاقورعان اۋدانىندا سىبايلاس جەمقورلىققا جاعداي تۋعىزاتىن قۇقىق بۇزۋشىلىققا جول بەرگەنى ءۇشىن ىشكى ىستەر ءبولىمى اكىمشىلىك پوليتسيا بولىمشەسىنىڭ ينسپەكتورى ب.يسمايىلوۆ قىزمەتىنەن قۋىلدى.
قىزىلوردا وبلىسى جاڭاقورعان اۋدانىندا سىبايلاس جەمقورلىققا جاعداي تۋعىزاتىن قۇقىق بۇزۋشىلىققا جول بەرگەنى ءۇشىن ىشكى ىستەر ءبولىمى اكىمشىلىك پوليتسيا بولىمشەسىنىڭ ينسپەكتورى ب.يسمايىلوۆ قىزمەتىنەن قۋىلدى.
«2013 جىلدىڭ 3 تامىزىندا وبلىستىق ىشكى ىستەر دەپارتامەنتى جول پوليتسيا باسقارماسى 2-ۆزۆودىنىڭ ينسپەكتورى ا.بايسالوۆ اۆتوكولىكتى الكوگولدىك ەلىتۋ جاعدايىندا ايداپ كەلە جاتقان ق.ەرتاسوۆتى توقتاتقان. تەكسەرۋ بارىسىندا ونىڭ اۆتوكولىك جۇرگىزۋ قۇقىعى جوق ەكەنى انىقتالعان. ناتيجەسىندە اتالعان ازاماتقا اكىمشىلىك حاتتاما تولتىرىلعان», – دەدى وسىعان وراي اۋدان پروكۋرورىنىڭ كومەكشىسى رۋسلان ءپىرنازار.
ال اكىمشىلىك قۇقىق بۇزۋشىلىق حاتتاماسى سول كۇنى اۋداندىق ىشكى ىستەر ءبولىمىنىڭ جول پوليتسيا بولىمشەسىنە جەتكىزىلىپ, اكىمشىلىك تاجىريبە ينسپەكتورى ب.يسمايىلوۆقا بەرىلگەن. ال اكىمشىلىك كودەكسىنىڭ 467-بابى 8-تارماعىندا مۇنداي ءتارتىپ بۇزۋشىلىققا سوت سانكتسياسى ارقىلى ون تاۋلىككە قاماۋ تۇرىندەگى جازا قولدانىلاتىنى كورسەتىلگەن. سونداي-اق, وسى كودەكستىڭ 640-بابى 1-تارماعىندا اكىمشىلىك قۇقىق بۇزۋشىلىق تۋرالى حاتتامانى دەرەۋ سۋدياعا جىبەرىلۋى كەرەكتىگى اتاپ كورسەتىلگەن.
الايدا, اتالعان باپ تالابىن ورەسكەل بۇزعان بولىمشە قىزمەتكەرى ب.يسمايىلوۆ اكىمشىلىك قۇقىق بۇزۋشىلىق تۋرالى حاتتامانى سوتقا جىبەرمەي, تارتپاسىنا تاستاي سالعان. ول تەك بۇل وقيعا جۇرتقا بەلگىلى بولىپ, شۋ كوتەرىلگەسىن, ارادا ەكى اي وتكەن سوڭ, 13 قازان كۇنى عانا اكىمشىلىك ءىستى سوتقا جولداعان. سونىڭ وزىندە جولدانعان ىستە كوپتەگەن كەمشىلىكتەردىڭ بولۋى, وندا كودەكستىڭ 635-بابى تالاپتارى ساقتالماۋى سەبەپتى, ول اۋداندىق سوتتىڭ ۇيعارىمىمەن بولىمشەگە كەرى قايتارىلعان.
«ازامات ق.ەرتاسوۆقا قاتىستى اكىمشىلىك قۇقىق بۇزۋشىلىق تۋرالى حاتتاما تولتىرعالى بەرى 2 اي بويى وندا كورسەتىلگەن اقاۋلىقتار مۇلدەم جوندەلمەي, اكىمشىلىك ءىس ەش قوزعالىسسىز بولىمشەدە جاتقان. بۇل جۇمىسقا جاۋاپتى اكىمشىلىك تاجىريبە ينسپەكتورى ب.يسمايىلوۆ ءوز كورسەتۋىندە اتالعان كەمشىلىكتەرگە جول بەرۋىن قۇقىق بۇزۋشىنى 2 اي بويى تابا الماعانىمەن تۇسىندىرگەن. ال ق.ەرتاسوۆ اۋداندىق «جاڭاقورعان تىنىسى» گازەتىندە ءتىلشى بولىپ قىزمەت ەتەدى. اتالعان گازەت باس رەداكتورىنىڭ مالىمەتىنە سايكەس, ول 8-20 قىركۇيەك كۇندەرى اۋداندىق اۋرۋحانادا جاتقانىنان بولەك كەزدەرى جۇمىسىندا جۇرگەن», – دەدى ر.ءپىرنازار بۇدان ءارى.
قۇقىق بۇزۋشىنىڭ مەملەكەتتىك بەلگىسى ح 278 BDO «Volkswagen Passat» ماركالى اۆتوكولىگى 3-4 تامىز كۇندەرى اۆتوتۇراققا قاماۋعا الىنعان. بىراق ب.يسمايىلوۆ كولىكتى ماس كۇيىندە ايداعان ق.ەرتاسوۆتىڭ سوعان قوسا جۇرگىزۋشىلىك كۋالىگىنىڭ جوق ەكەنىن بىلە تۇرا, وعان ءبىر كۇننەن كەيىن اۆتوماشينانى الىپ كەتۋگە رۇقسات بەرگەن. سونىمەن قاتار, ينسپەكتوردا قۇقىق بۇزۋشىنى ىزدەستىرگەنىن دالەلدەيتىن شاقىرۋ قاعازدارى, اۋداندىق گازەتكە جازىلعان قاتىناس حاتى سەكىلدى قۇجاتتارى بولماۋى سەبەپتى, ونىڭ بۇل ارەكەتىنە دالەل جوقتىعى ايقىندالعان. بىلايشا ايتقاندا, ىزدەستىرگەنىنىڭ ءوزى دە جالعان بولىپ شىققان.
وسىعان وراي, اۋداندىق پروكۋراتۋرا مەملەكەتتىك قىزمەت ىستەرى اگەنتتىگىنىڭ وبلىستىق دەپارتامەنتىنە سىبايلاس جەمقورلىققا جاعداي تۋعىزاتىن قۇقىق بۇزۋشىلىققا جول بەرگەنى ءۇشىن اۋداندىق ىشكى ىستەر ءبولىمى اكىمشىلىك پوليتسيا ءبولىمشەسىنىڭ اكىمشىلىك تاجىريبە ينسپەكتورى ب.يسمايىلوۆتىڭ جاۋاپكەرشىلىگىن شەشۋ جونىندە ۇسىنىس ەنگىزدى. ال ءىستى قاراۋ قورىتىندىسىمەن اتالمىش ينسپەكتور قىزمەتىنەن بوساتىلدى.
قۇرىش نۇرىمبەت.
