بۇل تۋرالى الماتىداعى اقش باس كونسۋلدىعى مالىمدەدى.
شەتەلدە قىزمەت ەتكەن جىلدارى باس كونسۋل سەۆيدج ازەربايجان مەن موزامبيكتەگى اقش ەلشىلىكتەرىندە قوعاممەن بايلانىس جونىندەگى كەڭەسشى, اقش-تىڭ بەلارۋستەگى ەلشىلىگىندە قوعاممەن بايلانىس جونىندەگى كەڭەسشى جانە كونسۋل, ال ليۋكسەمبۋرگتەگى اقش ەلشىلىگىندە ساياسي جانە ۆيزا ماسەلەلەرى جونىندەگى قىزمەتكەر بولعان.
باس كونسۋل سەۆيدجدىڭ كونسۋلدىق ايماعىنا الماتى جانە شىمكەنت قالالارى, سونداي-اق الماتى, قىزىلوردا, تۇركىستان مەن جامبىل وبلىستارى كىرەدى.
«باس كونسۋل قىزمەتىنە كىرىسۋ مەن ءۇشىن ەرەكشە ۋاقىت بولىپ تۇر. سەبەبى بيىل قازاقستان تاۋەلسىزدىگىنە 30 جىل تولعالى وتىر, ءارى اقش پەن قازاقستان ديپلوماتيالىق قاتىناسىنىڭ دا وتىز جىلدىعىن اتاپ وتۋدەمىز. ءالى دە قارقىنى باسىلماعان پاندەميا ەرەكشە نازاردا جانە ەكى ەلدىڭ COVID-19 ىندەتىنە قارسى بىرلەسكەن كۇرەسى اقش ميسسياسىنىڭ باسىمدىلىعى بولىپ قالا بەرەدى», دەدى باس كونسۋل سەۆيدج.
باس كونسۋل سەۆيدج - قازاق ءتىلىن قازاقستانعا كەلەر الدىندا وقىپ-ۇيرەنگەن العاشقى اقش-تىڭ باس كونسۋلى.
«وسى قىزمەتىمە دايىندالۋ كەزىندە قازاق ءتىلىن اسا قىزىعۋشىلىقپەن وقىدىم. قازاق ءتىلىن قازاقستان حالقىمەن بايلانىسىمىزدى تەرەڭدەتىپ, ەكىجاقتى ىنتىماقتاستىقتى نىعايتۋ ءۇشىن قولدانۋعا اسىقپىن», دەپ اتاپ ءوتتى باس كونسۋل سەۆيدج.
باس كونسۋل سەۆيدج اقش مەملەكەتتىك دەپارتامەنتتەگى قىزمەتىن 2004 جىلى باستاعان. اقش-تىڭ الماتىداعى باس كونسۋلى بولىپ تاعايىندالعانعا دەيىن ول ۆاشينگتوندا ورنالاسقان جاھاندىق قوعاممەن بايلانىس بيۋروسىنىڭ شەتەلدىك باق وكىلدەرى ورتالىعىن باسقارعان.
ۆاشينگتوندا قىزمەت ەتكەن جىلدارى سەۆيدج حانىم ۇلتتىق قاۋىپسىزدىك كەڭەسىنىڭ رەسەي جانە ورتالىق ازيا ءبولىمىنىڭ باسشىسى جانە رەسەي بولىمىندە ساياسي, اسكەري جانە سىرتقى ىستەر كەڭەسشىسى, سونداي-اق دجوردجتاۋن ۋنيۆەرسيتەتى ديپلوماتيانى زەرتتەۋ ينستيتۋتىنىڭ ۆيردجينيا جانە دين راسك اتىنداعى ستيپەنديا يەگەرى جانە زەرتتەۋشى بولدى.
