كەزدەسۋ بارىسىندا ادام قۇقىقتارىن ىلگەرىلەتۋ جانە قورعاۋ سالاسىنداعى ودان ءارى ىنتىماقتاستىق ماسەلەلەرى تالقىلاندى.
رەسەيلىك ومبۋدسمەن قازاقستاننىڭ قوعامدىق باقىلاۋ بويىنشا وڭ تاجىريبەسىن ەسكەرە وتىرىپ, ەلۆيرا ءازىموۆانى رەسەيدەگى ادام قۇقىقتارى جونىندەگى ۋاكىلدىڭ جانە ازاماتتاردىڭ سايلاۋ قۇقىقتارىن قورعاۋ جونىندەگى وڭىرلىك ومبۋدسمەندەردىڭ جۇمىسىمەن تانىسۋعا شاقىردى.
كەزدەسۋ بارىسىندا ە.ءازىموۆا ادام قۇقىقتارىن قورعاۋ جانە كەمسىتپەۋ ماقساتىندا ۇلتارالىق جانە كونفەسسياارالىق كەلىسىم سالاسىنداعى ءوزارا ءىس-قيمىلدى كۇشەيتۋدى ۇسىندى. ەكى ەل اراسىنداعى تۇراقتى دوستىق قارىم-قاتىناستاردى ساقتاۋدىڭ ماڭىزدىلىعىن اتاپ ءوتتى.
ە.ءازىموۆا قازاقستان مەن رەسەي ادام قۇقىقتارىنىڭ جالپىعا بىردەي دەكلاراتسياسىنىڭ, ازاماتتىق جانە ساياسي قۇقىقتار تۋرالى حالىقارالىق پاكتىنىڭ, تىلدىك بەلگىسى بويىنشا قۋدالاۋعا جول بەرمەيتىن ناسىلدىك كەمسىتۋشىلىكتىڭ بارلىق نىسانىن جويۋ تۋرالى حالىقارالىق كونۆەنتسيانىڭ قاتىسۋشىسى ەسكە سالدى.
قر كونستيتۋتسياسىنىڭ 14-بابىندا: «تەگىنە, الەۋمەتتىك, لاۋازىمدىق جانە م ۇلىكتىك جاعدايىنا, جىنىسىنا, ناسىلىنە, ۇلتىنا, تىلىنە بايلانىستى ەشكىمدى كەمسىتۋگە بولمايدى...». ۇقساس نورما رف كونستيتۋتسياسىندا قاراستىرىلعان.
وسىعان بايلانىستى قازاقستانداعى ادام قۇقىقتارى جونىندەگى ۋاكىل قر جانە رف قۇقىق قورعاۋ ورگاندارىنا بۇنداي فاكتىلەردى مۇقيات تەكسەرۋ جانە جولىن كەسۋ, جەكە ءوزى جاسايتىن نەمەسە كوتەرمەلەيتىن, ونىڭ ىشىندە ينتەرنەت جەلىلەردى پايدالانا وتىرىپ, وسىنداي كەمسىتۋشىلىك جاسايتىن قۇقىق بۇزۋشىلاردى جاۋاپكەرشىلىككە تارتۋ تۋرالى جۇگىنۋدى ۇسىندى.
ە.ءازىموۆا حالىقارالىق قوعامداستىقتىڭ مۇنداي فاكتىلەرى ادام قۇقىقتارىنىڭ ورەسكەل بۇزىلۋى دەپ تانىپ, ۇلتارالىق الاۋىزدىقتىڭ ورشۋىنە ىقپال ەتەتىنىن, ناتيجەسىندە قوعامداعى تۇراقسىزدىق پەن قاقتىعىستارعا, قايعىلى وقيعاعا اكەپ سوقتىراتىن اگرەسسيا, وشپەندىلىك تۋدىراتىنىن اتاپ ءوتتى.
«مەملەكەتتىك جانە باسقا دا تىلدەردى قۇرمەتتەۋ ساياساتىن ىلگەرىلەتۋ ادامدى جانە ونىڭ قۇقىقتارىن قۇرمەتتەۋ قاعيداتتارىندا تەك قانا بەيبىت جانە زاڭدى تاسىلدەرمەن جۇزەگە اسىرىلۋعا ءتيىس. بۇل قاراپايىم ازاماتتارعا عانا ەمەس, ازاماتتىق جانە ساياسي قايراتكەرلەرگە دە قاتىستى. ءبىز باسقا ازاماتتارعا, ونىڭ ىشىندە تىلدىك بەلگىلەرى بويىنشا اگرەسسيانى, وشپەندىلىكتى جانە توزبەۋشىلىكتى تۋدىراتىن جاريا مالىمدەمەلەردى كوتەرمەلەمەۋىمىز كەرەك», دەپ اتاپ ءوتتى ءازىموۆا كەزدەسۋ بارىسىندا.
