كەشە پرەمەر-مينيستر سەرىك احمەتوۆتىڭ توراعالىعىمەن وتكەن ۇكىمەت وتىرىسىندا مەملەكەت باسشىسىنىڭ بيىلعى جولداۋىن جۇزەگە اسىرۋ بويىنشا شارالار تالقىلاندى.
كەشە پرەمەر-مينيستر سەرىك احمەتوۆتىڭ توراعالىعىمەن وتكەن ۇكىمەت وتىرىسىندا مەملەكەت باسشىسىنىڭ بيىلعى جولداۋىن جۇزەگە اسىرۋ بويىنشا شارالار تالقىلاندى.
«بۇل جولداۋ ايرىقشا, ءويتكەنى, ەلىمىزدىڭ ەكونوميكالىق جانە الەۋمەتتىك دامۋىنىڭ ۇزاق مەرزىمدى ستراتەگياسىن جۇزەگە اسىرۋ شارالارىنىڭ ناقتى باعدارلاماسىن كورسەتىپ قانا قويعان جوق, ءبىزدىڭ قولدانىسىمىزعا وتاندىق تاريحىمىزداعى تىپتەن جاڭا – ماڭگىلىك ەل ۇعىمىن ەنگىزدى. مەملەكەت باسشىسى بۇل تاريحي مىندەت قابىلدانعان «ستراتەگيا-2050» باعدارلاماسى نەگىزىندە جۇزەگە اسىرىلاتىنىن اتاپ كورسەتتى», دەدى ۇكىمەت باسشىسى. س.احمەتوۆ ءسوز اراسىندا سونداي-اق 17 قاڭتاردا وتكەن ۇكىمەت وتىرىسىندا مەملەكەت باسشىسى جولداۋىن جۇزەگە اسىرۋ ءىس-شارالارىنىڭ ناقتى الگوريتمى قابىلدانعانىن اتاپ ءوتتى. ياعني بۇگىنگە دەيىن اۋقىمدى جۇمىستار جۇزەگە اسىرىلىپ, پرەزيدەنت اكىمشىلىگىمەن جولداۋدى جۇزەگە اسىرۋ بويىنشا جالپىۇلتتىق جوسپار كەلىسىلگەن.
وتىرىستا ەلباسىنىڭ قازاقستان حالقىنا جولداۋىنداعى ماقساتتارعا قول جەتكىزۋ بويىنشا ءاربىر مەملەكەتتىك ورگاندا ءوزىنىڭ الگوريتمى بولۋى تيىستىگىنە توقتالعان ۇكىمەت باسشىسى مەملەكەت باسشىسىنىڭ ءاربىر تاپسىرماسى ساپالى ءارى ۋاقتىلى ورىندالۋى قاجەتتىگىن دە قاتاڭ ەسكەرتتى. «بۇل تاپسىرمالاردىڭ ورىندالۋى بويىنشا مونيتورينگ ۇيىمداستىرىلىپ, قاتاڭ سۇراۋ بولۋى كەرەك», دەدى س.احمەتوۆ.
جولداۋعا وراي اتقارىلار بىرقاتار جۇمىستار جايىن بايانداعان ەكونوميكا جانە بيۋدجەتتىك جوسپارلاۋ ءمينيسترى ەربولات دوساەۆ ونى جۇزەگە اسىرۋ بويىنشا جالپىۇلتتىق جوسپاردىڭ جوباسىن تانىستىردى. ە.دوساەۆ جولداۋدىڭ جەتى باعىتى بويىنشا اعىمداعى جىلدىڭ ماۋسىمىنا دەيىن «اگروبيزنەس-2020» اگروونەركاسىپتىك كەشەندى دامىتۋ باعدارلاماسىنا تۇزەتۋلەر ەنگىزىلەتىنىن اتادى. «اعىمداعى جىلدىڭ ماۋسىمىنا دەيىن اۋىل شارۋاشىلىعىنا جاڭا تەحنولوگيالار ەنگىزۋ, ەڭبەك ونىمدىلىگىن ارتتىرۋ جانە اۋىل شارۋاشىلىعى سۋبەكتىلەرىن ۇزاق مەرزىمدى قارجىلاندىرۋعا جانە وتكىزۋ رىنوكتارىنا قولجەتىمدىلىگىن قامتاماسىز ەتۋ بويىنشا جولداۋدا كورسەتىلگەن مىندەتتەردى ەسەپكە الىپ, «اگروبيزنەس-2020» اگروونەركاسىپتىك كەشەندى دامىتۋ باعدارلاماسىنا, باسقا دا ستراتەگيالىق جانە باعدارلامالىق قۇجاتتارعا تۇزەتۋلەر ەنگىزىلەتىن بولادى», دەپ ناقتىلادى مينيستر. سونداي-اق, ول قازاقستاندا اعىمداعى جىلدىڭ اياعىنا دەيىن استانا مەن الماتى قالالارىندا 2030 جىلعا دەيىن اگلومەراتسيانى قالىپتاستىرۋ جوسپارلارى جاسالاتىنىن جەتكىزدى. بۇدان باسقا, ونىڭ ايتۋىنشا, «جاسىل ەكونوميكانى» دامىتۋ ماقساتىندا ۇستىمىزدەگى جىلدىڭ تامىزىنا دەيىن نازارباەۆ ۋنيۆەرسيتەتى بازاسىندا بولاشاقتىڭ ەنەرگياسىن ىزدەۋ مەن قۇرۋ, سونداي-اق, ەكولوگيالىق تازا كولىكتەردى پايدالانۋ ماسەلەلەردى زەرتتەۋ بويىنشا ۇزدىك تاجىريبەلەردى تالداپ, ەنگىزۋ ورتالىعى قۇرىلۋى ءتيىس. سونىمەن قاتار, مينيستر اعىمداعى جىلدىڭ مامىرىندا مەملەكەت باسشىسىنىڭ ءتورتىنشى مۇناي وڭدەۋ زاۋىتى مەن اتوم ەلەكتر ستانساسى قۇرىلىستارىنىڭ مەرزىمى مەن ورنالاستىرىلۋى بويىنشا بايانداماسى ەنگىزىلەتىنىن اتاپ ءوتتى.
سونداي-اق, ۆەدومستۆو باسشىسى حابارلاعانداي, وسى جىلدىڭ قىركۇيەگىنە دەيىن قازىرگى زامانعى لوگيستيكا ءجانە ديستريبۋتسيا ورتالىقتارىن دامىتۋ, اۆتوكولىك جانە تەمىرجول ينفراقۇرىلىمدارىن كەڭ اۋقىمدى جاڭعىرتۋ, حالىقارالىق ساۋدانى جۇزەگە اسىرۋ كەزىندەگى كەدەرگىلەردى جويۋ قاجەت. وسىعان وراي, كولىك جۇيەسى ينفراقۇرىلىمدارىن دامىتۋ مەن ينتەگراتسيالاۋ بويىنشا مەملەكەتتىك باعدارلاماعا ءتيىستى وزگەرىستەر ەنگىزىلەتىن بولادى.
وتىرىستا بۇدان ءارى ءسوز العان پرەمەر-ءمينيستردىڭ ورىنباسارى – يندۋستريا جانە جاڭا تەحنولوگيالار ءمينيسترى اسەت يسەكەشەۆ مەملەكەت باسشىسىنىڭ بارلىق تاپسىرمالارى بويىنشا ايقىن ءىس-قيمىل الگوريتمى جاسالعانىن اتادى. «بارلىق ءىس-شارالار مەرزىمىندە ورىندالاتىن بولادى. نەگىزگى جاي ءبىرىنشى جارتىجىلدىقتا پرەزيدەنتتىڭ قاراۋىنا ەنگىزىلەتىن, ءۇيد مب ەكىنشى بەسجىلدىعىن جاساۋعا قاتىستى بولىپ تۇر», دەدى ول. ال پرەمەر-ءمينيستردىڭ ورىنباسارى گۇلشارا ابدىقالىقوۆا «پرەزيدەنت جولداۋى شەڭبەرىندە بارلىق مۇددەلى مەملەكەتتىك ورگاندار الەۋمەتتىك بلوكتىڭ باعىتتارىن پىسىقتادى. شاكىرتاقى, الەۋمەتتىك تولەماقىلار كولەمىن كوتەرۋ, ازاماتتىق جانە مەملەكەتتىك قىزمەتكەرلەردىڭ ەڭبەك اقىسىن ۇلعايتۋ ماقساتىندا تالداۋلار مەن ەسەپتەۋلەر جۇرگىزىلەتىن بولادى», دەدى. بۇدان ءارى ۆيتسە-پرەمەر – قارجى ءمينيسترى باقىت سۇلتانوۆ مەملەكەت باسشىسىنىڭ مەملەكەتتىك باسقارۋ جۇيەسىن جەتىلدىرۋ جانە الەۋمەتتىك-ەكونوميكالىق دامۋ ماسەلەلەرىنە ايرىقشا كوڭىل بولىنەتىنىن اتاپ ءوتتى. جۇمىستىڭ باعىتتارى مەن ناقتى ينديكاتورلارى انىقتالعان. ماسەلەن, ۇستىمىزدەگى جىلى ەكونوميكانىڭ ءوسىمى 6-7 پايىزدى قۇراۋى ءتيىس, دەدى ول. «بارلىق باعىتتار بويىنشا قازىر جۇمىسشى توپتار بەكىتىلدى, بارلىق تاپسىرمالار بەلگىلەنگەن مەرزىمدە اتقارىلۋى ءۇشىن ءىس-شارالار جوسپارلارى قۇرىلۋدا», دەدى پرەمەر-ءمينيستردىڭ ءبىرىنشى ورىنباسارى باقىتجان ساعىنتاەۆ.
وتىرىستى تۇيىندەي كەلە, س.احمەتوۆ «مەملەكەت باسشىسىنىڭ جولداۋىنىڭ ماڭىزى زور. بۇل – ۇكىمەت شەشەتىن مىندەتتەر اۋقىمى دا كەڭ دەگەن ءسوز. باستىسى, قۇجاتتا بازالىق ينديكاتورلار جانە الەمنىڭ ەڭ وزىق 30 ەلى اراسىنا ەنۋ بويىنشا جەتى بەسجىلدىق شەڭبەرىندەگى كەزەڭدەر ايقىن كورىنىس تاپقان», دەدى. ۇكىمەت باسشىسى ەكونوميكا جانە بيۋدجەتتىك جوسپارلاۋ مينيسترلىگىنە ەلباسى جولداۋى جۇكتەگەن مىندەتتەردى جۇزەگە اسىرۋ تۇرعىسىندا جالپىۇلتتىق جوسپاردى ىسكە اسىرۋ بويىنشا جالپى مونيتورينگتى جۇرگىزۋدى تاپسىردى. ال پرەمەر-ءمينيستردىڭ ورىنباسارلارىنا قاداعالايتىن باعىتتارى اياسىنداعى جۇمىستاردى جۇيەلى نەگىزدە ۇيىمداستىرۋدى جۇكتەدى. سونىمەن قاتار, بۇقارالىق اقپارات قۇرالدارىندا كەڭىنەن تاراتۋ كەرەكتىگىن ايتا كەلە, پرەمەر-مينيستر كەڭسەسىنە جالپىۇلتتىق جوسپاردىڭ ورىندالۋىن جانە تۇراقتى نەگىزدە ونى ىسكە اسىرۋ بارىسىن قاداعالاۋدى تاپسىردى.
دينارا بىتىكوۆا,
«ەگەمەن قازاقستان».
