وتكەنگە — قۇرمەت, بولاشاققا — سەنىم

كەشە ەلباسىنىڭ “اقوردا” رەزيدەنتسياسىندا مەملەكەتتىك حاتشى – سىرتقى ىستەر ءمينيسترى قانات ساۋداباەۆتىڭ توراعالىعىمەن قازاقستان رەسپۋبليكاسى پرەزيدەنتىنىڭ جانىنداعى مەملەكەتتىك ناگرادالار جونىندەگى كوميسسيانىڭ كەزەكتى ءماجىلىسى بولىپ ءوتتى. اتالعان كوميسسيانىڭ كەزەكتى وتىرىسىنىڭ ەرەكشەلىگى ونىڭ ۇلى جەڭىستىڭ 65 جىلدىعى قارساڭىندا ءوتىپ وتىرعاندىعىندا. ق.ساۋداباەۆ ءوز سوزىندە بىلاي دەدى: “بۇگىنگى كۇن­دەرى ادامزات تاريحىنداعى ەڭ قان­تو­گىستى سوعىستىڭ ۇلى باتىرلارى­نىڭ ءبىزدىڭ ارامىزداعى سانى ازاي­ىپ بارادى, ۇلى وتان سوعىسى ار­دا­گەرلەرىنە قامقورلىق پەن شى­نايى قۇرمەت كورسەتۋ – ءبىز ءۇشىن قا­سيەتتى پارىز”. مەملەكەت باسشىسى ن.نازار­باەۆ تاۋەلسىزدىك العان جىل­دان باستاپ, جەڭىمپاز ۇرپاق وكىل­دە­رى­نىڭ جاعدايىن جاقسارتۋعا ءجىتى كو­ڭىل ءبولىپ كەلەدى. ەلباسىنىڭ تاپ­سىر­ماسىنا وراي كوميسسيا سوعىس ارداگەرلەرىنە جانە تىل ەڭبەك­كەر­لەرىنە ءتيىستى قۇرمەت كورسەتۋ ماق­سا­تىندا ورتالىق جانە جەرگىلىكتى اتقارۋشى ورگاندار تاراپىنان جولدانعان تىزىمدەردى قارادى. وسى رەت­تە قانات بەكمىرزا ۇلى: “مەنىڭ پايىمىمشا, ءبىز بۇل ەرلىكتەردى  ءوس­كەلەڭ ۇرپاقتى تاربيەلەۋدىڭ, تاۋەل­سىز قازاقستان ازاماتتارى ءۇشىن وتان­عا قاجىرلى دا شەكسىز قىزمەت ەتۋدىڭ جارقىن مىسالى رەتىندە پاي­دالا­نۋىمىز كەرەك دەپ ويلايمىن”, دەدى. ۇلى وتان سوعىسى شىنىمەن دە كوپەتنوستى قازاقستان حالقىنىڭ ءاربىر وتباسىندا دەرلىك ءوزىنىڭ قاي­عىلى ءىزىن قالدىرعانى بەلگىلى. ماي­دانعا ەلىمىزدەن 1,2 ميلليون قازاق­ستاندىق قولدارىنا قارۋ الىپ سو­عىسقا اتتانسا, سونىڭ تەڭ جارىمى ۇرىس دالالارىندا قازا تاپتى. بۇگىنگى تاڭدا ەلىمىزدە 14 400 ۇلى وتان سوعىسى ارداگەرى مەن 258 مىڭ تىل ەڭبەككەرى بار ەكەن. ەگەر وتكەنىمىزدى ريزاشىلىقپەن ەستە ساقتاماساق, وندا جارقىن بولاشاقتىڭ بولۋى دا مۇمكىن ەمەس. ق.ساۋداباەۆ وسىلاي دەي كەلىپ, ءسوزىن بىلايشا ءوربىتتى: ء“بىز, تاۋەل­سىز قازاقستاننىڭ ازاماتتارى, ۇلى جەڭىس باتىرلارىنىڭ ەرلىگىن تا­ريحىمىزدا ساقتاپ, سۇيىسپەنشىلىك پەن قامقورلىق تانىتىپ, ەلىمىز ءۇشىن ەرەن ەڭبەك ەتۋگە, وتان ءۇشىن جاڭا جەتىستىكتەرگە جەتۋگە ءتيىسپىز. ۇلى جەڭىستىڭ 65 جىلدىعى قار­ساڭىندا مەملەكەتتىك ناگرادالار تاپ­سىرۋ – بۇل ۇلى وتان سوعىسى­نىڭ قاتىسۋشىلارى مەن تىل ەڭ­بەك­كەرلەرىنە جانە ولاردىڭ ۇلى ەرلىگىنە ەلباسى نۇرسۇلتان نازار­باەۆتىڭ ەرەكشە قۇرمەتى مەن شى­نايى قامقورلىعى”. كوميسسيا وتىرىسىندا ۇسى­نىل­عان كانديداتۋرالار مەم­لە­كەت باسشىسىنىڭ قاراۋىنا جىبە­رىلدى. ناگرادتاۋ تۋرالى شەشىمدى ەلباسى ۇلى جەڭىس مەرەكەسىنىڭ 65 جىل­دىعى قارساڭىندا قابىل­دايدى. اسقار تۇراپباي ۇلى.