«جىگەر» سىيلىعىنا وتىنىمدەردى قابىلداۋ 2021 جىلى 20 تامىزدان 20 قىركۇيەككە دەيىن «مەديا دامىتۋ قورى» كورپوراتيۆتىك قورىنىڭ mdq.kz رەسمي سايتىندا جۇزەگە اسىرىلادى.
«جىگەر» - جۋرناليستىك شەبەرلىك سالاسىندا الەۋمەتتىك ماڭىزى بار تاقىرىپتاردى جاريالاعانى ءۇشىن بەرىلەتىن كاسىبي سىيلىق.
سىيلىقتىڭ نەگىزگى ماقساتى – تالانتتى جۋرناليست, قوعام قايراتكەرى, قر پرەزيدەنتى سىيلىعىنىڭ لاۋرەاتى بەيسەن قۇرانبەكتىڭ ەسىمىن ەل جادىندا وشىرمەۋ, مۇراسىن ساقتاپ قالۋ. بەلدى جۋرناليست قازاقستاندىق تەلەۆيزيانىڭ دامۋىنا ۇلكەن ۇلەس قوسىپ, ەڭبەكسۇيگىشتىگى مەن كاسىبىنە قالتقىسىز قىزمەت ەتۋىنىڭ ارقاسىندا ارىپتەستەرى مەن تەلەكورەرمەندەر اراسىندا سۇيىسپەنشىلىكتى جاۋلاپ الدى.
كونكۋرسقا قاتىسۋ شارتتارى:
- كونكۋرسقا قر رەسپۋبليكالىق جانە وبلىستىق تەلەباعدارلامالارى قاتىسا الادى;
- كونكۋرسقا ۇسىنىلعان ماتەريالدار تەلەەفيردە 2021 جىلدىڭ 1 قاڭتارى مەن 19 قىركۇيەك ارالىعىندا كورسەتىلۋى ءتيىس;
- كونكۋرسقا قازاق جانە ورىس تىلدەرىندەگى جۇمىستار قابىلدانادى;
- كونكۋرسقا قوعام ءۇشىن وزەكتى ماسەلەلەردى جانە الەۋمەتتىك تاقىرىپتى قوزعايتىن تەلەباعدارلامالار قاتىسا الادى.
ماراپات بەيسەن قۇرانبەكتىڭ جۋرناليستىك قىزمەتتەگى پرينتسيپتەرىن بارىنشا تولىق كورسەتە بىلگەن جۇمىستارعا بەرىلەدى. قۇرامىنا مەدياسالا ماماندارى جانە بەيسەن قۇرانبەكتىڭ ۇزەڭگىلەس دوستارى ەنەتىن قازىلار القاسىنىڭ مۇشەلەرى داۋىس بەرۋ قورىتىندىسى بويىنشا جەڭىمپازداردى انىقتايتىن بولادى.
بايقاۋ جەڭىمپازدارى «جىگەر» ەستەلىك مۇسىنشەسىنىڭ, ديپلومنىڭ جانە قارجىلاي سىيلىقتىڭ يەگەرى اتانادى.
I ورىن ءۇشىن - 1 000 000 تەڭگە, II ورىن ءۇشىن - 500 000 تەڭگە جانە III ورىن ءۇشىن - 300 000 تەڭگە.
بايقاۋ قورىتىندىسى مەن جەڭىمپازدار ەسىمدەرى 2021 جىلدىڭ 27 قىركۇيەگىندە بەلگىلى بولادى.
«جىگەر» سىيلىعى العاش رەت 2020 جىلى اقپارات جانە قوعامدىق دامۋ مينيسترلىگى مەن «مەديا دامىتۋ قورى» كورپوراتيۆتىك قورىنىڭ ىنتىماقتاستىعى بويىنشا قۇرىلدى. سىيلىققا وتاندىق باق-تىڭ 4 وكىلى يە بولدى.
