ايماقتا اقپان باستالعالى جالعاسىپ جاتقان ىندەتكە قارسى ۆاكتسينا ەگۋ شارالارىنا 31 مەديتسينالىق مەكەمە جۇمىلدىرىلعان. ۆاكتسينالاۋ وسى مەكەمەلەرگە قاراستى 181 ستاتسيونارلىق جانە جىلجىمالى ەكپە پۋنكتتەرىندە ۇيىمداستىرىلعان. تۇرعىندارعا ارنايى دايىندىق وقۋلارىنان وتكەن 426 مەديتسينالىق قىزمەتكەر ەكپە سالىپ جاتىر. وڭىردە ۆاكتسينانىڭ ءبىر مەزگىلدە 173 مىڭ دوزاسىن ساقتاي الاتىن 104 مۇزداتقىش قۇرىلعى جۇمىس ىستەپ تۇر. ۆاكتسينانى شالعاي اۋداندارعا ارنايى سالقىن ساقتاعىش رەفريجەراتورلار جەتكىزىپ بەرىپ جاتىر.
– بۇگىنگە دەيىن وبلىسقا ۆاكتسينانىڭ 346 655 دوزا ءبىرىنشى كومپونەنتى, 285 385 دوزا ەكىنشى كومپونەنتى اكەلىندى. تۇرعىنداردىڭ 55%-ى, ياعني 277,8 مىڭ ادام ۆاكتسينا قابىلدادى. ۆاكتسينا قابىلداماعانداردىڭ سانى 215,4 مىڭ بولادى, بۇل – ايماق تۇرعىندارىنىڭ 42,7 پايىزى, – دەدى وبلىستىق دەنساۋلىق ساقتاۋ باسقارماسى باسشىسىنىڭ ورىنباسارى انجەلا بەكسۇلتانوۆا.
ال وبلىستاعى ءبىلىم مەكەمەلەرىنىڭ جەرگىلىكتى كاسىپوداعى ءبىلىم سالاسى قىزمەتكەرلەرىنىڭ ەكپە الۋعا دەگەن ىنتاسىن ارتتىرۋدى كوزدەپ وتىر. وسى ماقساتتا كاسىپوداق 15 تامىزدان 1 قىركۇيەككە دەيىن كوروناۆيرۋس ينفەكتسياسىنا قارسى ۆاكتسينالاردىڭ كەز كەلگەنىنىڭ ءبىرىنشى كومپونەنتىن ەكتىرگەن ءبىلىم قىزمەتكەرلەرى اراسىندا «ۆاكتسينا قابىلدا!» اكتسياسىن باستادى.
بەلگىلەنگەن كەزەڭ ارالىعىندا ۆاكتسينا سالدىرعان كاسىپوداق مۇشەسى ۇتىس ويىنىنا قاتىسىپ, Apple iPhone ۇيالى تەلەفونى, اس ماشيناسى, ەت تارتقىش, تەلەديدار, نوۋتبۋك, شاڭسورعىش جانە قىسقا تولقىندى پەش سياقتى تۇرمىستىق زاتتاردى ۇتىپ الۋ مۇمكىندىگىنە يە بولادى.
وسى ورايدا, «قىزىل» مارتەبەلىلەر ماسەلەسىن دە ءسوز ەتە كەتەيىك, وڭىردە ءۇي كارانتينىندەگىلەردىڭ كوشەگە شىعىپ كەتۋى تولاستاماي تۇر. وبلىستىق كاسىپكەرلەر پالاتاسىنىڭ ديرەكتورى مۇرات ابەنوۆتىڭ ايتۋىنشا, سوڭعى اپتا ىشىندە عانا Ashyq جوباسى ارقىلى 629 «قىزىل» مارتەبەلى, 454 «سارى» مارتەبەلى ادام انىقتالعان.
– ءبىز بيزنەس وكىلدەرىن ءتارتىپ بۇزۋشىلاردى انىقتاۋعا ۇلكەن جاۋاپكەرشىلىكپەن قاراۋدى سۇرايمىز جانە ولار تۋرالى سانيتارلىق-ەپيدەميولوگيالىق قاداعالاۋ ورگاندارىن ۋاقتىلى حاباردار ەتىپ وتىرۋعا شاقىرامىز. وبلىس تۇرعىندارىن COVID-19 جۇقتىرۋ قاۋپىنەن تەك وسىلاي عانا قورعاي الامىز. بۇگىندە Ashyq قوسىمشاسىنىڭ ءتيىمدى ەكەنىنە ابدەن كوزىمىز جەتتى. سوڭعى جەتىنىڭ وزىندە «قىزىل» جانە «سارى» مارتەبەسى بار مىڭنان اسا تۇرعىن قوعامدىق ورىندارعا كىرە المادى. بۇگىنگىدەي جاعدايدا, اسىرەسە كاسىپورىن ۇجىمدارى جاپپاي ۆاكتسينا قابىلداۋى قاجەت. ءبىز كاسىپورىن باسشىلارىنان وسى ماسەلەگە نازار اۋدارۋدى سۇرايمىز. ويتكەنى پاندەميانى توقتاتۋدىڭ بۇگىنگى تاڭداعى بىردەن-ءبىر جولى – وسى عانا, – دەدى م.ابەنوۆ.
كاسىپكەرلەر پالاتاسىنىڭ مالىمەتىنشە, قوستاناي وبلىسىندا 4 158 كاسىپورىن Ashyq جوباسى بويىنشا جۇمىس ىستەپ جاتىر.
قوستاناي وبلىسى
