بيزنەس • 18 تامىز، 2021

باستاعان بيزنەسى تۇرالاپ قالعاندارعا كومەك كورسەتىلەدى

69 رەت كورسەتىلدى

پاندەميا كەزىندە جۇرى­سىنەن جاڭىلىپ، تابى­سى­نان ايىرىلعان كاسىپ­كەر­لەر كوپ بولدى. قولعا العان جوباسىن پىشىراتىپ العاندار قاتارىندا «باستاۋ بيزنەس» جوباسى­نىڭ تۇلەكتەرى دە جوق ەمەس. كاسىپكەرلىك نەگىزدەرىن ەندى-ەندى مەڭگەرىپ، ەل قاتارلى تابىس تابۋعا كىرىسكەن جوبا تۇلەكتەرى كۇتپەگەن جەردەن قيىندىققا تاپ بول­عا­نى بەلگىلى. مەملەكەت قول­­داۋىنىڭ يگىلىگىن كور­گەن ولارعا تاعى دا ءبىر مۇمكىندىك بەرىلىپ وتىر. قىس­قاسى، ىندەت قىسقان كۇردەلى كەزەڭدە زارداپ شەككەن جوبا تۇلەكتەرى تومەن پايىزبەن نەسيە راسىمدەي الادى.

«اتامەكەن» ۇلتتىق كاسىپ­كەر­لەر پالاتاسى باسقارما تور­اعاسىنىڭ ءبىرىنشى ورىنباسارى ناريمان ابىلشايىقوۆتىڭ ايتۋىنشا، وڭىرلەردە جۇمىس ىس­تەيتىن ميكروقارجى ۇيىمدارى 15 شىلدەدەن باستاپ وتىنىمدەردى قابىلداۋدا. بۇگىندە جالپى سوماسى 3 ملرد تەڭگەنى قۇراي­تىن 600-گە جۋىق ءوتىنىم كەلىپ تۇسكەن.

«باستاۋ بيزنەس» جوباسى­نىڭ تۇلەكتەرى مەملەكەت قول­داۋىن ءاردايىم سەزىنىپ كەلە­دى. پرەزيدەنت تاپسىرماسى­نا سايكەس بيىلعى جانە وتكەن جىل­داعى وقۋعا قاتىس­قان­دار­دى قارجىلاندىرۋعا جەتكىلىكتى كولەمدە قاراجات ءبولىندى. جەر­گىلىكتى اتقارۋشى ورگاندارمەن بىرلەسە قۇرىلعان، تەك جوبا تۇلەكتەرىنە عانا قىزمەت كورسەتەتىن 15 ميكروقارجى ۇيى­مى جىلىنا 6 پايىزدىق جەڭىل­دەتىلگەن مولشەرلەمەمەن نەسيە بەرەدى. سونىمەن قاتار نە­سيەنى وتەۋ كەزىندە دەمالىس كەزەڭى دە قاراستىرىلعان. بۇل قارا­جات «باستاۋ بيزنەس» قاتىسۋ­شىلارىنا عانا ماقساتتى تۇردە جۇمسالادى. مۇنى جوبانىڭ كەزەكتى ءبىر ارتىقشىلىعى دەسە دە بولادى. بيىل 22،5 ملرد تەڭ­گە كولەمىندە جوبالاردى قار­جى­لاندىرۋ قاراستىرىلعان»، دەيدى ن.ابىلشايىقوۆ.

ۇلتتىق كاسىپكەرلەر پالاتاسى ميكروقارجىلاندىرۋ جانە جوبالاردى سۇيەمەلدەۋ دەپارتامەنتى ديرەكتورىنىڭ ورىنباسارى رينات كەمەشوۆ­تىڭ ايتۋىنشا، نەسيە الۋ ءۇشىن «باستاۋ بيزنەس» جوباسى­نىڭ سەرتيفيكاتى جانە كە­پىل مۇلكىنە قاجەتتى قۇجاتتار كەرەك. سونداي-اق بانكتەردە مەرزىمى وتكەن بەرەشەك بولماۋى قاجەت.

«كەپىل رەتىندە سالىن­عانى­نا 50 جىلدان اسقان تۇرعىن ۇي­لەر، سونداي-اق كوممەرتسيالىق ماقساتتاعى جەر ۋچاسكە­لەرى قابىلدانادى. اۋىل شارۋا­شىلىعى ماقساتىنداعى ەگىس­تىكتەر مەن جايىلىمدار، جىلجىمالى م ۇلىك قوسىمشا كەپىل رەتىندە قابىلدانۋى مۇمكىن. نەسيە جىلدىق 6 پايىزدىق مولشەرلەمەمەن بەرىلەدى. ميك­روكرەديتتى 5 جىلعا دەيىنگى مەر­زىمگە راسىمدەۋگە بولادى. ال مال شارۋاشىلىعى سالاسىن­دا­عى جوبالارعا ارنالعان ميك­رو­نەسيەنىڭ ەڭ ۇزاق مەرزى­مى – 7 جىل»، دەپ ناقتىلادى ر.كەمەشوۆ.

بەلگىلى بولعانداي، اۋىلدىق ەلدى مەكەندەر مەن شاعىن قالا­لاردىڭ وكىلدەرىنە 2،5 مىڭ ايلىق ەسەپتىك كورسەتكىش كولە­مىندە نەسيە راسىمدەۋگە مۇمكىندىك بار. بۇل دەگەنىمىز – 7 292 500 تەڭگە. قالالار مەن مونوقالالاردىڭ تۇرعىندارىنا 18 960 500 تەڭگەگە دەيىن (6،5 مىڭ ايلىق ەسەپتىك كورسەتكىش) نەسيە الۋعا بولادى. شىمكەنت، اقتاۋ جانە اتىراۋ قالالارىنا بەلگىلەنگەن ەڭ جوعارى سوما – 8 مىڭ ايلىق ەسەپتىك كورسەتكىش نەمەسە 23 336 000 تەڭگە.

اتاپ وتەرلىگى، نەسيە راسىم­دەۋ كەزىندە ەشقانداي سالا­لىق شەكتەۋلەر جوق. ونى اينالىم قاراجاتىنا دا، مال جەم­دەۋگە دە پايدالانۋعا بولادى. الايدا ميكرونەسيە تۇتى­نۋ­شىلىق ماقساتقا، بۇعان دەيىن العان نەسيەلەردى وتەۋگە، نەسيە بەرەشەگىن قايتا قارجى­لان­دىرۋعا، جىلجى­مايتىن تۇرعىن ۇيگە، جەكە تۇر­عىن ءۇي قۇرىلىسى ءۇشىن جەر ۋچاسكەلەرىن ساتىپ الۋعا جۇم­سالماۋى كەرەك.

«بيىل «باستاۋ بيزنەس» تۇ­لەك­تەرىنىڭ ءوز ءىسىن اشۋى ناتي­جەسىندە بيۋدجەتكە 1،5 تەڭگە ملرد سالىق ءتۇستى. مەملەكەت تاراپىنان بەرىلەتىن نەسيەلەر 5 مىڭعا جۋىق جاڭا كاسىپ­ورىن­نىڭ اشىلۋىنا ىقپال ەتەدى دەپ كۇتىلۋدە. سوندا شاما­مەن 10 مىڭعا جۋىق جاڭا جۇ­مىس ورنى قۇرىلادى. العا قو­يىل­عان جوسپارلار ورىندالسا، سالىق تولەۋشىلەردىڭ دە قا­تارى كو­بەيمەك»، دەيدى ن.ابىلشايىقوۆ.

دەرەكتەرگە سۇيەنسەك، 2017-2020 جىلدارى «باستاۋ بيزنەس» جو­باسى بويىنشا 151 528 جۇ­مىسسىز جانە ءوزىن ءوزى جۇمىس­پەن قام­تىعان ادام كاسىپكەر­لىك نەگىز­دەرىن مەڭگەرگەن. ولار 4 جىل­دا 44 362 جوبانى ىسكە قو­سىپ­تى. 60 مىڭعا جۋىق جۇمىس ورنى قۇرىلعان.

جوبالاردىڭ 36 پايىزى شاعىن نەسيەلەردىڭ كومەگىمەن، قالعان 64 پايىزى «ەڭبەك» باع­دار­لاماسى اياسىنداعى گرانت­تىق قارجىلاندىرۋ ەسەبىنەن جۇزەگە اسىرىلعان. ولاردىڭ 59 پايىزى نەمەسە 26 132-ءسى اۋىل شارۋاشىلىعى سالاسى­نا قا­تىستى. ال قىزمەت كورسەتۋ، ساۋ­دا جانە ءوندىرىس سالالارىنىڭ ۇلەسى – 41 پايىز نەمەسە 18 231 جوبا.

بىلتىرعى ەپيدەميالىق جاعدايعا بايلانىستى «باستاۋ بيزنەس» جوباسى ونلاين فورمات­قا اۋىستىرىلعانى بەلگىلى. قازىر ونلاين وقىتۋ ارنايى ازىر­لەنگەن Atameken Academy پلات­فورماسىندا جۇرگىزىلۋدە. بيىل 30 مىڭ جۇمىسسىزدى وقىتۋ جوسپارلانعان. ولاردىڭ ىشىن­دە NEET ساناتىنداعى جاس­تار، جاس وتباسىلار، از قام­تىل­­عان جانە كوپبالالى وتبا­سىلار­دىڭ مۇشەلەرى، ەڭبەككە قابىلەتتى مۇمكىندىگى شەكتەۋلى جاندار بار.

«Atameken Academy پلات­فور­ماسىنداعى وقۋ 26 ساۋىردە باستالدى. بۇگىنگە دەيىن ءتورت وقۋ كۋرسى ءتامامدالدى. بارلى­عى 30 188 ادام وقىپ شىقتى. وسى جىلدىڭ 16 تامىزىندا سوڭ­عى – بەسىنشى لەكتەگى وقۋ باس­­­تالدى. دەگەنمەن ءبىز قا­زىر­­دىڭ وزىندە-اق جوسپاردى تو­لىق ورىن­دادىق. بۇعان وڭىر­لەر­­دەگى وقۋ­عا دەگەن ناقتى قاجەتتى­­لىك سە­بەپ بولدى»، دەيدى ن.ابىل­شايىقوۆ.

«باستاۋ بيزنەس» جوباسىنىڭ پاۆلودار وڭىرىندەگى بيز­نەس-ترەنەرى اقمارال سايتقۇلوۆا­نىڭ ايتۋىنشا، جوباعا قاتىسۋ ءۇشىن الدىمەن جۇمىسپەن قام­تۋ ورتالىعىنا بارىپ تىركەلۋ شارت.

«وقۋ مەرزىمى – 21 كۇن. وسى ۋاقىت ارالىعىندا قا­تى­سۋ­شىلارعا 50 بەينەجازبا كور­سەتىلەدى. ولار ءتۇرلى باعىت بو­­يىنشا 12 مودۋلدىك ساباق وتە­دى. اسىرەسە مەنەدجمەنت، مار­كەتينگ، سالىق سالالارى­نا با­سىمدىق بەرىلەدى. ەلەكت­رون­دى كوممۋنيكاتسيالار تۋرالى دا ايتىلادى. ەڭ باستىسى، قاتىسۋشىلار بيزنەس-جوسپار جاساۋدى ۇيرەنەدى»، دەيدى ا.سايتقۇلوۆا.

«اتامەكەن» ۇلتتىق كا­سىپكەر­لەر پالاتاسىنىڭ وكىل­­دەرى ۇسىنعان مالىمەتكە سۇيەنسەك، بيىل وقۋدى اياقتاعان­دار­دىڭ 19 261-ءى نەمەسە 64 پا­­يىزى – جۇمىسسىز، 8 733-ءى نە­­مەسە 29 پايىزى – ءوزىن ءوزى جۇ­­مىس­­­پەن قامتىعاندار، 2 194-ءى نە­مەسە 7 پايىزى – ءىسىن جا­ڭا باس­­تا­عان جانە ناقتى كاسى­بى بار كاسىپكەرلەر.

قاتىسۋشىلاردىڭ 14 756-سى الەۋمەتتىك وسال توپتارعا جاتادى. NEET ساناتىنداعى جاس­تاردىڭ ۇلەسى – 8 630 ادام. كاسىپكەرلىك نەگىزدەرىن مەڭگەرگەندەردىڭ 3 446-سى – كوپ­بالالى وتباسىلاردىڭ وكىلدەرى، 1 902-ءسى – از قامتىلعان وتباسىدان شىققاندار، 778-ءى – ەڭبەككە قابى­لەتتى مۇگەدەكتەر.

بيىل وقۋ كۋرستارىنان سوڭ 8 469 جوبا جۇزەگە اسىرىلدى. بۇل وسى جىلعا ارنالعان جوس­پار­دىڭ 94 پايىزىن قۇرايدى.

سوڭعى جاڭالىقتار

15169 ادام كوروناۆيرۋس جۇقتىردى

كوروناۆيرۋس • بۇگىن، 09:17

ۇقساس جاڭالىقتار