جەكە قورلار جانە ونداعى قۇجاتتار كەڭەستىك ءداۋىر جانە قازىرگى كەزەڭدەگى ساياسي ەليتا وكىلدەرىنىڭ ءومىرى مەن قىزمەتىن, ولاردىڭ رەسپۋبليكانىڭ دامۋىنا قوسقان ۇلەسىن كورسەتەتىن تولىقتىرۋ كوزدەرىنىڭ بىرەگەي جيىنتىعى بولىپ سانالاتىنى بارشاعا ءمالىم. دەمەك ءبىز وسى قور قۇجاتتارى ارقىلى بەلگىلى ءبىر وقيعالار مەن فاكتىلەردى نەمەسە سول ءبىر كەزەڭدەگى وقيعالارعا قاتىسۋشىلار مەن كۋاگەرلەردىڭ ەستەلىكتەرىن كورسەتە الامىز.
سۇلتان سۇلەيمەن ۇلى الماتى قالاسىندا قۇرىلعان اتاقتى 100-جەكە قازاق اتقىشتار بريگاداسىنىڭ قۇرامىندا سوعىسقا قاتىسقان جانە اۋىر سىناقتاردان وتكەن از ادامنىڭ ءبىرى. س.جيەنباەۆ – ۇلى وتان سوعىسىنا قاتىسقان قازاقستاندىقتاردىڭ باتىرلىق ەرلىكتەرى, ءوزىنىڭ جولداستارى, ەڭبەك جولى, وتكەن داۋىردەگى بەلگىلى تۇلعالارمەن اتقارعان قىزمەتتىك تاريحى باياندالعان بىرقاتار ومىرباياندىق كىتاپتاردىڭ اۆتورى. سۇلتان سۇلەيمەن ۇلى ۇزاق جىلدار بويى د.قوناەۆ, ب.ءاشىموۆ, ش.جانىبەكوۆ, ن.نازارباەۆ جانە باسقا دا مەملەكەتتىڭ تانىمال تۇلعالارىنىڭ جانىندا قىزمەت اتقاردى.
1953 جىلى س.جيەنباەۆ ماسكەۋ قالاسىنداعى كسرو ساۋدا مينيسترلىگىنىڭ جوعارى ساۋدا مەكتەبىن ءساتتى ءبىتىرىپ, ناتيجەسىندە كەيىنگى قىزمەتى ساۋدا, قارجى, تاماق, جەڭىل ونەركاسىبى سالالارىمەن بايلانىستى بولدى. «مىندەتتەردى ءبولۋ بويىنشا ساۋدا ورگاندارىنان باسقا, مەن جەڭىل, تاماق جانە ەت-ءسۇت ونەركاسىبىنىڭ, اكىمشىلىك ورگانداردىڭ, ازاماتتىق قورعانىس جۇيەسىنىڭ جۇمىسىنا جەتەكشىلىك ەتتىم. ورتاازيالىق اسكەري وكرۋگ قۇرىلعان كەزدە مەن وكرۋگ قۇرۋدا كۇندەلىكتى كومەك كورسەتۋمەن تىعىز اينالىستىم: وبلىستاردا جەر ۋچاسكەلەرىن ءبولۋ, اسكەري بولىمدەردى ورنالاستىرۋ, ولاردى ءۇي-جايمەن قامتاماسىز ەتۋ جانە تاعى باسقا مىندەتتەر ماعان جۇكتەلدى», دەپ ەسكە الادى س.جيەنباەۆ مينيسترلەر كەڭەسى توراعاسىنىڭ ورىنباسارى لاۋازىمىنداعى جۇمىسى تۋرالى بايانداعان كىتابىندا. قۇرمەتتى دەمالىسقا شىققاننان كەيىن س.جيەنباەۆ د.قوناەۆتىڭ ۇسىنىسى بويىنشا 1985 جىلدىڭ 15 اقپانىنان باستاپ ەسكەرتكىشتەردى قورعاۋ قوعامى ورتالىق كەڭەسىنىڭ تورالقاسىن 1988 جىلدىڭ 22 شىلدەسىنە دەيىن باسقاردى. 1992 جىلدىڭ سوڭىندا س.جيەنباەۆتىڭ باستاماسى بويىنشا د.قوناەۆتىڭ حالىقارالىق قوعامدىق قورى قۇرىلىپ, ونىڭ ءبىرىنشى پرەزيدەنتى بولعان ەدى. س.جيەنباەۆ قانداي لاۋازىمدى اتقارسا دا, ءوز جۇمىسىنا تولىقتاي بەرىلىپ, اتقارعان سالالاردىڭ قىزمەتتەرىن جاقسارتۋ ءۇشىن ءبىلىمى مەن قابىلەتىن ايامادى. ول كەڭەستىك قازاقستاننىڭ جوعارعى سايلانبالى بيلىك ورگاندارىنىڭ قۇرامىنا ەنە وتىرىپ, حالىق پەن وتاننىڭ يگىلىكتى بولاشاعى جولىندا ەرەن ەڭبەك ۇلگىسىن كورسەتە ءبىلدى.
س.جيەنباەۆتىڭ جەكە ارحيۆ قۇجاتتارى 2003 جىلدىڭ 20 ناۋرىزىندا ءوز ءوتىنىشى بويىنشا قازاقستان رەسپۋبليكاسى پرەزيدەنت ارحيۆىنە تاپسىرىلعان بولاتىن.
جەكە قور قۇجاتتارىنىڭ اراسىندا پارتيالىق ورگاندارداعى, مەملەكەتتىك مەكەمەلەردەگى, ۆەدومستۆولارداعى جانە قوعامدىق ۇيىمدارداعى قىزمەتىن راستايتىن قىزمەتتىك كۋالىكتەرى, قازاق كسر جوعارعى كەڭەسىنىڭ دەپۋتاتى, قازاقستان كپ وك, قازاقستان كپ الماتى قالالىق كوميتەتىنىڭ مۇشەسى بولىپ سايلانۋى تۋرالى, قازاق كسر, رسفسر وردەندەرىمەن, مەدالدارىمەن, قۇرمەتتى اتاقتارىمەن جانە تاعى باسقا مەملەكەت الدىنداعى سىڭىرگەن ەڭبەگى جانە قوعامدىق قىزمەتتەگى جەتىستىكتەرى ءۇشىن ەرەكشەلىك بەلگىلەرىمەن ناگرادتاۋ تۋرالى, ءارتۇرلى شارالاردا سويلەگەن سوزدەرى, جازعان ماقالالارى, باياندامالارى, باسقا دا قۇجاتتارى بار. اتالعان قۇجاتتارمەن قاتار سۇلتان سۇلەيمەن ۇلىنىڭ جەكە قور قۇجاتتار قۇرامى جەكە سۋرەتتەرى جانە تۋىستارىمەن, ارىپتەستەرىمەن رەسپۋبليكانىڭ ايتۋلى وقيعالارىنا ارنالعان ءتۇرلى ءىس-شارالاردا, سالتاناتتى جيىنداردا تۇسكەن فوتوسۋرەتتەرمەن تولىققان.
سۇلتان سۇلەيمەن ۇلىنىڭ جەكە ارحيۆتىك قۇجاتتارى ونىڭ ءومىر اعىسى بارىسىندا جاساقتالعان عۇمىر تاريحى, مەملەكەت جانە قوعامدىق قىزمەتتەرىنىڭ بەلگىلى ءبىر سالاسى مەن اياسىنىڭ دامۋىنا قوسقان ۇلەسىن كورسەتەتىن دەرەككوزدەر رەتىندە ۇلتتىق قۇندىلىقتارىمىزدىڭ قاتارىندا.
جانىبەك زەينەلوۆ,
قازاقستان رەسپۋبليكاسى پرەزيدەنتى ءارحيۆىنىڭ باسقارما باسشىسى
