ايماق باسشىسى سىر جۇرتشىلىعى اتىنان ءوڭىر تاريحىندا العاش رەت بوكستان وليمپيا ويىندارىنىڭ قولا جۇلدەسىن العان قامشىبەك قوڭقاباەۆتى قۇتتىقتاپ, داۋلەت نيازبەكوۆ پەن ءمولدىر جاڭبىربايعا ەل نامىسىن ايانباي قورعاعاندارى ءۇشىن العىسىن ايتتى.
– ەكى اپتا بويى وبلىس حالقى الامانعا ۇكىلەپ شىعارىپ سالعان ۇمىتتەرىنىڭ تىلەۋىن تىلەپ, جانكۇيەر بولدى. الىس ساپارعا, جاۋاپتى جارىسقا اتتانعان ۇل-قىزدارىمىز سەنىمدى اقتادى. ال قامشىبەكتىڭ التىنعا بەرگىسىز قولا جۇلدەسى تالاي بالدىرعاننىڭ قيالىنا قانات ءبىتىرىپ, سىر حالقىنىڭ كوپتەن كۇتكەن ارمانىن جۇزەگە اسىردى.
ەل پرەزيدەنتىنەن مەملەكەتتىك تۋدى الىپ, الەم مىقتىلارى باس قوسقان سايىستا ۇستاپ شىعۋ قاشاندا ۇلكەن مارتەبە, زور سەنىم. بۇل مىندەتتى جەرلەسىمىز قامشىبەك قوڭقاباەۆ ابىرويمەن اقتاپ, بايراعىمىزدى وليمپيادا تورىندە جەلبىرەتتى, – دەدى وبلىس اكىمى.
بيىل ايماق سپورتشىلارى كوپتەگەن جارىستاردان ولجامەن ورالدى. جىل باسىنان بەرى جەرلەستەرىمىز ەل بىرىنشىلىكتەرىندە 700 مەدال جەڭىپ السا, الەم, ازيا چەمپيوناتتارىندا 46 مەدالعا قول جەتكىزدى.
كەزدەسۋدە وبلىس اكىمى ەل نامىسىن ابىرويمەن قورعاپ شىققان قامشىبەك قوڭقاباەۆقا اۆتوكولىك كىلتىن تابىستاسا, باپكەرى سەيىتجان توكەنوۆ, وليمپيادا ويىندارىنىڭ قاتىسۋشىلارى داۋلەت نيازبەكوۆ پەن ءمولدىر جاڭبىرباي 1 ملن تەڭگەنىڭ سەرتيفيكاتىن يەلەندى.
ەلدىڭ رۋحى مەن مارتەبەسىن كوتەرگەن سپورتشىلارعا «Dalatex» جشس باسشىسى دىلمۇحامەد ابيزوۆ, «نۇرلەن» جشس جەتەكشىسى قايرات بورانباەۆ, «مەليوراتور» سەرىكتەستىگىنىڭ ديرەكتورى بەردىبەك مىحانوۆ پەن «ستاندارت ويل كزو» كومپانياسىن باسقاراتىن ءادىل بيجانوۆ سەكىلدى مەتسەنات ازاماتتار دەمەۋشىلىك جاساپ, قولداۋ كورسەتتى.
شارادا سپورت كۇنى كاسىبي مەرەكەسىنە وراي №4 وليمپيادالىق رەزەرۆتىڭ مامانداندىرىلعان بالالار مەن جاسوسپىرىمدەر مەكتەبىنىڭ جاتتىقتىرۋشىسى ۆلاديمير لەپتيكوۆ پەن ق.مۇڭايتپاس ۇلى اتىنداعى سپورت كلۋبتىڭ ديرەكتورى جامال بوزوۆاعا مادەنيەت جانە سپورت مينيسترلىگىنىڭ توسبەلگىسى مەن قۇرمەت گراموتاسى تابىستالدى.
وليمپيادانىڭ قولا جۇلدەگەرى قامشىبەك قوڭقاباەۆ پەن جەكە باپكەرى سەيىتجان توكەنوۆ سپورتشىلارعا كورسەتىلگەن قولداۋعا ريزاشىلىعىن ءبىلدىرىپ, الدا دا جەرلەستەر سەنىمىن اقتاۋعا كۇش سالاتىنىن ايتتى.
سونداي-اق جيىندا اۋىر اتلەتيكادان 4 دۇركىن الەم چەمپيونى, قازاقستاننىڭ ەڭبەك سىڭىرگەن سپورت شەبەرى يليا يلين قامشىبەكتى جەڭىسىمەن قۇتتىقتاپ, ءمولدىر مەن داۋلەتكە الداعى سايىستاردا ساتتىلىك تىلەدى جانە ارىپتەستەرىنە كاسىبي مەرەكەلەرىنە وراي تىلەگىن ارنادى.
قىزىلوردا
