بيىلعى ماۋسىمنان باستاپ تۇساۋى كەسىلگەن سۋ جاڭا تۋرنير – كونفەرەنتسيا ليگاسى اتتى دوپ دوداسىندا ونەر كورسەتكەن قوستانايدىڭ «توبىلى» مەن ەلوردانىڭ «استاناسى» ىرىكتەۋدىڭ ەكىنشى اينالىمىندا ەۋروپانىڭ الدىڭعى قاتارلى كوماندالارىن جەڭىپ, كەلەسى كەزەڭگە ەش قيىندىقسىز شىققان بولاتىن. كەيىنگى جەرەبە جەرلەستەرىمىزگە جەڭىل ءتۇسىپ, بۇل جولى وزدەرىنەن دەڭگەي جاعىنان بولسىن, قارجىلىق جاعدايىنان بولسىن الدەقايدا تومەن كلۋبتار قارسىلاس اتاندى. وسى ءۇشىنشى ىرىكتەۋ كەزەڭىنىڭ جەرەبەسىنەن كەيىن قازاقستاندىق فۋتبول ساراپشىلارى «توبىل» مەن «استانانىڭ» كونفەرەنتسيا ليگاسىنىڭ توپتىق كەزەڭىنە دەيىن شىعاتىن مۇمكىندىگى بار دەپ بولجاعان ەدى. بىراق فۋتبولدا ارقاشان ساراپشىلاردىڭ بولجامى دۇرىس كەلە بەرمەيتىنىن, الاڭداعى لەگيونەرلەردىڭ سانى, جاسى ۇلكەن فۋتبولشىلاردىڭ تاجىريبەسى, كوماندانىڭ قارجىلىق الەۋەتى كلۋبتى ءاردايىم جەڭىسكە جەتەلەي بەرمەيتىنىن, تەك جىگەرلى ءارى مىنەزدى كوماندانىڭ عانا مەرەيى ۇستەم بولاتىنىن «جيلينانىڭ» جاس جىگىتتەرى مەن ماتچ سوڭىنا دەيىن جەڭىس ءۇشىن كۇرەسەتىن كۋپس ويىنشىلارى ءتۇسىندىرىپ بەرگەندەي بولدى.
ەۋروكۋبوك ويىندارىندا ەشقانداي تاجىريبەسى جوق سلوۆاكيالىق 21-22 جاستاعى جىگىتتەردەن قۇرالعان «جيلينا» كونفەرەنتسيا ليگاسىنىڭ ءۇشىنشى ىرىكتەۋ كەزەڭىنىڭ قارىمتا ماتچىندا ءوز الاڭىندا «توبىلدى» قابىلداپ, قوستانايلىق كوماندانى 5:0 ەسەبىمەن ويسىراتا جەڭدى. 1995-2008 جىلدار ارالىعىندا ۇيىمداستىرىلعان ايگىلى ينتەرتوتو كۋبوگىندا 2007 جىلى توپ جارعان «توبىل» سول ۋاقىتقا دەيىن دە, ودان كەيىن دە بىردە-ءبىر ەۋروكۋبوك ويىندارىندا بۇلاي ماسقارا بولىپ جەڭىلمەگەن ەدى. ءتىپتى ەكىنشى ىرىكتەۋ كەزەڭىندە سىرت الاڭدا حورۆاتيانىڭ «حايدۋك» كلۋبىنان 2:0 ەسەبىمەن جەڭىلىپ تۇرا, قارىمتا ماچتا قارسىلاستىڭ قاقپاسىنا ءتورت گول سوعىپ, «توبىل» فۋتبولشىلارى ەرلىك كورسەتكەن ەدى. ال بۇل جولى جاس فۋتبولشىلاردىڭ قارقىنىنا توتەپ بەرە الماي ەۋروكۋبوكتاعى جورىعىن ءساتسىز اياقتادى.
سونىمەن قاتار «توبىلدىڭ» ءىزىن الا «استانا» كلۋبى دا كونفەرەنتسيا ليگاسىنىڭ ءۇشىنشى ىرىكتەۋ كەزەڭىنەن كەيىن اتالعان تۋرنيرمەن قوشتاستى. قازاقستاندىق كوماندالار اراسىندا ەۋروكۋبوك باسەكەلەرىندە ەڭ تاجىريبەلى كوماندا سانالاتىن ەلوردالىق ۇجىم وسىمەن قاتارىنان ەكىنشى جىل ەۋروكۋبوكتى توپتىق كەزەڭسىز اياقتاۋعا ءماجبۇر بولدى.
سىرت الاڭدا فينليانديانىڭ كۋپس كومانداسىمەن تەڭ ويناپ, «استانا ارەنادا» اناۋ-مىناۋ كوماندالاردان جەڭىلە قويمايتىن «استانا» قارىمتا كەزدەسۋدە 3:1 ەسەبىمەن الدا تۇرىپ, ماتچ سوڭىندا 3:4 ناتيجەسىمەن ۇتىلىپ قالدى. كەزدەسۋدى تاماشا باستاعان «استانا» ويىنشىلارى ماتچتىڭ نەبارى 4-مينۋتىندا ەسەپتى اشتى. مارين توماسوۆتىڭ وڭ قاپتالدان اسىرعان پاسىن ءساتتى پايدالانعان تيگران بارسەگيان كومانداسىن العا شىعاردى. ءتىپتى ءبىرىنشى تايم اياقتالار تۇستا تاعى سول توماسوۆتىڭ پاسىنان كەيىن ابات ايىمبەتوۆ باسپەن تاماشا گول سوعىپ, ەسەپتى ەسەلەي ءتۇستى. ءسويتىپ, «استانا» ۇزىلىسكە كوتەرىڭكى كوڭىل-كۇيمەن اتتاندى.
ەكىنشى تايمدا ويىنعا تىڭنان قوسىلعان كۋپس شابۋىلشىسى رانگەل 53-مينۋتتا ەسەپ ايىرماسىن قىسقارتۋعا مۇمكىندىك الدى. بىراق ارادا بەس مينۋت وتكەن سوڭ تيگران بارسەگيان الىستان تاماشا سوققى جاساپ, كومانداسىنىڭ ءۇشىنشى گولىن سوقتى. وسى گولدان كەيىن «استانا» ويىنشىلارى كەلەسى كەزەڭنىڭ ماسەلەسى شەشىلدى دەپ ويلاسا كەرەك, ماتچتىڭ قالعان ۋاقىتىندا تەك قورعانۋمەن بولدى. الاڭ يەلەرى قورعانىسقا ءمان بەرە باستاعان سوڭ قارسىلاستار شابۋىلعا دەن قويدى. ءسويتىپ, ويىننىڭ 61 جانە 75-مينۋتتارىندا ءدال سول رانگەل ەكى مارتە مەرگەندىگىمەن كوزگە ءتۇستى. ال 77-مينۋتتارىندا يكاۋنيەك كومانداسىنىڭ جەڭىس گولىن سوعىپ, ويىننىڭ نۇكتەسىن قويدى. ەكى ماتچتىڭ قورىتىندىسى بويىنشا 5:4 ەسەبىمەن جەڭىسكە جەتكەن كۋپس ويىنشىلارى پلەي-وفف كەزەڭىنە جولداما الدى.
وسى ماتچتى كورىپ وتىرىپ 2015/16 جىلعى چەمپيوندار ليگاسىنىڭ ىرىكتەۋ كەزەڭىندەگى «استانا» مەن حيك اراسىنداعى كەزدەسۋ ەسىمىزگە ءتۇستى. ءۇشىنشى ىرىكتەۋدىڭ سىرت الاڭدا وتكەن العاشقى ويىنىندا ەلوردالىق ۇجىم 0:0 ەسەبىمەن تەڭ ويناپ, «استانا ارەناداعى» قارىمتا كەزدەسۋدە جەرلەستەرىمىز سوڭعى مينۋتتاردا 4:3 ناتيجەسىمەن جەڭىستى ج ۇلىپ العان ەدى. مىنە, اراعا التى جىل سالىپ كۋپس ءدال سونداي جاعدايمەن «استانانى» ءوز الاڭىندا جەڭىپ قانا قويماي, جەرلەستەرىنىڭ كەتكەن ەسەسىن قايتاردى.
ەۋروپا ليگاسىنىڭ ءۇشىنشى ىرىكتەۋ كەزەڭىندە «الاشكەرتتەن» جەڭىلگەن الماتىنىڭ «قايراتى» جارىستى كونفەرەنتسيا ليگاسىندا جالعاستىراتىن بولدى. ەۋروكۋبوك باسەكەسىن چەمپيوندار ليگاسىنان باستاپ, ءۇشىنشى دەڭگەيلى جارىسقا دەيىن ءتۇسىپ قالعان الماتىلىقتارعا ەندى جەڭىلۋگە بولمايدى. ويتكەنى ولاردى ءارى قاراي قابىلداپ الا بەرەتىن ۋەفا-نىڭ باسقا ءتۋرنيرى جوق.
«شاحتەرگە» ساتتىلىك الىپ كەلگەن ەرەۆانداعى ۆازگەن سارگسيان اتىنداعى ستاديون «قايراتتى» جارىلقاي قويمايدى. الماتىدا كوماندالاردىڭ كۇشتەرى تەڭ تۇسكەن سوڭ, بارلىق ماسەلە سىرت الاڭداعى ويىندا شەشىلەتىنى انىق ەدى. ءسويتىپ, ءوز ەلىندە وتكەن ويىندا ارمەنيالىقتار تورەشىمەن بىرگە جابىلىپ ءجۇرىپ ارەڭ دەگەندە «قايراتتى» 3:2 ەسەبىمەن جەڭىپ, كەلەسى كەزەڭگە جولداما الدى.
جەرلەستەرىمىزدىڭ جەڭىسكە جەتەتىندەي مۇمكىندىكتەرى بار ەدى. بىراق 62 جانە 92-مينۋتتاردا «قايراتتىڭ» ەكى بىردەي ويىنشىسى الاڭنان قۋىلعاننان كەيىن الماتىلىقتاردىڭ سالى سۋعا كەتتى. العاش دەنيس پولياكوۆ كوماندالاستارىن قيىن جاعدايدا تاستاپ كەتسە, ەكسترا-تايمدا ايبول ابىكەن «قىزىل قاعاز» الىپ, الاڭنان قۋىلدى. ماتچتىڭ سوڭعى مينۋتتارىن توعىز ويىنشىمەن وتكىزگەن «قايرات» 104-مينۋتتا قاقپاسىنا گول وتكىزىپ الدى. قورىتىندى ەسەپ – 3:2. «الاشكەرت» – ەۋروپا ليگاسىنىڭ پلەي-وفف كەزەڭىندە.
«قايراتتىڭ» ىشكى چەمپيوناتتا دا, ەۋروكۋبوك باسەكەلەرىندە دە اگرەسسيالىق ويىن كورسەتەتىنى بەلگىلى. وسى ءبىر ويىن جۇيەسىنىڭ سالدارىنان الماتىلىق ۇجىم ەۋرودودا باسەكەلەرىنە قاتىسا-
تىن قازاقستاندىق كلۋبتار اراسىندا ەڭ دورەكى كوماندانىڭ ءبىرى بولىپ تۇر. ماسەلەن, بىلتىرعى ەل چەمپيوندارى بۇگىنگە دەيىن ەۋروپا جاسىل الاڭدارىندا وتكىزگەن 44 ماتچتا 13 فۋتبولشىسى «قىزىل قاعازبەن» جازالانىپ, الاڭنان قۋىلعان.
ەندى «قايرات» كونفەرەنتسيا ليگاسىنىڭ توپتىق كەزەڭىنە ءتۇسۋ ءۇشىن پلەي-وفف باسەكەسىندە ليۋكسەمبۋرگتىڭ «فولا» كومانداسىمەن وينايدى. ال قاراعاندىنىڭ «شاحتەرى» پلەي-وففتا ءيزرايلدىڭ «ماككابي» (تەل-اۆيۆ) كلۋبىمەن كەزدەسەدى. كوماندالاردىڭ ءبىرىنشى ماتچتارى 19 تامىزعا, قارىمتا ويىنى 26 تامىزعا جوسپارلانعان.
