ساپار ماقساتى – وتكەن عاسىر باسىندا جاپون باسقىنشىلارىنا قارسى كورەي پارتيزاندىق قوزعالىسىن باسقارعان گەنەرال حون بوم دونىڭ سۇيەگىن تۋعان جەرىنە الىپ كەتۋ جانە ەكى ەل اراسىنداعى ىنتىماقتاستىقتى دامىتۋ باعىتىندا بىرلەسكەن جوبالاردى تالقىلاۋ.
اۋەجايداعى قارسى الۋدان كەيىن شەتەلدىك قوناقتار مەن وبلىس باسشىلىعى «حون بوم دو» مەموريالدىق كەشەنىنە باردى. كەشەندە ءوز حالقىنىڭ ازاتتىعى ءۇشىن كۇرەسكەن گەنەرالدىڭ سۇيەگىن كورەي تاراپىنا تاپسىرۋ ءراسىمى ءوتتى.
1868 جىلى دۇنيەگە كەلگەن حون بوم دو – وتكەن عاسىردىڭ باسىنان باستاپ جاپون باسقىنشىلارىنا قارسى قارۋلى كۇرەستى باستاعانداردىڭ ءبىرى. 1919 جىلدان باستاپ «تاۋەلسىزدىك ارمياسىنىڭ» كورنەكتى ۇيىمداستىرۋشىسى بولدى. ازاماتتىق سوعىس اياقتالعاننان كەيىن حون بوم دو كەڭەس وداعى اۋماعىندا ءومىر ءسۇرىپ, 1937 جىلى قىزىلوردا قالاسىنا جەر اۋدارىلدى. ءومىرىنىڭ سوڭعى جىلدارى جەرگىلىكتى كورەي تەاترىندا كۇزەتشى بولىپ جۇمىس ىستەپ, 1943 جىلى 25 قازاندا قىزىلوردا قالاسىندا 75 جاسىندا قايتىس بولدى.
ءىس-شارادا وبلىس اكىمى گۇلشارا ابدىقالىقوۆا ۇلت ازاتتىق كوتەرىلىسىنىڭ باتىرى, گەنەرال حون بوم دونىڭ سۇيەگىن تۋعان جەرىنە قايتارۋ ەكى ەل اراسىنداعى تاتۋلىقتى ودان ءارى نىعايتا تۇسەتىنىن ايتتى.
– ءبىزدىڭ رەسپۋبليكامىزدىڭ تاۋەلسىزدىگىن العاشقى بولىپ مويىنداعان ەلدەردىڭ ءبىرى – كورەيا رەسپۋبليكاسىمەن دوستىق بايلانىس نىق ورنىعىپ, جىلدان-جىلعا جاندانا تۇسۋدە. ەل پرەزيدەنتى قاسىم-جومارت توقاەۆ كورەيا پرەزيدەنتى مۋن چجە ءيننىڭ قىزىلوردادا جەرلەنگەن گەنەرال حون بوم دونىڭ سۇيەگىن تاريحي وتانىنا قايتارۋ تۋرالى ۇسىنىسىنا قاتىستى وڭ شەشىم قابىلداعانى دا ەكى ەلدىڭ قارىم-قاتىناسىنداعى ماڭىزدى ءساتتىڭ ءبىرى ەكەندىگى داۋسىز, – دەدى ءوڭىر باس-
شىسى.
كورەيا رەسپۋبليكاسىنىڭ پاتريوتتار مەن ارداگەرلەر جونىندەگى ءمينيسترى حۆان گي چحول قاھارمان رۋحىن قۇرمەتتەگەن قازاق ەلىنە العىسىن جەتكىزدى. ەسكە الۋ شاراسىنان كەيىن گەنەرالدىڭ سۇيەگىن قۇرمەت قاراۋىلىنىڭ قاتىسۋىمەن رەسمي شىعارىپ سالۋ ءراسىمى بولدى.
ساپار اياسىندا وبلىستىق مەكەمەلەر ۇيىندە كەزدەسۋ ۇيىمداستىرىلىپ, قوس تاراپ ءوزارا بايلانىستى دامىتۋعا باعىتتالعان ماڭىزدى ماسەلەلەردى تالقىعا سالدى. وبلىس اكىمى كورەيا رەسپۋبليكاسى دەلەگاتسياسىنىڭ ساپارى ەكى ەل اراسىنداعى دوستىق قارىم-قاتىناستاردىڭ ايقىن كورىنىسى ەكەنىن ايتىپ, بىرلەسكەن جوبالار تابىستى جۇزەگە اسىرىلاتىنىنا سەنىم ءبىلدىردى.
پرەزيدەنت قاسىم-جومارت توقاەۆتىڭ كورەيا رەسپۋبليكاسىنا مەملەكەتتىك ساپارى اياسىندا بىرقاتار بىرلەسكەن جوبانى جۇزەگە اسىرۋ جوسپارلانىپ وتىر. ونىڭ ىشىندە قىزىلوردا وبلىسىنىڭ اكىمدىگى تاراپىنان سىر ەلىنىڭ برەندى بولىپ سانالاتىن كۇرىش داقىلىن وسىرۋدە «اقىلدى» تەحنولوگيالاردى قولدانۋ, ءبىلىم, دەنساۋلىق ساقتاۋ سالالارىنداعى ءوزارا ءىس-قيمىلدى كەڭەيتۋ, تۋريزم سالاسىن دامىتۋ جانە ينۆەستيتسيالىق جوبالاردى جۇزەگە اسىرۋ باعىتىندا ۇسىنىستار ايتىلدى.
ءوڭىر باسشىسى قىزىلوردا وبلىسىنىڭ اكىمدىگى ينۆەستورلارعا مەملەكەتتىك قولداۋ شارالارىن كورسەتۋگە ءازىر ەكەنىن ايتىپ ءوتتى. كورەيا رەسپۋبليكاسىنىڭ پاتريوتتار جانە ارداگەرلەر جونىندەگى ءمينيسترى حۆان گي چحول ەكىجاقتى ىنتىماقتاستىقتى ورناتۋدا كورەيا مەملەكەتى تاراپىنان قولداۋ كورسەتىلەتىنىن ايتىپ, ىستىق ىقىلاس تانىتقان قىزىلوردالىقتارعا العىسىن ءبىلدىردى.
قىزىلوردا
