– ۆاكتسينا سالدىرۋ – ىندەتتىڭ الدىن الۋدىڭ عانا ەمەس, ۇجىمدىق يممۋنيتەتتى قالىپتاستىرۋدىڭ جالعىز جولى. سول سەبەپتەن باسقارما باسشىلارىنا باعىنىستى مەكەمەلەردەگى قىزمەتكەرلەردى ۆاكتسينالاۋ دەڭگەيىن 90 پايىزعا دەيىن جەتكىزۋ جۇكتەلەدى. بارىڭىزگە كەمشىلىكتەردى تۇزەتۋ ءۇشىن ەكى اپتا ۋاقىت بەرەمىن. جۇمىس جولعا قويىلماسا, سىزدەرگە قاتىستى تارىپتىك جاۋاپكەرشىلىك قارالادى, – دەيدى وبلىس اكىمى.
وبلىستىق دەنساۋلىق ساقتاۋ باسقارماسىنىڭ باسشىسى اسحان بايدۋاليەۆتىڭ ايتۋىنا قاراعاندا, كوروناۆيرۋس ينفەكتسياسىنا قارسى ۆاكتسينالاۋدىڭ كۇندەلىكتى جوسپارىنا وزگەرىس ەنگىزىلىپتى. ەندى كۇن سايىن ۆاكتسينا الاتىندار سانى 1 050-دەن 3 500-گە دەيىن ارتپاق.
– وڭىرگە ءبىرىنشى كومپونەنت ءۇشىن 170 295 دوزا, ەكىنشى كومپونەنتكە ارنالعان 138 695 دوزا ۆاكتسينا جەتكىزىلدى. سوڭعى 10 كۇندە ۆاكتسينا العان ادامداردىڭ سانى 13,1 پايىزعا ارتتى. ۆاكتسينالاۋعا جاتاتىن كونتينگەنتتەر اراسىندا ەڭ جوعارى كورسەتكىش قۇقىق قورعاۋ ورگاندارىنا (170%), ال ەڭ تومەنگى كورسەتكىش ستۋدەنتتەر (38,3%) اراسىندا بايقالىپ وتىر, – دەيدى ا.بايدۋاليەۆ.
ونىڭ پىكىرىنشە, ينفەكتسيالىق ستاتسيونارلاردىڭ جانساقتاۋ بولىمىندە جاتقان ناۋقاستارعا قاتىستى تالداۋ جۇرگىزىلگەن. قازىر ستاتسيونارلاردا كوروناۆيرۋس ينفەكتسياسىن جۇقتىرعان 1 751 ناۋقاس ەمدەلىپ جاتىر. جانساقتاۋ بولىمىندە 87 ناۋقاس وقشاۋلانعان. جاعدايى اۋىر ناۋقاستاردىڭ بىردە-ءبىرى ۆاكتسينا الماعانى انىقتالىپتى.
– «جىلىوي اۋدانىندا تۇرعىنداردىڭ 13,7 پايىزى ۆاكتسينا سالدىرعان. ال ماقاتتا – 22,5, يساتايدا – 28,7, قىزىلقوعا اۋدانى تۇرعىندارىنىڭ 28,1 پايىزى ۆاكتسينا ەكتىرگەن», دەيدى ا.بايدۋاليەۆ.
وسىعان بايلانىستى وبلىس اكىمى ماحامبەت دوسمۇحامبەتوۆ جىلىوي جانە ماقات اۋدانىنىڭ اكىمدەرىنە جۇمىستى ءتيىستى دەڭگەيدە ۇيىمداستىرۋدى, سالاعا جەتەكشىلىك ەتەتىن ورىنباسارلارىنا قاتىستى تارتىپتىك شارا قولدانۋدى تاپسىردى. اكىمنىڭ پىكىرىنشە, ءار ەكى كۇن سايىن اتىراۋ قالاسى مەن اۋداندار, سالالىق ۇيىمدار, كاسىپورىندار جانە باسقا دا مەكەمەلەر ۆاكتسينالاۋ تۋرالى بايانداۋى قاجەت. ۆاكتسينامەن قامتۋدىڭ تاۋلىكتىك كورسەتكىشىن جاقسارتۋ ءۇشىن ناقتى شارالار قابىلدانادى. اۋداندارداعى ۆاكتسينالاۋ قارقىنىن جانداندىرۋ ءۇشىن ادىستەمەلىك كومەك كورسەتىلەدى.
ۆاكتسينا الۋدىڭ تومەندىگىنەن بە, الدە ىندەت وشاعىنىڭ كوبەيۋىنەن بە, اتىراۋدا كوروناۆيرۋس ينفەكتسياسىنا شالدىعۋ دەرەگى ازايار ەمەس. ماسەلەن, وبلىستىق سانيتارلىق-ەپيدەميالىق باقىلاۋ دەپارتامەنتى باسشىسىنىڭ ورىنباسارى گۇلناز ەرباتىروۆانىڭ دەرەگىنە سۇيەنسەك, شىلدەدە كوروناۆيرۋس ينفەكتسياسىن جۇقتىرۋدىڭ 9 445 جاعدايى تىركەلگەن. ال تامىزدىڭ العاشقى ون كۇنىندە 4 379 ناۋقاس انىقتالعان.
– كوروناۆيرۋس ينفەكتسياسىن جۇقتىرعان ناۋقاستاردىڭ 60 پايىزى اتىراۋ قالاسىندا تىركەلىپ وتىر. بۇعان قوسا جىلىوي اۋدانى مەن تەڭىز كەن ورنىندا ەپيدەميالىق احۋال ناشارلادى. قاۋىپتى ۆيرۋسقا شالدىققانداردىڭ 59 پايىزى كلينيكالىق سيمپتوم نەگىزىندە انىقتالدى. ال 15-20 پايىزى – ناۋقاستارمەن قارىم-قاتىناستا بولعاندار. بۇل وڭىردە ەپيدەميالىق احۋالدىڭ ناشارلاعانىن بايقاتادى, – دەيدى گ.ەرباتىروۆا.
ينفەكتسيالىق ستاتسيونارلاردا جاتقان ناۋقاستاردىڭ كەيبىرىنىڭ ەمدەلگەنىنە ايدان اسقان. سونىڭ ءبىرى – التىن تولەگەنوۆا ماۋسىم ايىنىڭ باسىندا يندەر اۋداندىق اۋرۋحاناسىنا جاتقىزىلعان. جاعدايى ناشارلاعان سوڭ, اتىراۋ قالاسىنداعى مودۋلدىك اۋرۋحانانىڭ جانساقتاۋ بولىمىنە اۋىستىرىلىپتى.
– جانساقتاۋ بولىمىندە ەكى جاقتى پنەۆمونيا, وكپەنىڭ 96 پايىزى قابىنعان دەگەن دياگنوز قويىلدى. ءبىر اي بويى وكپەنى جاساندى جەلدەتۋ اپپاراتىنا قوسۋلى جاتتىم. دارىگەرلەر جۇرگىزگەن ەمنىڭ ناتيجەسىندە قاۋىپتى ۆيرۋستان ساۋىعا باستادىم. مەنى بەيىندى بولىمشەنىڭ پالاتاسىنا اۋىستىرىپ, ەمدەلۋدى جالعاستىردىم, – دەيدى ا.تولەگەنوۆا.
ول 10 تامىزدا مودۋلدىك اۋرۋحانانىڭ ينفەكتسيالىق ستاتسيونارىنان ۇيىنە شىعارىلدى. ەندى ءۇش اي بويى تۇرعىلىقتى مەكەنجايىندا دارىگەرلەردىڭ باقىلاۋىندا بولادى. سونداي-اق ارنايى وڭالتۋدان وتەدى.
– ەندى 10 كۇن بويى وتتەگى كونتسەنتراتورىنىڭ كومەگىمەن دەم الامىن. سودان كەيىن دارىگەرلەردىڭ باقىلاۋىمەن وكپەنىڭ جۇمىسىن قالپىنا كەلتىرەمىن. وسى ورايدا ەمدەلۋ كەزىندە دارىگەرلەرگە كورسەتكەن قامقورلىعى مەن جىلى ءسوزى ءۇشىن العىسىمدى بىلدىرگىم كەلەدى. ال تۇرعىنداردان تۋعان-تۋىستارىڭىز بەن جاقىندارىڭىزدىڭ قاۋىپسىزدىگى ءۇشىن ماسكا تاعىپ, ادامدار كوپ جينالاتىن ورىندارعا بارماۋدى سۇرايمىن, – دەيدى ا.تولەگەنوۆا.
تاعى ءبىر ەمدەلۋشى – 56 جاستاعى جىبەك قازيەۆا №2 وبلىستىق اۋرۋحاناعا 17 شىلدەدە وكپەسىنىڭ 90 پايىزى قابىنىپ تۇسكەن بولاتىن. بىراق ول جانساقتاۋ بولىمىنە جاتقىزىلماي, بەيىندىك بولىمدە ەمدەلدى. ەم-دومنىڭ ناتيجەسىندە سىرقاتتى جەڭىپ, 8 تامىزدا اۋرۋحانادان شىقتى. ەندى ول دا ماحامبەت اۋدانىنداعى ۋچاسكەلىك دارىگەردىڭ باقىلاۋىنا الىنادى.
اتىراۋ وبلىسى
